पुणे मार्केटयार्डमध्ये गणपती उत्सवात मोबाईल चोरी करणारा विधीसंघर्षीत बालक पकडला
पुणे मार्केटयार्डमध्ये गणपती उत्सवात मोबाईल चोरी करणारा विधीसंघर्षीत बालक पकडला
पुणे मार्केटयार्ड पोलीसांनी गणपती उत्सवातील गर्दीत मोबाईल चोरी करणाऱ्या विधीसंघर्षीत बालकाला पकडले. पोलिसांनी त्याच्याकडून १३ मोबाईल जप्त करून ₹87,000 किमतीचा मुद्देमाल हस्तगत केला.
रिपोर्टर : झोहेब शेख
पुणे ५ सप्टेंबर २०२५ : पुण्यातील मार्केटयार्ड परिसरात गणपती उत्सवाच्या गर्दीचा फायदा घेत मोबाईल चोरी करणाऱ्या एका विधीसंघर्षीत बालकाला पोलिसांनी मुद्देमालासह ताब्यात घेतले आहे. या कारवाईमुळे नागरिकांमध्ये दिलासा निर्माण झाला असून गणपती उत्सवातील सुरक्षा व्यवस्थेतील पोलीस दक्षतेचा प्रत्यय पुन्हा एकदा आला आहे.
मार्केटयार्ड पोलीस स्टेशनचे वरिष्ठ पोलीस निरीक्षक श्रीमती मनिषा पाटील यांच्या आदेशानुसार पोलीस पथक गस्त घालत असताना त्यांना माहिती मिळाली की, एक तरुण स्वप्नपुर्ती सोसायटीच्या पार्किंग भिंतीलगत पांढऱ्या पिशवीत मोबाईल घेऊन विक्रीसाठी थांबला आहे. ही माहिती खात्रीलायक असल्याने तातडीने पोलीस पथकाने घटनास्थळी छापा मारला.
तेथे संशयिताला पाहून पोलिसांनी त्याला अडवले. त्याच्या अंगात पांढऱ्या रंगाचा राखाडी डिझाइन असलेला शर्ट आणि काळी पॅन्ट होती. अंगझडतीदरम्यान त्याच्याकडे असलेल्या पांढऱ्या प्लास्टिकच्या पिशवीतून विविध कंपन्यांचे मोबाईल आढळून आले. तपासासाठी विश्वासात घेतल्यावर त्याने कबुली दिली की त्याने दि. १० जुलै २०२५ रोजी हमाल नगर व मार्केटयार्ड परिसरातून मोबाईल फोन चोरी केले होते.
एकूण १३ मोबाईल जप्त करण्यात आले असून त्यांची किंमत सुमारे ₹87,000 इतकी आहे. सदर प्रकरणी मार्केटयार्ड पोलीस स्टेशनमध्ये गुन्हा नोंदवण्यात आला आहे. या प्रकरणाचा तपास पोलीस उपनिरीक्षक सुनिल भापकर यांच्या नेतृत्वाखालील पथकाने केला. या कारवाईत थोरात, कौस्तुभ जाधव, राऊत, झेंडे, जेधे, किरण जाधव, आशिष यादव आदी पोलिसांचा सहभाग होता.
ही कारवाई मा. अप्पर पोलीस आयुक्त श्री. मनोज पाटील, मा. पोलीस उपआयुक्त (परि-५) श्री. राजकुमार शिंदे, तसेच मा. सहा. पोलीस आयुक्त (वानवडी विभाग) श्री. धन्यकुमार गोडसे यांच्या मार्गदर्शनाखाली पार पडली.
गणपती उत्सवात वाढलेल्या गर्दीत मोबाईल चोरीचे प्रकार वाढू नयेत यासाठी पोलिसांनी अधिक कडक गस्त घालण्यास सुरुवात केली आहे. नागरिकांनीही आपल्या वस्तूंची काळजी घ्यावी आणि चोरीचा संशय आल्यास त्वरित पोलीस ठाण्याशी संपर्क साधावा, असे आवाहन पोलिसांकडून करण्यात आले आहे.
या प्रकरणातून स्पष्ट झाले की गर्दीच्या ठिकाणी लहान मुले आणि तरुणांचा वापर करून गुन्हे करण्याचे प्रमाण वाढले आहे. अशा घटना टाळण्यासाठी पोलीस यंत्रणा सतत सज्ज असून नागरिकांच्या सहकार्याची गरज अधोरेखित करण्यात आली आहे.
