पुणे पोलिसांची कठोर मोहीम; टिपू पठाण, गजा मारणे, घायवळ यांच्या मालमत्तांवर जप्तीची कारवाई
पुणे पोलिसांची कठोर मोहीम; टिपू पठाण, गजा मारणे, घायवळ यांच्या मालमत्तांवर जप्तीची कारवाई
पुणे पोलिसांनी कुख्यात गुंड टोळ्यांच्या आर्थिक साम्राज्यावर गदा आणण्यासाठी मोहीम सुरू केली आहे. टिपू पठाण, गजा मारणे आणि घायवळ यांच्या मालमत्तांची चौकशी व जप्तीची प्रक्रिया सुरू.
सायली मेमाणे
पुणे ५ ऑक्टोबर २०२५ : पुणे पोलिसांनी शहरातील कुख्यात गुंड टोळ्यांवर कठोर कारवाई करण्यासाठी आर्थिक धागेदोरे पकडण्याची मोहीम हाती घेतली आहे. आतापर्यंत गुन्हेगारी टोळ्यांवर झालेली कारवाई प्रामुख्याने मर्यादित स्वरूपाची राहिली होती. मात्र, आता थेट त्यांच्या मालमत्ता, उत्पन्नाचे स्रोत आणि काळ्या पैशाच्या तपासाद्वारे टोळ्यांना आर्थिकदृष्ट्या कमकुवत करण्याची योजना आखली आहे.
या मोहिमेत शहरातील कुख्यात गुंड टिपू पठाण, गजा मारणे, निलेश घायवळ यांच्यासह अन्य सक्रिय टोळ्यांचा समावेश करण्यात आला आहे. पोलिसांनी या टोळ्यांच्या नावावर असलेल्या स्थावर मालमत्ता, बँक खाते, व्यावसायिक गुंतवणूक आणि इतर संपत्तीची तपासणी सुरू केली आहे. यामध्ये सरकारमान्य व्हॅल्यूअरची नेमणूक करून संबंधित मालमत्तांचे मूल्यांकन केले जात आहे. यामुळे केवळ बेकायदेशीर मार्गाने मिळवलेले उत्पन्न उघडकीस येणार नाही, तर त्यांच्या पुढील कारवायांवरही आळा बसण्याची शक्यता आहे.
गुंडगिरीविरोधात प्रभावी पावले उचलण्याचा पोलिसांचा हा आराखडा, कायद्याच्या अंमलबजावणीसाठी महत्त्वपूर्ण मानला जात आहे. गुन्हेगारी टोळ्यांची पकड आर्थिक साम्राज्यावर आधारित असल्याने, त्यांची नाडी आवळण्यासाठी ही पद्धत अधिक परिणामकारक ठरणार आहे. आतापर्यंतच्या तपासातून पोलिसांना अनेक टोळ्यांच्या मालमत्तांमध्ये विसंगती आणि संशयास्पद गुंतवणूक आढळून आली आहे.
पोलिस सूत्रांच्या माहितीनुसार, या मालमत्ता जप्ती मोहिमेमुळे टोळ्यांच्या बेकायदेशीर धंद्यांना मोठा धक्का बसणार आहे. यामुळे भूमिगत झालेले किंवा परदेशात पसार झालेले गुंडदेखील रडारवर येण्याची शक्यता आहे. शिवाय, या टोळ्यांच्या पाठराखण करणाऱ्या राजकीय व व्यावसायिक गोट्यांवरही दबाव वाढणार असल्याचे सांगितले जात आहे.
पुण्यातील गुन्हेगारीविरोधी कारवाईला या मोहिमेमुळे नवीन दिशा मिळणार आहे. स्थानिक नागरिक आणि व्यापारी वर्गाने पोलिसांच्या या उपक्रमाचे स्वागत केले असून, शहरातील गुंडगिरीवर कायमस्वरूपी आळा बसावा अशी अपेक्षा व्यक्त केली जात आहे.
