Pune Pustak Mahotsav 2025: पुण्यात 13–21 डिसेंबरला भव्य पुस्तक महोत्सव; ‘शांतता पुणेकर वाचत आहेत’ उपक्रमातून गिनीज रेकॉर्डची संधी

पुणे पुस्तक महोत्सव 13–21 डिसेंबरला फर्ग्युसन कॉलेजमध्ये; ‘शांतता पुणेकर वाचत आहेत’ उपक्रमातून नागरिकांना गिनीज वर्ल्ड रेकॉर्डमध्ये सहभागी होण्याची संधी.

पुणे ९ डिसेंबर २०२५ : पुणे आगामी काळात वाचनसंस्कृतीचा मोठा उत्सव साजरा करण्यास सज्ज होत आहे. राष्ट्रीय पुस्तक ट्रस्ट, शिक्षण मंत्रालय, भारत सरकार आणि महाराष्ट्र शासन यांच्या संयुक्त विद्यमाने आयोजित ‘पुणे पुस्तक महोत्सव 2025’ यंदा 13 ते 21 डिसेंबरदरम्यान प्रसिद्ध फर्ग्युसन कॉलेज कॅम्पसमध्ये आयोजित करण्यात येणार आहे. उत्तर भारतातील पुस्तक मेलांसारखा मोठा आणि विविधतेने नटलेला हा उपक्रम पुण्यातील वाचनप्रेमींसाठी दरवर्षी आकर्षणाचा केंद्रबिंदू ठरतो. महोत्सवाचे हे तिसरे वर्ष असून, मागील दोन वर्षांपासून या महोत्सवाने शहरात वाचनसंस्कृती दृढ करण्यासाठी मोठे योगदान दिले आहे.

या वर्षीचा विशेष आकर्षण ठरणार आहे ‘शांतता पुणेकर वाचत आहेत’ हा उपक्रम. 9 डिसेंबर 2025 रोजी सकाळी 11 ते 12 या वेळेत शहरातील सर्व नागरिक, विद्यार्थी, शासकीय अधिकारी, कर्मचारी ते विविध संस्था—सर्वांनी स्वतःजवळ ठेवलेले आवडते पुस्तक वाचावे, असा अनोखा उपक्रम राबविण्यात येत आहे. या उपक्रमाची खासियत म्हणजे सहभागी होणाऱ्या प्रत्येकाला गिनीज वर्ल्ड रेकॉर्ड प्रयत्नाचा भाग होण्याची संधी मिळणार आहे. वाचनादरम्यान घेतलेला स्वतःचा फोटो निर्धारित QR कोडवर अपलोड करून नागरिक या प्रयत्नात सहभागी होऊ शकतात. जिल्हाधिकारी जितेंद्र डुडी यांनी पुणेकरांना आवाहन करत सांगितले की, “वाचनास प्रोत्साहन देणाऱ्या या उपक्रमात मोठ्या संख्येने सहभागी होऊन पुणेकरांनी आपला ठसा उमटवावा.”

पुणे पुस्तक महोत्सवात यंदाही विविध प्रकारचे साहित्य, चर्चासत्रे, सांस्कृतिक कार्यक्रम आणि कार्यशाळांची रेलचेल असणार आहे. महोत्सवात 800 पेक्षा जास्त पुस्तकांची दालने उभारली जाणार आहेत ज्यात मराठीसह सर्व भारतीय भाषांतील साहित्य उपलब्ध असेल. साहित्य, इतिहास, विज्ञान, बालसाहित्य, कादंबऱ्या, कविता, चरित्रे अशा विविध विषयांवरील पुस्तके वाचकांना एका ठिकाणी उपलब्ध होणार आहेत.

महोत्सवाचा सहा दिवसांचा लिटरेचर फेस्टिव्हल वाचकांसाठी विशेष आकर्षण ठरणार असून त्यात लेखकांशी संवाद, पुस्तक प्रकाशन समारंभ, साहित्यिक चर्चा आणि विचारमंथनाच्या कार्यक्रमांचा समावेश असणार आहे. या सहा दिवसांपैकी तीन दिवस मराठी साहित्यिक कार्यक्रमांसाठी विशेषतः राखीव ठेवण्यात आले आहेत. उर्वरित तीन दिवसांमध्ये हिंदी, कन्नड, उर्दू, तमिळ, बंगाली आणि इतर भारतीय भाषांतील साहित्यिक कार्यक्रम पार पडतील.

लेखकांसाठी तयार करण्यात आलेला ऑथर कॉर्नर हा यंदाही विशेष आकर्षण असणार आहे. यात नवीन पुस्तकांचे प्रकाशन, लेखकांशी प्रत्यक्ष संवाद, पुस्तकांमागील प्रेरणा आणि सर्जनशील प्रक्रियेवर चर्चा अशा अनेक उपक्रमांचा समावेश असेल. वाचकांना आपल्या आवडत्या लेखकांना भेटण्याची अनोखी संधी या कॉर्नरमुळे मिळणार आहे.

बालकांसाठी चिल्ड्रेन कॉर्नर उभारण्यात आले असून चित्रकला स्पर्धा, वक्तृत्व स्पर्धा, कथाकथन, क्रिएटिव्ह कार्यशाळा अशा अनेक उपक्रमांतून मुलांना पुस्तकांच्या विश्वाशी जोडण्याचा प्रयत्न केला जाणार आहे. या वर्षी जवळपास 70 नवीन पुस्तकांचे प्रकाशन होण्याची अपेक्षा आहे.

महोत्सवात रोज संध्याकाळी संगीत, नृत्य आणि विविध कलात्मक सादरीकरणांचे सांस्कृतिक कार्यक्रम आयोजित केले जाणार आहेत. तसेच “Joy of Reading” या विषयावर छायाचित्र स्पर्धा राबविण्यात येत आहे. वाचक आणि पर्यटकांसाठी 30 हून अधिक खाद्यपदार्थांचे स्टॉल्सही उपलब्ध असणार आहेत.

वाचनाचे महत्त्व, पुस्तकांची आवड आणि सांस्कृतिक देवाणघेवाण यांना मोठा व व्यापक व्यासपीठ देणारा हा महोत्सव पुण्यात पुन्हा एकदा पुस्तकप्रेमींचे आकर्षण ठरणार आहे.