दावोस येथे महाराष्ट्र सरकारचा २,५०० कोटींचा कृषी करार; स्मार्ट शेतीला मोठी चालना
दावोस येथे महाराष्ट्र सरकारचा २,५०० कोटींचा कृषी करार; स्मार्ट शेतीला मोठी चालना
दावोस येथील वर्ल्ड इकॉनॉमिक फोरममध्ये महाराष्ट्र सरकार, Rural Enhancers Group आणि Nutrifresh Farm Tech यांच्यात २,५०० कोटींचा ऐतिहासिक कृषी MoU झाला असून स्मार्ट व हवामान-संवेदनशील शेतीला गती मिळणार आहे.
पुणे 22 जानेवारी २०२६ : दावोस येथे सुरू असलेल्या वर्ल्ड इकॉनॉमिक फोरममध्ये महाराष्ट्र सरकारने कृषी क्षेत्रासाठी एक ऐतिहासिक पाऊल उचलत सुमारे २,५०० कोटी रुपयांचा सामंजस्य करार केला आहे. Rural Enhancers Group आणि Nutrifresh Farm Tech India Pvt. Ltd. यांच्यासोबत झालेला हा करार मुख्यमंत्री देवेंद्र फडणवीस यांच्या उपस्थितीत पार पडला. दावोस येथे प्रथमच कृषी क्षेत्रावर केंद्रित असा मोठ्या प्रमाणावरील करार करण्यात आला असून, महाराष्ट्रातील शेतीच्या भविष्यासाठी हा करार मैलाचा दगड ठरणार आहे.
या सामंजस्य करारावर Rural Enhancers Group चे व्यवस्थापकीय संचालक आणि मुख्य कार्यकारी अधिकारी अंबर आयाडे तसेच Nutrifresh Farm Tech India Pvt. Ltd. चे मुख्य कार्यकारी अधिकारी संकेत मेहता यांनी स्वाक्षऱ्या केल्या. हा प्रकल्प एप्रिल २०२६ पासून प्रत्यक्षात सुरू होणार असून, आधुनिक तंत्रज्ञान, हवामान-संवेदनशील पद्धती आणि स्मार्ट शेतीच्या संकल्पनेवर आधारित असेल. या उपक्रमातून महाराष्ट्रात शाश्वत आणि तंत्रज्ञानाधारित कृषी व्यवस्थेला बळ मिळणार आहे.
Nutrifresh Farm Tech ही भारतातील आघाडीची Controlled Environment Agriculture (CEA) कंपनी असून, कृत्रिम बुद्धिमत्ता (AI) आणि इंटरनेट ऑफ थिंग्स (IoT) आधारित तंत्रज्ञानाचा वापर करून सुरक्षित, सातत्यपूर्ण आणि उच्च दर्जाचे कृषी उत्पादन देण्यासाठी ओळखली जाते. २०१९ मध्ये पुण्यात गणेश निकम आणि संकेत मेहता यांनी स्थापन केलेल्या या कंपनीने २०२८ पर्यंत २,००० एकरांपर्यंत विस्तार करण्याचे उद्दिष्ट ठेवले असून, वार्षिक २५० दशलक्ष अमेरिकन डॉलर्स महसूल मिळवण्याचे लक्ष्य आहे. सध्या कंपनीकडे ५० हून अधिक उत्पादने असून, ती भारतातील १५ पेक्षा अधिक राज्यांमध्ये तसेच आंतरराष्ट्रीय बाजारपेठेत कार्यरत आहे.
या करारानुसार Rural Enhancers Group ही संस्था निधी पुरवठा आणि प्रकल्प एकत्रीकरणाची जबाबदारी सांभाळणार आहे, तर महाराष्ट्र सरकार धोरणात्मक, संस्थात्मक आणि अंमलबजावणीसाठी आवश्यक पाठबळ देणार आहे. या प्रकल्पासाठी संमिश्र वित्तपुरवठा रचना वापरण्यात येणार असून, यामध्ये यूएईमधील वित्तीय संस्था, भारतीय सार्वजनिक क्षेत्रातील बँका, विकास वित्त संस्था आणि परदेशी बँकांचा सहभाग असणार आहे.
या उपक्रमामुळे मोठ्या प्रमाणावर थेट आणि अप्रत्यक्ष रोजगारनिर्मिती होणार असून, हवामान बदलाशी सुसंगत शेती पद्धतींचा प्रसार होईल. कृषी पर्यटनाला चालना, महिलांचे सक्षमीकरण आणि शेतकऱ्यांच्या उत्पन्नात लक्षणीय वाढ हे या प्रकल्पाचे महत्त्वाचे परिणाम असतील. संरचित प्रशिक्षण कार्यक्रम आणि निश्चित बाजारपेठ उपलब्ध करून दिल्यामुळे शेतकऱ्यांच्या जीवनमानात दीर्घकालीन सकारात्मक बदल घडून येईल, असा विश्वास व्यक्त करण्यात आला आहे.
Rural Enhancers Group सध्या आरोग्य, अन्न व कृषी, बंदरे व सागरी पायाभूत सुविधा, माहिती तंत्रज्ञान आणि शिक्षण अशा विविध क्षेत्रांत सक्रिय आहे. दावोस येथे झालेला हा करार केवळ गुंतवणुकीपुरता मर्यादित न राहता, महाराष्ट्राच्या कृषी क्षेत्राला जागतिक स्तरावर नेणारा ठरणार आहे. आधुनिक तंत्रज्ञान आणि सरकारी पाठबळ यांच्या समन्वयातून महाराष्ट्रातील शेती अधिक सक्षम, शाश्वत आणि उत्पन्नवर्धक बनेल, अशी अपेक्षा व्यक्त केली जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
