शिंदे गटाचा जळगाव नेता संजय लोटन पाटील रहस्यमयरित्या गायब; राजकीय वर्तुळात खळबळ
शिंदे गटाचा जळगाव नेता संजय लोटन पाटील रहस्यमयरित्या गायब; राजकीय वर्तुळात खळबळ
जळगाव ग्रामीण विधानसभा क्षेत्रप्रमुख आणि शिंदे गटाचे नेते संजय लोटन पाटील रहस्यमयरित्या बेपत्ता. शेवटचे रेल्वे स्टेशनवर दिसले, मोबाईल बंद; पोलिसांकडून कसून शोध सुरू.
सायली मेमाणे
पुणे ५ सप्टेंबर २०२५ : जळगाव जिल्ह्यातून एक धक्कादायक बातमी समोर आली आहे. शिवसेना शिंदे गटाचे जळगाव ग्रामीण विधानसभा क्षेत्रप्रमुख संजय लोटन पाटील हे रहस्यमयरित्या बेपत्ता झाले असून या घटनेमुळे संपूर्ण राजकीय वर्तुळात खळबळ उडाली आहे. पाटील हे पालकमंत्री गुलाबराव पाटील यांचे निकटवर्तीय मानले जातात. ते अचानक बेपत्ता झाल्याने त्यांच्या कुटुंबीयांमध्ये प्रचंड चिंता आहे.
मिळालेल्या माहितीनुसार, संजय पाटील हे काही दिवसांपूर्वी घरातून बाहेर पडले होते. ते गावाकडे जात असल्याचे सांगून ते घरातून निघाले होते, मात्र परतलेच नाहीत. यानंतर बराच वेळ त्यांच्याशी संपर्क साधण्याचा प्रयत्न करण्यात आला पण दोन्ही मोबाईल फोन बंद असल्याने त्यांचा थांगपत्ता लागला नाही. अखेर त्यांच्या कुटुंबीयांनी पोलिस ठाण्यात धाव घेतली आणि तक्रार दाखल केली.
पोलिसांनी तपास सुरू करताच काही सीसीटीव्ही फुटेज मिळाले. त्यामध्ये पाटील हे शहरातील एका बँकेतून पैसे काढताना दिसले. त्यानंतर ते कोर्ट चौक परिसरातही दिसून आले होते. मात्र त्यानंतर त्यांचा काहीही पत्ता लागलेला नाही. विशेष म्हणजे ते शेवटचे जळगाव रेल्वे स्थानकावर अयोध्या जाणाऱ्या रेल्वेत बसताना दिसल्याचे काही सूत्रांनी सांगितले आहे. यानंतर मात्र ते कुठे गेले, कोणाकडे गेले याबाबत अजूनही कोणतीही खात्रीशीर माहिती उपलब्ध नाही.
या प्रकरणामुळे शिंदे गटात आणि जळगावच्या राजकीय वर्तुळात खळबळ उडाली आहे. विधानसभा निवडणुकीच्या पार्श्वभूमीवर हे गायब होण्याचे प्रकरण अधिकच गडद होत आहे. कारण संजय लोटन पाटील यांना एकनाथ शिंदे गटाकडून महत्त्वाची जबाबदारी देण्यात आली होती. ते मूळचे धरणगाव तालुक्यातील दोनगावचे रहिवासी असून सध्या धुळे येथे वास्तव्यास होते. त्यांच्या गायब होण्यामागे नेमके काय कारण आहे, हे अजून स्पष्ट झालेले नाही.
पोलिसांकडून मात्र कसून तपास सुरू आहे. विविध सीसीटीव्ही फुटेज, मोबाईल लोकेशन तपासले जात आहेत. पोलिसांनी त्यांच्या संपर्कातील काही लोकांनाही चौकशीसाठी बोलावले आहे. पाटील हे स्वतःहून कुठे निघून गेले की, यामागे अन्य काही कारण दडलेले आहे, याचा तपास सुरू आहे. राजकीय वर्तुळातही या घटनेबाबत विविध तर्क-वितर्क लावले जात आहेत.
संजय पाटील यांच्या गायब होण्याची बातमी पसरताच जळगाव शहर आणि जिल्ह्यात खळबळ उडाली आहे. त्यांचे कुटुंबीय प्रचंड चिंतेत असून त्यांच्या सुरक्षिततेबाबत प्रश्नचिन्ह निर्माण झाले आहे. पोलिसांनी त्यांच्या शोधासाठी विशेष पथक नेमले आहे.
हे प्रकरण आता केवळ कौटुंबिक किंवा वैयक्तिक स्वरूपाचे राहिलेले नाही, तर यात राजकीय रंगही चढला आहे. शिंदे गटातील महत्त्वाच्या नेत्याचा अशा प्रकारे बेपत्ता होणे हे निश्चितच गंभीर मानले जात आहे. पुढील काही दिवसांत या तपासातून नेमकी काय सत्यता बाहेर येते, याकडे सर्वांचे लक्ष लागले आहे.
