सोलापूर हादरले : उपसरपंच गोविंद बर्गे आत्महत्या की घातपात? नर्तिकेवर गुन्हा दाखल
सोलापूर हादरले : उपसरपंच गोविंद बर्गे आत्महत्या की घातपात? नर्तिकेवर गुन्हा दाखल
सोलापूरच्या सासुरे गावात उपसरपंच गोविंद बर्गे यांनी कारमध्ये गोळी झाडून आत्महत्या केली. मात्र कुटुंबीयांनी हा प्रकार घातपात असल्याचा आरोप करत नर्तिका पूजा गायकवाडवर गुन्हा दाखल केला आहे. पोलिस तपास सुरू.
सायली मेमाणे
पुणे ११ सप्टेंबर २०२५ : सोलापूर जिल्ह्यातील सासुरे गावात घडलेली एक घटना सध्या चर्चेचा विषय ठरली आहे. गावचे उपसरपंच गोविंद बर्गे यांनी आपल्या कारमध्ये गोळी झाडून आत्महत्या केल्याची माहिती समोर आली. मात्र, हा प्रकार आत्महत्या नसून घातपात असल्याचा गंभीर आरोप त्यांच्या नातेवाईकांनी केला आहे. या प्रकरणात 21 वर्षीय नर्तिका पूजा गायकवाड हिच्याविरोधात पोलिसांनी गुन्हा दाखल केला आहे.
घटनेनंतर पोलिसांनी घटनास्थळी पंचनामा करून तपास सुरू केला आहे. उपसरपंचाच्या भाच्याने माध्यमांसमोर केलेल्या वक्तव्यात, “मामा निर्व्यसनी होते, त्यांच्या जवळ पिस्तूल नव्हते. कारमध्ये ठेवलेल्या दारूच्या बाटल्याही मुद्दाम ठेवल्या आहेत. ही आत्महत्या नसून घातपात आहे,” असे सांगितले. या वक्तव्यामुळे घटनेला नवा वळण मिळाले आहे.
नातेवाईकांच्या मते, गेल्या सहा महिन्यांपासून गोविंद बर्गे यांना मानसिक छळ सहन करावा लागत होता. पूजा गायकवाडकडून सतत ब्लॅकमेल केले जात होते. “गेवराईतील प्लॉट नावावर कर, अन्यथा गंभीर गुन्ह्यात अडकवीन,” अशी धमकी दिल्याचा आरोप करण्यात आला आहे. त्यामुळे बर्गे यांच्यावर प्रचंड मानसिक ताण निर्माण झाला होता.
मृत उपसरपंचाने पूजाला सोन्याचे दागिने आणि लाखो रुपयांचा मोबाईल गिफ्ट केल्याचे उघड झाले आहे. मात्र, त्यानंतर तिने गेवराईतील आलिशान घर आणि शेती नावावर करण्याची मागणी केली होती. यासंदर्भात कुटुंबीयांनी आरोप केला आहे की, फक्त दहा दिवसांपूर्वीच या घराची वास्तुशांती झाली होती आणि त्यानंतरपासून बर्गे प्रचंड दबावाखाली होते.
दोघांची ओळख दीड वर्षांपूर्वी एका कला केंद्रात झाली होती. ओळखीचे नाते लवकरच मैत्रीत आणि त्यानंतर प्रेमसंबंधात रूपांतरित झाले. या नात्यात बर्गे यांनी पूजावर भरपूर खर्च केला, परंतु मागील काही महिन्यांत दोघांमध्ये दुरावा निर्माण झाला. पूजाने घर व शेती नावावर करण्यासाठी दबाव आणल्याचे सांगितले जाते. इतकेच नव्हे तर नकार दिल्यास “बलात्काराचा गुन्हा दाखल करीन” अशी धमकी दिल्याचा आरोपही नातेवाईकांनी केला आहे.
या सर्व घडामोडींनंतर बर्गे यांचा मृतदेह कारमध्ये सापडला. प्राथमिक तपासात गोळीबारामुळे मृत्यू झाल्याचे स्पष्ट झाले, मात्र आत्महत्या की घातपात हा प्रश्न अद्याप अनुत्तरित आहे. पोलिसांनी घटनास्थळीून पुरावे गोळा करून तपास सुरू केला असून, पूजावर दाखल झालेल्या गुन्ह्यामुळे चौकशीला वेगळे वळण मिळाले आहे.
सध्या या घटनेमुळे संपूर्ण परिसरात खळबळ उडाली असून, राजकीय वर्तुळातही या घटनेची जोरदार चर्चा सुरू आहे. पोलिसांचा तपास पूर्ण होईपर्यंत ही आत्महत्या होती की घातपात, याविषयी निश्चितपणे काही सांगता येणार नाही. मात्र, उपसरपंचाच्या अचानक झालेल्या मृत्यूमुळे सोलापूर जिल्ह्यात हळहळ व्यक्त होत आहे.
