दिवाळी धक्का! ST महामंडळाचा 10% भाडेवाढीचा निर्णय, प्रवाशांच्या खिशाला फटका
दिवाळी धक्का! ST महामंडळाचा 10% भाडेवाढीचा निर्णय, प्रवाशांच्या खिशाला फटका
महाराष्ट्र राज्य परिवहन महामंडळाने दिवाळीपूर्वी एसटी बसचे भाडे 10% ने वाढवले. 15 ऑक्टोबर ते 5 नोव्हेंबर दरम्यान लागू होणाऱ्या या भाडेवाढीचा फटका लाखो प्रवाशांना बसणार आहे.
सायली मेमाणे
पुणे ३० सप्टेंबर २०२५ : मुंबई : महाराष्ट्रातील सर्वसामान्यांच्या ‘लाल परी’ म्हणजेच एसटी बस प्रवास आता अधिक महाग होणार आहे. राज्य परिवहन महामंडळाने दिवाळीपूर्वी प्रवाशांच्या खिशाला मोठा फटका देणारा निर्णय घेतला आहे. 15 ऑक्टोबरपासून 5 नोव्हेंबरपर्यंत सर्वसामान्य प्रवासी वापरत असलेल्या एसटी बस प्रवासाच्या तिकिटांवर तब्बल 10 टक्के दरवाढ लागू केली जाणार आहे. विशेष म्हणजे वातानुकूलित शिवनेरी आणि शिवाई बससेवा वगळता ही दरवाढ सर्व गाड्यांवर लागू होणार आहे. त्यामुळे गावाकडे जाणाऱ्या प्रवाशांपासून ते रातराणीने प्रवास करणाऱ्यांपर्यंत सर्वांना या भाडेवाढीचा परिणाम भोगावा लागणार आहे.
सणासुदीच्या काळात एसटी बस प्रवासाला मोठ्या प्रमाणात मागणी असते. लाखो प्रवासी आपल्या गावी दिवाळी साजरी करण्यासाठी एसटी बसने प्रवास करतात. खासगी वाहने वाढली असली तरी सुरक्षित आणि किफायतशीर म्हणून एसटी बस प्रवासाची निवड करणाऱ्यांची संख्या अजूनही मोठी आहे. परंतु या निर्णयामुळे दिवाळीचा प्रवास सर्वसामान्यांसाठी अधिक खर्चिक होणार आहे. उदाहरणार्थ, जिथे आधी प्रवासाचे तिकीट 100 रुपये होते, तिथे आता 110 रुपये आकारले जाणार आहेत. या वाढीमुळे ग्रामीण भागातील शेतकरी, विद्यार्थी आणि नोकरीसाठी स्थलांतर करणारे प्रवासी यांना अतिरिक्त भार सहन करावा लागेल.
राज्यात गेल्या काही वर्षांत वारंवार दरवाढीचे निर्णय घेतले जात आहेत. याआधी 24 जानेवारी 2025 रोजी राज्य परिवहन प्राधिकरणाच्या बैठकीत जवळपास 15 टक्क्यांची भाडेवाढ लागू करण्यात आली होती. त्यावेळीही प्रवाशांच्या नाराजीला सामोरे जावे लागले होते. टॅक्सी आणि रिक्षा संघटनांकडूनही दरवाढीचे प्रस्ताव आले होते. आता पुन्हा दिवाळीपूर्वीच महामंडळाकडून भाडेवाढ करण्याचा निर्णय घेतल्याने प्रवाशांमध्ये तीव्र नाराजी आहे.
एसटी महामंडळाचे म्हणणे आहे की, वाढत्या इंधन दरांमुळे आणि देखभाल खर्चामुळे महसूल टिकवून ठेवण्यासाठी भाडेवाढ आवश्यक ठरली आहे. मात्र, आधीच अतिवृष्टीमुळे शेतकरी आर्थिक संकटात आहेत आणि रोजगारधंद्यावर मंदीचे सावट आहे. अशा वेळी दिवाळीच्या काळात प्रवास महागवाढीचा धक्का सर्वसामान्यांना बसल्याने नाराजीचा सूर अधिक तीव्र होऊ शकतो.
एसटी बसला महाराष्ट्राच्या जीवनवाहिनीचा दर्जा मिळालेला आहे. रोज लाखो प्रवासी कामासाठी, शिक्षणासाठी, तसेच गावी जाण्यासाठी या बसवर अवलंबून असतात. सार्वजनिक वाहतुकीच्या या महत्त्वाच्या साधनावर सातत्याने दरवाढ होत असल्याने सामान्य जनतेचा ताण वाढत आहे. सणासुदीच्या काळात प्रवाशांनी सुरक्षिततेसाठी खासगी वाहनांपेक्षा एसटी बसची निवड करावी असा संदेश प्रशासनाकडून वारंवार दिला जातो, परंतु सततच्या दरवाढीमुळे अनेक जण प्रवास टाळण्याची किंवा पर्यायी साधनांचा विचार करण्याची शक्यता आहे.
या निर्णयानंतर राज्यभरात मोठी चर्चा सुरू झाली असून एसटी महामंडळाने हा निर्णय तात्काळ मागे घ्यावा अशी मागणीही पुढे येत आहे. दिवाळीसारख्या सणात नागरिकांच्या खिशाला धक्का देणारा निर्णय योग्य नाही, अशी टीकाही होत आहे. मात्र, प्रशासनाकडून भाडेवाढीची अंमलबजावणी निश्चित असून ठरलेल्या तारखांमध्ये 10 टक्के जादा भाडे आकारले जाणार आहे. यामुळे दिवाळीचा आनंद साजरा करण्यासाठी गावी जाणाऱ्या लाखो प्रवाशांना या अतिरिक्त खर्चाचा सामना करावा लागणार आहे.
