Vasai Crime News : वसईतून तब्बल 8 कोटींचे हेरॉईन जप्त, राजस्थानातील 3 आरोपी अटकेत
वसईतून तब्बल 8 कोटींचे हेरॉईन जप्त, राजस्थानातील 3 आरोपी अटकेत
वसईत विरार क्राईम ब्रँचने मोठी कारवाई करत 8 कोटी रुपयांचे हेरॉईन जप्त केले. राजस्थानातील तीन आरोपींना अटक करून एनडीपीएस कायद्यांतर्गत गुन्हा दाखल करण्यात आला आहे.
सायली मेमाणे
पुणे १३ सप्टेंबर २०२५ : वसईतून अमली पदार्थ विरोधी कारवाईत पोलिसांनी मोठे यश मिळवले आहे. विरार क्राईम ब्रँच युनिट 3 ने फादरवाडी परिसरात सापळा रचून तब्बल 8 कोटी रुपयांचे हेरॉईन जप्त केले. या कारवाईत राजस्थानातील तिन्ही आरोपींना अटक करण्यात आली आहे. या घटनेने संपूर्ण वसई-विरार परिसरात खळबळ उडाली आहे.
अटक करण्यात आलेल्या आरोपींची नावे समुंदरसिंग देवडा (वय 49), युवराजसिंग राठोड (वय 28) आणि तकतसिंग राजपूत (वय 38) अशी आहेत. हे तिघेही राजस्थानातील जोधपूर आणि सिरोही जिल्ह्यातील रहिवासी आहेत. पोलिसांनी मिळालेल्या गुप्त माहितीच्या आधारे फादरवाडी-रेंजनाका रस्त्यावरील श्रीपाल टॉवर येथे कारवाई केली. आरोपी अमली पदार्थ विक्रीसाठी येणार असल्याची खात्री झाल्यानंतर पथकाने सापळा रचला आणि त्यांना ताब्यात घेतले.
या कारवाईदरम्यान पोलिसांनी 2 किलो 11 ग्रॅम वजनाचे हेरॉईन जप्त केले असून त्याची आंतरराष्ट्रीय बाजारभावानुसार किंमत तब्बल 8 कोटी 4 लाख 40 हजार रुपये इतकी आहे. याशिवाय आरोपींकडून 5 लाख 65 हजार रुपये किमतीची चारचाकी गाडीही जप्त करण्यात आली. एकूण 8 कोटी 10 लाख 5 हजार रुपयांचा मुद्देमाल पोलिसांनी ताब्यात घेतला आहे.
या तिन्ही आरोपींना अटक करून त्यांच्यावर वालीव पोलीस ठाण्यात एनडीपीएस कायद्यांतर्गत गुन्हा दाखल करण्यात आला आहे. अटक केलेल्या आरोपींना वसई न्यायालयात हजर करण्यात आले असता, न्यायालयाने त्यांना सोमवारपर्यंत पोलिस कोठडी सुनावली आहे. पोलिस सध्या या प्रकरणाचा पुढील तपास करत असून आरोपींचा मोठा गुन्हेगारी नेटवर्कशी संबंध असल्याचा संशय व्यक्त केला जात आहे.
ही कारवाई विरार क्राईम ब्रँच युनिट 3 चे पोलीस निरीक्षक शाहूराज रणवरे, सहाय्यक पोलीस निरीक्षक सुहास कांबळे आणि त्यांच्या पथकाने केली आहे. पोलिसांच्या या यशस्वी कारवाईमुळे वसई-विरार परिसरातील अमली पदार्थ विक्रेत्यांमध्ये मोठी दहशत निर्माण झाली आहे.
अलीकडील काळात मुंबईसह परिसरात अमली पदार्थांचे जाळे मोठ्या प्रमाणात सक्रिय असल्याचे पोलिसांच्या तपासातून समोर आले आहे. तरुण पिढीला लक्ष्य करून अमली पदार्थ विक्रीचे व्यवहार वाढत आहेत. त्यामुळे अशा प्रकारच्या कारवायांना आळा घालणे अत्यंत गरजेचे आहे. विरार क्राईम ब्रँचच्या या धाडसी कारवाईमुळे पोलिसांनी पुन्हा एकदा अमली पदार्थांच्या तस्करांना धडा शिकवला आहे.
या प्रकरणामुळे अमली पदार्थांच्या आंतरराज्यीय रॅकेटचा मागोवा घेण्यास पोलिसांना महत्त्वाचे धागेदोरे मिळण्याची शक्यता आहे. तपासातून आणखी आरोपींवर कारवाई होण्याची शक्यता नाकारता येत नाही. वसईतील ही कारवाई केवळ स्थानिक स्तरावरच नव्हे तर राज्यभर चर्चेचा विषय ठरत आहे.
