Vidarbha Municipal Election: विदर्भातील चारही महानगरपालिकांत महायुतीचा निर्णय; उद्या संध्याकाळपर्यंत जागावाटप जाहीर होणार

विदर्भातील अकोला, अमरावती, नागपूर आणि चंद्रपूर महानगरपालिकांसाठी महायुतीतून निवडणूक लढण्याचा निर्णय. सुधीर मुनगंटीवार व हंसराज अहिर यांच्या नेतृत्वाखाली नियोजनबद्ध तयारी.

पुणे २६ डिसेंबर २०२५ : विदर्भातील आगामी महानगरपालिका निवडणुकांच्या पार्श्वभूमीवर भारतीय जनता पार्टी आणि महायुतीने एक महत्त्वाचा निर्णय घेतला असून अकोला, अमरावती, नागपूर आणि चंद्रपूर या चारही महानगरपालिकांमध्ये महायुतीतून निवडणूक लढवली जाणार आहे. आज पार पडलेल्या भाजप–महायुतीच्या महत्त्वपूर्ण बैठकीनंतर ही माहिती भाजप नेते आणि मंत्री चंद्रशेखर बावनकुळे यांनी माध्यमांशी बोलताना दिली. उद्या संध्याकाळपर्यंत किंवा उशिरा तर 27 तारखेपर्यंत चारही महानगरपालिकांसाठी जागावाटपाची अधिकृत यादी जाहीर केली जाईल, असे त्यांनी स्पष्ट केले.

या बैठकीला शिवसेनेच्या वतीने उदय सामंत, संजय राठोड आणि आशिष जयस्वाल हे मंत्री उपस्थित होते. त्याचबरोबर अकोला, अमरावती, नागपूर आणि चंद्रपूर जिल्ह्यांतील समन्वयाची जबाबदारी दिलेले शिवसेनेचे सर्व प्रमुख नेतेही या बैठकीत सहभागी झाले होते. सुमारे तीन तास चाललेल्या या बैठकीत प्रत्येक महानगरपालिकेतील राजकीय परिस्थिती, स्थानिक समीकरणे आणि उमेदवार निवडीवर सविस्तर चर्चा झाली. काही ठिकाणी सखोल आणि खमंग चर्चा झाल्या, मात्र कोणतीही शाब्दिक चकमक झाली नसल्याचे बावनकुळे यांनी ठामपणे सांगितले.

चंद्रशेखर बावनकुळे यांच्या म्हणण्यानुसार, अकोला महानगरपालिकेत राष्ट्रवादी काँग्रेससोबत युती होण्याची शक्यता आहे. अमरावतीत रवी राणा यांचा स्वाभिमानी पक्ष महायुतीसोबत येणार असल्याचे जवळपास निश्चित झाले आहे. चंद्रपूरमध्ये अजित पवार यांच्या राष्ट्रवादीसोबत युती होण्याची चिन्हे असून तेथे समन्वयाने जागावाटप झाल्याचा दावा त्यांनी केला. नागपूरमध्ये भाजप आणि शिवसेना यांच्यात महायुतीचा निर्णय झाला असला तरी राष्ट्रवादीसोबत अद्याप चर्चा पूर्ण झालेली नाही, असेही त्यांनी नमूद केले.

या संपूर्ण निवडणूक प्रक्रियेचे नियोजन आणि मार्गदर्शन माजी मंत्री सुधीर मुनगंटीवार करणार आहेत. त्यांच्या नेतृत्वाखाली संघटनात्मक पातळीवर शिस्तबद्ध, नियोजनबद्ध आणि प्रभावी निवडणूक राबवली जाईल, असा विश्वास पक्षाने व्यक्त केला आहे. माजी मंत्री हंसराज अहिर यांची निरीक्षक म्हणून नियुक्ती करण्यात आली असून ते संपूर्ण निवडणूक प्रक्रियेवर लक्ष ठेवणार आहेत. निवडणुकीचे प्रभारी म्हणून अशोक नेते यांच्याकडे जबाबदारी देण्यात आली आहे, तर निवडणूक प्रमुख म्हणून किशोर जोरगेवार काम पाहणार आहेत. दैनंदिन निवडणूक कामकाजाची जबाबदारी चैनसुख संचेती यांच्याकडे सोपवण्यात आली आहे.

बावनकुळे यांनी यावेळी स्पष्ट केले की, भाजपमध्ये प्रत्येकाला आपले मत मांडण्याचा पूर्ण अधिकार आहे. काही ठिकाणी वेगवेगळी मते होती, मात्र अखेरीस पक्ष जो निर्णय घेईल तो सर्वांना मान्य असेल, यावर सर्वांचे एकमत झाले आहे. प्रत्येक निवडणूक वेगळी असते, उमेदवार वेगळे असतात आणि अजेंडा देखील वेगळा असतो, असे सांगत त्यांनी या महानगरपालिका निवडणुकीसाठी महायुतीचा अजेंडा विकासकेंद्रित आणि लोकाभिमुख असेल, असे सूचित केले.

चंद्रपूर महानगरपालिकेत भाजपचा महापौर बसावा आणि भाजपचे सरकार यावे यासाठी विशेष प्रयत्न केले जात असल्याचे त्यांनी सांगितले. सुधीर मुनगंटीवार यांच्या नेतृत्वामागे केंद्रीय नेतृत्व, राज्य नेतृत्व, नितीन गडकरी आणि मुख्यमंत्री यांचा ठाम पाठिंबा असल्याने त्यांच्या नेतृत्वावर कोणतीही शंका घेण्याचे कारण नाही, असेही बावनकुळे म्हणाले. एकूणच, विदर्भातील चारही महानगरपालिकांमध्ये महायुती एकत्रितपणे आणि ताकदीने निवडणूक लढवणार असल्याचे स्पष्ट संकेत या बैठकीतून मिळाले आहेत.