जागतिक अॅथलेटिक्स अजिंक्यपद अंतिम सामना: सचिन यादवने 86.27 मीटर फेकीसह नीरज चोप्राला मागे टाकले; नीरज 8 व्या स्थानावर
जागतिक अॅथलेटिक्स अजिंक्यपद अंतिम सामना: सचिन यादवने 86.27 मीटर फेकीसह नीरज चोप्राला मागे टाकले; नीरज 8 व्या स्थानावर
जागतिक अॅथलेटिक्स अजिंक्यपद 2025: भारताचा सचिन यादव 86.27 मीटरच्या शानदार फेकीसह 4 थ्या स्थानावर, तर नीरज चोप्रा 8 व्या स्थानावर घसरला. अर्शद नदीम 7 व्या क्रमांकावर, अँडरसन पीटर्स 87.38 मीटरसह आघाडीवर.
सायली मेमाणे
पुणे १८ सप्टेंबर २०२५ : जागतिक अॅथलेटिक्स अजिंक्यपद स्पर्धेच्या अंतिम फेरीत भालाफेकच्या मैदानावर भारत आणि पाकिस्तान पुन्हा एकदा आमनेसामने आले आहेत. टोकियो येथे सुरू असलेल्या या स्पर्धेत भारताचे स्टार खेळाडू नीरज चोप्रा आणि सचिन यादव तसेच पाकिस्तानचा अर्शद नदीम यांच्यात रंगलेली कडवी झुंज क्रीडाप्रेमींच्या उत्सुकतेचा विषय ठरली आहे. अंतिम फेरीत जगातील अव्वल १२ खेळाडूंना संधी मिळाली असून यात भारताचे दोन खेळाडू सहभागी झाले आहेत.
फेरीच्या सुरुवातीला नीरज चोप्राने ८३.६५ मीटरचा थ्रो करत आघाडी घेतली होती, मात्र काही वेळातच पाकिस्तानच्या अर्शद नदीमने ८२.७३ मीटरचा फेक करून त्याच्यावर दबाव टाकला. यानंतर भारताच्या सचिन यादवने अप्रतिम कौशल्य दाखवत ८६.२७ मीटरचा थ्रो केला आणि नीरजसह अर्शद दोघांनाही मागे टाकले. या कामगिरीनंतर सचिन चौथ्या क्रमांकावर पोहोचला आहे, तर नीरज आठव्या स्थानावर घसरला आहे. नदीम सातव्या स्थानावर आहे. ग्रेनाडाचा अँडरसन पीटर्सने ८७.३८ मीटरचा दमदार थ्रो करत आघाडी मिळवली आहे.
पात्रता फेरी एक दिवस आधी झाली होती, ज्यामध्ये ८४.५० मीटरपेक्षा जास्त थ्रो करणाऱ्याला थेट अंतिम फेरीसाठी पात्र ठरण्याची संधी मिळाली. नीरज चोप्राने पहिल्याच प्रयत्नात ८४.८५ मीटरचा शानदार थ्रो करून अंतिम फेरी गाठली होती. अर्शद नदीमने मात्र पहिल्या दोन प्रयत्नांत निराशा केली, त्याचा पहिला थ्रो ७६.९९ मीटर आणि दुसरा थ्रो ७४.१७ मीटरवर थांबला. अखेर तिसऱ्या प्रयत्नात त्याने ८२.८० मीटर फेकून अंतिम फेरी गाठली. भारताचा सचिन यादव ८३.६७ मीटरच्या सर्वोत्तम थ्रोमुळे टॉप १२ मध्ये प्रवेश मिळवला.
नीरज चोप्रा हा या स्पर्धेचा गतविजेता आहे. २०२३ मध्ये हंगेरी येथे झालेल्या जागतिक अजिंक्यपद स्पर्धेत त्याने ८८.१७ मीटर फेकून सुवर्णपदक पटकावले होते. त्याचवेळी पाकिस्तानच्या अर्शद नदीमने पॅरिस ऑलिंपिकमध्ये ९२.९७ मीटरचा विक्रमी थ्रो करून सुवर्णपदक जिंकले होते, तर नीरजला रौप्यपदकावर समाधान मानावे लागले होते. त्यामुळे यंदाची ही अंतिम फेरी भारत-पाकिस्तानच्या खेळाडूंसाठी प्रतिष्ठेची लढत ठरत आहे.
अंतिम फेरीचे स्वरूपही अत्यंत रोमांचक आहे. एकूण १२ पात्र खेळाडूंना सहा प्रयत्न मिळतात. पहिल्या तीन प्रयत्नांनंतर स्पर्धकांची संख्या कमी होत जाते आणि शेवटी फक्त आठ खेळाडू पुढे जातात. यानंतर उर्वरित खेळाडूंना आणखी तीन थ्रो करण्याची संधी मिळते. या सहा प्रयत्नांतील सर्वोत्तम थ्रोवर अंतिम पदकाचा निर्णय घेतला जातो.
भारतातील क्रीडाप्रेमींच्या नजरा नीरज चोप्रावर खिळल्या होत्या, मात्र त्याचा पहिला थ्रो पुरेसा दमदार ठरला नाही. सध्या तो आठव्या स्थानावर आहे. दुसरीकडे सचिन यादवची कामगिरी उल्लेखनीय ठरली आहे. ८६.२७ मीटरच्या दमदार थ्रोमुळे त्याने पदकाच्या आशा जिवंत ठेवल्या आहेत. ग्रेनाडाचा अँडरसन पीटर्स आघाडीवर असला तरी सचिन यादव पुढील प्रयत्नांमध्ये अजून चांगली कामगिरी करून भारताला पदक मिळवून देऊ शकेल अशी आशा व्यक्त केली जात आहे.
भारत आणि पाकिस्तानमधील ही स्पर्धा पारंपरिक प्रतिस्पर्ध्याची छटा दाखवत आहे. भालाफेकच्या मैदानावर दोन्ही देशांचे स्टार खेळाडू सर्वोच्च स्थानासाठी झुंज देत आहेत. अंतिम फेरीचा निकाल क्रीडाप्रेमींच्या अपेक्षेप्रमाणे ऐतिहासिक ठरणार का, हे काही तासांत स्पष्ट होईल.
