ताडोबा-अंधारी व्याघ्रप्रकल्पातील सफारी महागली! नवीन दर आणि नियम पर्यटकांसाठी लागू
ताडोबा व्याघ्रप्रकल्पातील सफारी दरात मोठी वाढ
ताडोबा व्याघ्रप्रकल्पातील कोअर व बफर झोनमध्ये सफारी दरात मोठी वाढ झाली आहे. १ ऑक्टोबरपासून कोअर झोनसाठी नवीन दर लागू होणार आहेत. जाणून घ्या किती पैसे मोजावे लागतील.
सायली मेमाणे
पुणे २८ जून २०२५ : ताडोबा-अंधारी व्याघ्रप्रकल्पातील सफारी दरात मोठी वाढ करण्यात आली आहे. कोअर झोन आणि बफर झोनमध्ये फेरफटका मारणाऱ्या पर्यटकांना आता नव्या दरांनुसार हजारोंचे अतिरिक्त शुल्क मोजावे लागणार आहे. येत्या १ जुलैपासून कोअर झोन मान्सूनमुळे बंद होणार असून, १ ऑक्टोबरपासून हा झोन पुन्हा सुरू होईल. त्यानंतर कोअर झोनसाठी आठवड्याच्या इतर दिवशी सफारीसाठी ८,८०० रुपये, शनिवार-रविवार व सार्वजनिक सुट्टीसाठी १२,८०० रुपये मोजावे लागतील. ही किंमत ६० ते १२० दिवस आधी बुकिंग करणाऱ्यांसाठी आहे. जर बुकिंग १ ते ५९ दिवस आधी केलं गेलं, तर त्यासाठी सोमवार ते शुक्रवार दरम्यान ५,८०० रुपये आणि शनिवार, रविवारसाठी ६,८०० रुपये इतका खर्च येईल. बफर झोनमध्येही १ जुलैपासून दरवाढ लागू होणार असून आठवड्याच्या दिवसांमध्ये सफारीसाठी ६,००० रुपये आणि शनिवार, रविवार व सुट्टीच्या दिवशी ७,००० रुपये शुल्क आकारले जाणार आहे. ताडोबा व्याघ्रप्रकल्पाच्या कोअर झोनमध्ये पावसाळ्यात रस्ते खराब होतात, जंगलातील मातीचे मार्ग खराब होतात व जैवविविधतेवर दुष्परिणाम होऊ नये म्हणून कोअर क्षेत्रात फेरफटका करण्यास बंदी असते. मात्र बफर झोनमध्ये पर्यटन सुरू राहणार आहे. बफरमध्ये १६ गेट्स असून, पावसाच्या स्थितीच्या आधारे सफारीबाबत निर्णय घेतला जाईल. या अचानक दरवाढीमुळे स्थानिक मार्गदर्शक आणि रिसॉर्ट चालकांमध्ये नाराजी आहे. पर्यटन हंगाम सुरू होण्याआधीच अशी वाढ केल्यास पर्यटकांची संख्या घटण्याची भीती व्यक्त केली जात आहे. प्रशासनाने मात्र ही दरवाढ सुविधा, नियंत्रण खर्च आणि पर्यावरणीय व्यवस्थापन यासाठी आवश्यक असल्याचे स्पष्ट केले आहे. कोअर झोनच्या बुकिंगसाठी आता ६० दिवसांपूर्वीपासून तयारी करावी लागणार असून, तिकिटं मिळवण्यासाठी अधिक स्पर्धा वाढणार आहे. जंगल सफारीचा आनंद घेण्यास येणाऱ्यांसाठी ही दरवाढ एक आर्थिक झटका असला तरी वाघदर्शन आणि जैवविविधतेच्या प्रेमात पडलेले पर्यटक हे दर स्वीकारतील, अशी शक्यता वर्तवली जात आहे. दरवाढ असूनही ताडोबाची लोकप्रियता कायम राहील, मात्र स्थानिक पर्यटन व्यवसायावर त्याचा काय परिणाम होईल, याकडे लक्ष लागले आहे. ताडोबा व्याघ्रप्रकल्पात दरवर्षी देशी-विदेशी पर्यटकांची संख्या लक्षणीय असते. वाघ दर्शनाच्या आशेने हजारो पर्यटक येथे गर्दी करतात. अशावेळी अशा वाढीव शुल्कामुळे पर्यटकांचे नियोजन आणि खर्च यावर परिणाम होऊ शकतो. त्यामुळे वनपर्यटन क्षेत्राला चालना देतानाच स्थानिक पातळीवर संतुलन राखण्याचे आव्हान प्रशासनासमोर राहणार आहे.
Do-follow Links:
Instagram
YouTube
Facebook
Twitter
About The Author
