नऱ्हे दुचाकी पेटवण्याची घटना: सिद्धेश्वर सोसायटीत सात दुचाकी जळाल्या

नऱ्हे परिसरातील सिद्धेश्वर हाऊसिंग सोसायटीमध्ये दुचाकी पेटवण्याची घटना घडली. सात दुचाकी जळून खाक; सिंहगड पोलिस तपासात गुंतले.

सायली मेमाणे

पुणे ११ जून २०२५ : नऱ्हे दुचाकी पेटवण्याची घटना सोमवारी पहाटे पुण्यातील सिद्धेश्वर हाऊसिंग सोसायटीत घडली. अज्ञात व्यक्तीने सोसायटीच्या आवारात लावलेल्या सात दुचाकींना आग लावली. या घटनेने परिसरात भीतीचे वातावरण निर्माण झाले असून, सिंहगड पोलीस तपासात गुंतले आहेत.

या संदर्भात सागर पहलाज ललवाणी (वय ३२) यांनी सिंहगड पोलिस ठाण्यात फिर्याद दिली. ललवाणी हे सिद्धेश्वर हाऊसिंग सोसायटीमध्ये वास्तव्यास असून, पहाटेच्या सुमारास सोसायटीच्या पार्किंगमध्ये उभ्या असलेल्या दुचाकींना अचानक आग लागल्याचे काही रहिवाशांच्या निदर्शनास आले. त्यांनी तातडीने याची माहिती अग्निशमन दलास दिली.

दरम्यान, अग्निशमन दलाची गाडी घटनास्थळी पोहोचेपर्यंत रहिवाशांनीच पाणी ओतून आग आटोक्यात आणण्याचा प्रयत्न केला. मात्र, त्याआधीच सात दुचाकी पूर्णतः जळून खाक झाल्या होत्या. यामध्ये कोणत्याही व्यक्तीला इजा झाल्याची माहिती नाही, परंतु नुकसान मोठ्या प्रमाणावर झाले आहे.

सिंहगड पोलीस घटनास्थळी दाखल होताच त्यांनी परिसरातील सीसीटीव्ही कॅमेरे तपासायला सुरुवात केली आहे. सध्या आरोपीची ओळख पटलेली नसून, अज्ञात व्यक्तीविरुद्ध भादंवि कलमांखाली गुन्हा दाखल करण्यात आला आहे.

या नऱ्हे दुचाकी पेटवण्याच्या घटनेमुळे स्थानिक रहिवाशांमध्ये भीतीचे वातावरण आहे. सोसायटीत सुरक्षेच्या उपाययोजना करण्याची मागणी नागरिक करत आहेत. पोलीस याचा तपास गतीने करत असून, या कृत्यामागचे हेतू अजून स्पष्ट झालेले नाहीत.