प्रतीक्षानगरमध्ये सांडपाण्याचा पूर कोट्यवधींच्या ड्रेनेज कामावर प्रश्न, मनसेचा आंदोलनाचा इशारा
प्रतीक्षानगरमध्ये सांडपाण्याचा पूर कोट्यवधींच्या ड्रेनेज कामावर प्रश्न, मनसेचा आंदोलनाचा इशारा
सायनच्या प्रतीक्षानगरमध्ये पाऊस थांबल्यानंतरही रस्त्यांवर सांडपाणी साचले आहे. दुर्गंधी आणि साथीच्या आजारांचा धोका वाढल्याने मनसेने BMCला आंदोलनाचा इशारा दिला.
मुंबईत पावसाने विश्रांती घेतली, पण सायनमधील प्रतीक्षानगरच्या रहिवाशांची सांडपाण्याच्या विळख्यातून सुटका झालेली नाही. रस्ते, सोसायट्यांचे प्रवेशद्वार आणि शाळेच्या परिसरात नाल्यातील घाण पाणी साचल्यामुळे स्थानिकांचे दैनंदिन जीवन विस्कळीत झाले आहे. कोट्यवधी रुपये खर्च करून नवीन ड्रेनेज लाइन टाकल्यानंतरही ही परिस्थिती निर्माण झाल्याने मुंबई महापालिकेच्या कामाची गुणवत्ता, नियोजन आणि देखरेखीवर गंभीर प्रश्न उपस्थित होत आहेत.
प्रभाग क्रमांक १७३ मधील प्रतीक्षानगर परिसरात गेल्या सहा महिन्यांपासून ड्रेनेजशी संबंधित कामे सुरू होती. या कामासाठी काही रस्ते दीर्घकाळ बंद ठेवण्यात आले होते. नवीन ड्रेनेज व्यवस्था कार्यान्वित झाल्यानंतर पाणी तुंबण्याची समस्या कमी होईल, अशी नागरिकांना अपेक्षा होती. मात्र, प्रत्यक्षात पाऊस थांबल्यानंतरही रस्त्यांवर सांडपाणी कायम असल्याचा आरोप स्थानिकांकडून करण्यात येत आहे.
पारिजात सोसायटी, कर्मवीर भाऊराव शाळा, मनोहर बाजार, बहुमजली इमारत क्रमांक १९ आणि २० तसेच नंदनवन सोसायटीतील टी-५ ते टी-१९ या पट्ट्यात परिस्थिती अधिक गंभीर असल्याचे सांगण्यात येत आहे. रस्त्यांवर साचलेल्या दूषित पाण्यातून नागरिकांना वाट काढावी लागत आहे. शाळकरी विद्यार्थी, ज्येष्ठ नागरिक, रुग्ण आणि पादचाऱ्यांना याचा सर्वाधिक त्रास सहन करावा लागत आहे. वाहनांच्या वर्दळीमुळे घाण पाणी आजूबाजूला उडत असल्याने नागरिकांच्या अडचणी आणखी वाढल्या आहेत.
साचलेल्या पाण्यामुळे परिसरात तीव्र दुर्गंधी पसरली असून डास, झुरळे आणि उंदरांचा प्रादुर्भाव वाढल्याची तक्रार रहिवाशांनी केली आहे. त्यामुळे डेंग्यू, मलेरिया, लेप्टोस्पायरोसिस आणि दूषित पाण्यामुळे होणाऱ्या इतर आजारांचा धोका निर्माण होण्याची भीती व्यक्त केली जात आहे. नाल्यांमध्ये मोठ्या प्रमाणात गाळ साचल्यामुळे पाण्याचा नैसर्गिक प्रवाह अडल्याचा आरोपही करण्यात आला आहे.
महाराष्ट्र नवनिर्माण सेनेच्या सायन कोळीवाडा विधानसभा क्षेत्रातील प्रभाग क्रमांक १७३ चे शाखाध्यक्ष लवू नर यांनी या प्रश्नावर महापालिकेच्या वरिष्ठ अधिकाऱ्यांशी पत्रव्यवहार केला आहे. वारंवार पाठपुरावा करूनही प्रशासनाकडून अपेक्षित प्रतिसाद मिळत नसल्याचा दावा त्यांनी केला. परिस्थिती सुधारण्यासाठी परिसरात अतिरिक्त उच्च क्षमतेचे पंप तातडीने बसवून साचलेल्या सांडपाण्याचा निचरा करावा, अशी मागणी मनसेने केली आहे.
नव्याने टाकण्यात आलेल्या ड्रेनेज लाइनची तांत्रिक पाहणी करण्यासह नाले आणि जोडवाहिन्यांमधील गाळ तातडीने काढण्याची मागणीही करण्यात आली आहे. विद्यार्थी आणि रहिवाशांचे हाल थांबवण्यासाठी युद्धपातळीवर काम सुरू करावे, अन्यथा पालिकेविरोधात तीव्र आंदोलन छेडले जाईल, असा इशारा मनसेने दिला आहे.
सावित्रीबाई फुले नगर ते प्रतीक्षानगर बस डेपोदरम्यान सांडपाणी वाहून नेण्यासाठी स्वतंत्र सर्व्हिस लाइन उभारण्यात आल्याचेही सांगण्यात येते. मात्र, एवढा खर्च आणि वेळ देऊनही पाणी रस्त्यांवर तुंबत असल्यामुळे प्रकल्पाच्या अंमलबजावणीवर संशय व्यक्त होत आहे. कंत्राटदाराने काम निर्धारित निकषांनुसार केले का, कामाचे गुणवत्ता परीक्षण झाले का आणि संबंधित अधिकाऱ्यांनी नियमित पाहणी केली का, याची स्वतंत्र चौकशी करण्याची मागणी जोर धरत आहे.
आता प्रशासनाने केवळ तात्पुरते पंप लावण्याऐवजी समस्येचे मूळ शोधून कायमस्वरूपी उपाय करणे आवश्यक आहे. ड्रेनेज लाइनचे तांत्रिक ऑडिट, नाल्यांची नियमित सफाई आणि कामाची जबाबदारी निश्चित झाल्यासच प्रतीक्षानगरची या कृत्रिम सांडपाणी पुरातून कायमची मुक्तता होऊ शकेल.
Also Read: Pune’s Latest Information
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
About The Author
