अहिल्यानगरात जप्त एक कोटींची रोकड: निवडणूक आयोगाच्या तपासात मोठा खुलासा, राजकीय वर्तुळात खळबळ
अहिल्यानगरात जप्त एक कोटींची रोकड: निवडणूक आयोगाच्या तपासात मोठा खुलासा, राजकीय वर्तुळात खळबळ
संगमनेर निवडणुकीच्या तोंडावर जप्त केलेली एक कोटींची रोकड कोणाची? निवडणूक आयोगाच्या तपासात अजमेरा आणि अक्षया कन्स्ट्रक्शनची माहिती समोर; रोकड निवडणूक गैरव्यवहारासाठी नसल्याचे संकेत
सायली मेमाणे
पुणे १७ नोव्हेंबर २०२५ : अहिल्यानगर जिल्ह्यातील संगमनेर पालिका निवडणुकीच्या पार्श्वभूमीवर जप्त करण्यात आलेल्या तब्बल एक कोटी रुपयांच्या रोकडीने राजकीय वर्तुळात मोठी खळबळ उडवून दिली होती. शहराच्या प्रवेशद्वाराजवळ खांडगाव फाटा परिसरात निवडणूक आयोगाच्या सर्वेक्षण पथकाने ही रोकड एका संशयित कारमधून जप्त केली होती. निवडणूक आचारसंहितेच्या काळात एवढी मोठी रक्कम सापडल्याने या पैशाचा वापर निवडणुकीतील गैरव्यवहारासाठी होणार का, यावर सर्वत्र चर्चेला उधाण आले होते.
राज्यात स्थानिक स्वराज्य संस्थांच्या निवडणुका सुरू असल्याने प्रचारासाठी मोठ्या हालचाली सुरू आहेत. संगमनेरमध्येही राजकीय वातावरण तापलेले असताना अचानक एवढ्या मोठ्या रकमेचा शोध लागल्याने ही रक्कम मतदार खरेदी किंवा निवडणूक खर्चासाठी वापरण्यात येणार, अशी शंका व्यक्त करण्यात येत होती. निवडणूक आयोगानेही या प्रकरणाची गंभीर दखल घेऊन तात्काळ तपासाला सुरुवात केली.
तपासासाठी संबंधित वाहनचालक आणि कंपनी प्रतिनिधींना चौकशीसाठी बोलावण्यात आले. प्राथमिक चौकशीत रोकड नेमकी कुठून आणली आणि कोणत्या उद्देशाने वाहून नेली जात होती, याबाबत पोलिसांनी आणि निवडणूक अधिकाऱ्यांनी माहिती मागवली. त्यानंतर अजमेरा कन्स्ट्रक्शन आणि अक्षया कन्स्ट्रक्शन या दोन्ही कंपन्यांनी कागदपत्रांसह व्यवहाराची संपूर्ण माहिती निवडणूक आयोगाला सादर केली.
या कागदपत्रांनुसार, ही रक्कम धाराशिवमधील एका बँकेतून अधिकृत पद्धतीने काढण्यात आली होती. कंत्राटी प्रकल्पासंबंधित आर्थिक व्यवहारासाठी ही रोकड हलवण्यात येत असल्याची माहिती कंपन्यांनी दिली. पोलिस आणि निवडणूक अधिकाऱ्यांनी सादर केलेल्या कागदपत्रांची बारकाईने पडताळणी केली. त्यानंतर ही रक्कम निवडणूक प्रक्रियेतील गैरव्यवहारासाठी वापरण्याचा कोणताही पुरावा समोर आला नाही, असा प्राथमिक निष्कर्ष नोंदवण्यात आला.
निवडणूक आयोगाने रोकड सध्या ताब्यात ठेवली असून, अंतिम पडताळणी पूर्ण झाल्यानंतर ती संबंधित कंपनीकडे परत दिली जाणार आहे. या प्रकरणाचा तपास पारदर्शक पद्धतीने करण्यात येत असून, आचारसंहितेच्या काळात कोणताही गैरवापर होऊ नये, याबाबत प्रशासन सतर्क आहे.
जप्त रक्कम निवडणुकीसाठी वापरण्याचा हेतू नसल्याचे संकेत मिळाले असले तरी या प्रकरणाने संगमनेरच्या राजकारणात मोठी खळबळ माजली आहे. निवडणूक काळात एवढी मोठी रक्कम फिरत असणेच स्थानिक पातळीवर अनेक संशय निर्माण करणारे ठरले आहे. काही पक्षांनी या प्रकरणाचा राजकीय फायदा घेण्याचा प्रयत्न सुरू केलेला दिसतो, तर काहीजणांनी तपास पूर्ण होईपर्यंत संयम पाळण्याचे आवाहन केले आहे.
या सर्व घडामोडींमुळे आगामी दिवसांत संगमनेरमधील राजकीय तापमान आणखी वाढण्याची चिन्हे आहेत. निवडणूक आयोगाकडून दिल्या जाणाऱ्या अंतिम अहवालाकडे सर्वांचे लक्ष लागले आहे.
