भाजप शहर महामंत्री प्रमोद कोंढरे यांच्यावर महिला पोलीस निरीक्षकाच्या विनयभंगाचा आरोप, गुन्हा दाखल
भाजप शहर महामंत्री प्रमोद कोंढरे यांच्यावर महिला पोलीस निरीक्षकाच्या विनयभंगाचा आरोप, गुन्हा दाखल
पुण्यात भाजप नेते प्रमोद कोंढरे यांच्यावर महिला पोलीस निरीक्षकाच्या विनयभंगाचा गंभीर आरोप, शनिवार वाड्याजवळ गर्दीचा फायदा घेतल्याचा दावा.
सायली मेमाणे
२५ जून २०२५ : पुणे शहरात राजकारण आणि कायदा व्यवस्थेच्या सीमेवर धक्कादायक घटना समोर आली आहे. भाजपचे शहर महामंत्री प्रमोद कोंढरे यांच्यावर एका महिला पोलीस निरीक्षकाने विनयभंगाचा गंभीर आरोप केला असून, याप्रकरणी अधिकृत गुन्हा दाखल करण्यात आला आहे. ही घटना सोमवारी शनिवार वाड्याजवळील एका सार्वजनिक कार्यक्रमाच्या वेळी घडली. भाजप आमदार हेमंत रासने आणि अन्य कार्यकर्त्यांसह कार्यक्रमानंतर चहासाठी जवळच्या दुकानात गेलेल्या वेळी गर्दीचा फायदा घेत प्रमोद कोंढरे यांनी महिला पोलीस अधिकार्यावर लज्जा उत्पन्न होईल असा स्पर्श केल्याचा आरोप आहे.
या घटनेची तक्रार संबंधित महिला निरीक्षकांनी वरिष्ठ अधिकाऱ्यांकडे दिल्यानंतर, दुकानातील सीसीटीव्ही फुटेज मागवून पोलिसांनी पडताळणी केली. त्यानंतर पोलीस आयुक्त अमितेश कुमार यांच्या मार्गदर्शनाखाली प्रमोद कोंढरे यांच्यावर विनयभंगाचा गुन्हा दाखल करण्यात आला. हे प्रकरण सार्वजनिक क्षेत्रात आणि पोलीस खात्यात चांगलेच गाजू लागले आहे.
दरम्यान, प्रमोद कोंढरे यांनी प्रसारमाध्यमांसाठी पत्रक काढत आपल्या विरोधातील आरोप फेटाळले असून, हा प्रकार गैरसमजुतीतून घडल्याचा दावा केला आहे. त्यांनी आरोपात तथ्य नसल्याचं सांगत कायदेशीर मार्गाने आपली बाजू मांडणार असल्याचेही स्पष्ट केलं आहे. मात्र, उल्लेखनीय बाब म्हणजे कोंढरे यांच्यावर यापूर्वीही विनयभंगाचा गुन्हा दाखल झाल्याचा उल्लेख आता चर्चेत आहे.
ही घटना केवळ राजकीयदृष्ट्या नव्हे, तर कायदा व सुव्यवस्थेच्या दृष्टिकोनातून गंभीर आहे. एकीकडे पोलीस यंत्रणा महिलांच्या सुरक्षेसाठी प्रयत्नशील आहे, तर दुसरीकडे एका वरिष्ठ राजकीय पदाधिकाऱ्याविरोधात अशा प्रकारचा गुन्हा दाखल होणं म्हणजे विश्वासाला तडा जाण्याचं उदाहरण म्हणता येईल.
राजकीय मंडळी, विशेषतः सत्ताधारी पक्षातील नेते, समाजासमोर आदर्श ठेवण्याच्या भूमिकेत असतात. अशा परिस्थितीत महिलांचा सन्मान राखला गेला पाहिजे, आणि कोणत्याही प्रकारच्या छळास सरकारने किंवा पक्षाने मूकसंमती देऊ नये, अशी प्रतिक्रिया अनेक सामाजिक संघटनांनी दिली आहे.
पोलिसांकडून याप्रकरणी अधिक तपास सुरू असून, सीसीटीव्ही फुटेज आणि प्रत्यक्षदर्शींवर आधारित पुढील कायदेशीर कारवाई केली जाणार असल्याचं अधिकाऱ्यांनी स्पष्ट केलं आहे.
Do-follow Links:
Instagram: https://www.instagram.com/newsdotz/
YouTube: https://www.youtube.com/@NewsDotz
Facebook: https://www.facebook.com/profile.php?id=61573903448264
Twitter: https://x.com/NewsDotz
