मांजा हटवा अन् जीव वाचवा! पुण्यात चायनीज मांजाविरोधात ‘विद्या प्रमाण रेस्क्यू अभियान’
मांजा हटवा अन् जीव वाचवा! पुण्यात चायनीज मांजाविरोधात ‘विद्या प्रमाण रेस्क्यू अभियान’
चायनीज नायलॉन मांजामुळे पक्षी, प्राणी व नागरिकांचे प्राण धोक्यात. पुण्यात डॉ. कल्याण गंगवाल यांच्या मार्गदर्शनाखाली 31 जानेवारीपर्यंत ‘विद्या प्रमाण रेस्क्यू अभियान’ राबवले जात असून मोफत उपचार व जनजागृती केली जात आहे.
पुणे १८ जानेवारी २०२५: मकरसंक्रांतीच्या निमित्ताने साजऱ्या होणाऱ्या पतंगोत्सवाला आनंद, उत्साह आणि परंपरेचे स्वरूप आहे. मात्र गेल्या काही वर्षांपासून या उत्सवावर चायनीज नायलॉन मांजाचे सावट पसरले असून, तो पक्षी, प्राणी आणि माणसांसाठी थेट मृत्यूचा सापळा ठरत आहे. या गंभीर वास्तवाची जाणीव ठेवत पुण्यात डॉ. कल्याण गंगवाल यांच्या मार्गदर्शनाखाली ‘मांजा हटवा अन् जीव वाचवा’ या संदेशासह ‘विद्या प्रमाण रेस्क्यू अभियान’ राबवले जात आहे. हे अभियान सर्वजीव मंगल प्रतिष्ठान पुणे, रेस्क्यू वाईल्ड लाईफ आणि सामाजिक कार्यकर्ते सुनील परदेशी यांच्या सहकार्याने साकारले असून 31 जानेवारीपर्यंत सुरू राहणार आहे.
परमपूज्य आचार्य विद्यासागर महाराज आणि परमपूज्य मुनि 108 प्रमाण सागर महाराज यांच्या प्रेरणा व आशीर्वादाने हे अभियान अनेक वर्षांपासून सातत्याने सुरू आहे. पतंगोत्सव साजरा करताना कोणाच्याही जीवाला धोका पोहोचू नये, हीच या उपक्रमामागची मुख्य भावना आहे. चायनीज मांज्यावर काच आणि केमिकल कोटिंग असल्यामुळे तो सहज तुटत नाही. त्यामुळे आकाशात उडणारे पक्षी या मांज्यात अडकून गंभीर जखमी होतात, अनेक वेळा त्यांचा मृत्यू होतो. इतकेच नव्हे तर रस्त्यावरून जाणाऱ्या दुचाकीस्वारांचे गळे कापले जाणे, पादचाऱ्यांना गंभीर जखमा होणे अशा घटनांमध्येही वाढ झाली आहे.
डॉ. गंगवाल यांनी प्रसिद्ध केलेल्या माहितीनुसार, मागील वर्षी चायनीज मांज्यामुळे हजारो पक्ष्यांचा मृत्यू झाला होता. ही आकडेवारी केवळ पर्यावरणाच्या दृष्टीनेच नव्हे, तर मानवी संवेदनांच्या दृष्टीनेही अत्यंत धक्कादायक आहे. याशिवाय सुमारे 215 नागरिकांना या मांज्यामुळे आपला जीव गमवावा लागल्याचेही समोर आले आहे. या घटना अपघात नसून निष्काळजीपणा आणि बेकायदेशीर मांजाच्या वापराचे थेट परिणाम असल्याचे सामाजिक कार्यकर्त्यांचे मत आहे.
या पार्श्वभूमीवर ‘विद्या प्रमाण रेस्क्यू अभियान’ अंतर्गत सुसज्ज रुग्णवाहिका, डॉक्टर, स्वयंसेवक आणि सामाजिक कार्यकर्त्यांच्या मदतीने जखमी पक्षी, प्राणी तसेच नागरिकांवर मोफत उपचार केले जात आहेत. उपचारानंतर बरे झालेले पक्षी पुन्हा त्यांच्या नैसर्गिक अधिवासात सोडण्यात येतात. झोपडपट्टी व वस्ती भागांमध्ये मांज्यामुळे जखमी झालेल्या नागरिकांनाही तातडीची आणि विनामूल्य वैद्यकीय मदत दिली जात आहे.
उच्च न्यायालयाने चायनीज नायलॉन मांजावर स्पष्ट बंदी घातलेली असतानाही त्याची सर्रास विक्री सुरू असल्याची खंत डॉ. गंगवाल यांनी व्यक्त केली आहे. नागरिकांनी सजग राहून अशा मांज्याची खरेदी-विक्री टाळावी आणि बेकायदेशीर विक्रेत्यांची माहिती त्वरित पोलिसांना द्यावी, असे आवाहन त्यांनी केले आहे. पतंगोत्सव हा आनंदाचा उत्सव असावा, तो शोकांतिका ठरू नये, हीच या अभियानामागची भूमिका आहे. अहिंसा, जीवदया आणि सामाजिक जबाबदारी जपत पक्षी, प्राणी आणि माणसांचे प्राण वाचवणे हीच खरी मानवता असल्याचा ठाम संदेश या अभियानातून दिला जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
