स्कोडा रॅपीड लिलाव: 4 लाखांच्या आत विक्री, लिलावात भाग कसा घ्याल?
स्कोडा रॅपीड लिलाव: 4 लाखांच्या आत विक्री, लिलावात भाग कसा घ्याल?
महाराष्ट्र शासनाच्या पर्यावरण विभागाची शासकीय स्कोडा रॅपीड गाडी लिलावासाठी काढण्यात आली; लिलावात भाग घेण्याची प्रक्रिया, मूळ किंमत, EMD रक्कम आणि आवश्यक अटी वाचा सविस्तर.
सायली मेमाणे
पुणे २४ ऑक्टोबर २०२५ : मुंबई – महाराष्ट्र शासनाच्या पर्यावरण व वातावरणीय बदल विभागाने आपल्या अधीन असलेल्या शासकीय वाहनाची विक्री लिलावाद्वारे करण्याचा निर्णय घेतला आहे. या लिलावात एमएच-01, सीपी-1530 या क्रमांकाची स्कोडा रॅपीड गाडी ‘जशी आहे तशा स्थितीत’ तत्त्वावर विकली जाणार आहे. विभागाने लिलावासाठी नियम व अटी जाहीर केल्या असून वाहनाची तपासणी नवीन प्रशासकीय भवनाच्या आवारात केली जाऊ शकते.
स्कोडा रॅपीड गाडीसाठी लिलावात भाग घेण्यासाठी निविदाधारकांनी प्रथम 37,000 रुपये इतकी इसाऱ्याची रक्कम (EMD) भरणे आवश्यक आहे. ही रक्कम मंत्रालयातील नवीन प्रशासकीय भवनाच्या 15 व्या मजल्यावर असलेल्या पर्यावरण विभागाच्या रोखशाखेत जमा करावी लागते. रक्कम जमा झाल्यानंतर मिळालेली पावती निविदा अर्जासोबत जोडणे बंधनकारक आहे; अन्यथा निविदा ग्राह्य धरली जाणार नाही.
या वाहनाची लिलावाची सुरुवातीची किंमत 3,73,589 रुपये निश्चित करण्यात आली आहे. निविदा अर्ज सादर करण्याची अंतिम तारीख 28 ऑक्टोबर, 2025 रोजी सायंकाळी 5:00 वाजेपर्यंत आहे. अर्ज मोहोरबंद पाकिटात सादर करणे आवश्यक असून, निविदा 31 ऑक्टोबर, 2025 रोजी दुपारी 3:00 वाजता उघडण्यात येतील.
यशस्वी निविदाधारकाने वाहनाच्या रकमेवर लागू होणारा वस्तू व सेवा कर (GST) भरावा लागेल. तसेच वाहनाच्या हस्तांतरणाची सर्व प्रक्रिया (RTO Transfer) स्वतःच्या खर्चाने करावी लागेल. लिलाव यशस्वी झाल्याचे कळल्यापासून एका आठवड्याच्या आत संपूर्ण रक्कम भरून वाहनाचा ताबा घेणे बंधनकारक असल्याचे शासनाने नमूद केले आहे.
लिलावात भाग घेणाऱ्यांनी या अटी काळजीपूर्वक पाळणे गरजेचे आहे. वाहनाची तपासणी आणि आवश्यक कागदपत्रांची तयारी करूनच निविदा सादर करावी. विभागाने हा लिलाव पारदर्शक आणि नियमबद्ध पद्धतीने पार पाडण्याचे आश्वासन दिले आहे.
हा लिलाव आर्थिकदृष्ट्या आकर्षक असून, गाडी 4 लाखांच्या आत खरेदी करता येऊ शकते. शासकीय वाहन लिलावात खरेदी करण्याची ही संधी वाहन खरेदीस इच्छुक लोकांसाठी महत्वाची ठरणार आहे.
