पुरातन मंदिर चोरी प्रकरणात अभियंता टोळी पकडली

गुगलवर माहिती शोधून पुरातन मंदिरांमध्ये चोरी करणाऱ्या अभियंता टोळीचा नाशिक पोलिसांकडून पर्दाफाश; 66 किलो मूर्ती आणि चांदी जप्त.

सायली मेमाणे

पुणे १० जून २०२५ : नाशिक जिल्ह्याच्या ग्रामीण भागात गेल्या काही महिन्यांपासून सुरू असलेल्या मंदिर चोरीच्या घटनांमुळे नागरिकांमध्ये भीतीचं वातावरण निर्माण झालं होतं. या घटनांची गंभीर दखल घेत नाशिक ग्रामीण पोलिसांनी एका अत्यंत कुशल तपासातून उच्चशिक्षित अभियंत्यांसह काम करणाऱ्या टोळीचा भांडाफोड केला आहे. या टोळीने डिजिटल माध्यमांचा वापर करून पुरातन मंदिरांची माहिती मिळवली आणि नंतर योजनाबद्ध पद्धतीने चोरी केली.

या गुन्ह्यांमध्ये पकडलेला मुख्य आरोपी सुयोग दवंगे हा संगमनेर तालुक्यातील हिवरगाव येथील रहिवासी असून तो मॅकेनिकल अभियंता आहे. त्याच्यासोबत काम करणारी टोळी गुगल आणि यूट्यूबवरून राज्यातील पुरातन मंदिरांबाबत माहिती गोळा करत होती. माहिती मिळाल्यानंतर हे गुन्हेगार रात्रीच्या वेळी मंदिरांमध्ये घुसून हायड्रॉलिक कटरसारख्या उपकरणांचा वापर करत कुलुपं तोडून मूर्ती आणि अन्य धार्मिक वस्तू चोरत होते.

नाशिक ग्रामीण पोलिसांनी या टोळीकडून जवळपास 66 किलो वजनाच्या तांबे व पितळ धातूच्या मूर्ती, घंटा, आणि अन्य पूजाविषयक साहित्य जप्त केले आहे. त्याचबरोबर 1238 ग्रॅम चांदी देखील हस्तगत करण्यात आली आहे. या टोळीने सिन्नर, निफाड, लासलगाव आणि वाडीवऱ्हे परिसरातील किमान सात मंदिरांमध्ये चोरी केली असल्याचे तपासात निष्पन्न झाले आहे.

तांत्रिक विश्लेषण, सीसीटीव्ही फुटेज आणि गुप्त माहितीच्या आधारे ही कारवाई करण्यात आली. चाकण एमआयडीसी येथून सुयोग दवंगे याला अटक करण्यात आली. त्यानंतर त्याच्या माहितीच्या आधारे संदीप उर्फ शेंडी गोडे (टिटवळा, कल्याण) आणि अनिकेत कदम (आरके नगर, कल्याण) यांनाही पोलिसांनी अटक केली आहे. पुढील तपासात संदीप साबळे (अकोले) आणि दीपक पाटेकर (कल्याण) यांची नावं समोर आली असून, हे दोघे अद्याप फरार आहेत.

या प्रकरणात पोलिसांची ही कारवाई लक्षणीय असून, पुरातन सांस्कृतिक वारशाची चोरी रोखण्यासाठी अशा प्रकारचे कठोर पावले महत्त्वाची ठरतात. तसेच, मंदिर प्रशासनांनी देखील सुरक्षा यंत्रणा बळकट करणे आवश्यक आहे.

दरम्यान, नाशिक शहरातील दुसऱ्या एका घटनेत, प्रकाश उर्फ पक्या खटकी याला गुन्हे शाखेच्या पथकाने आडगाव परिसरातून अटक केली आहे. त्याच्यावर अनेक गंभीर स्वरूपाचे गुन्हे भद्रकाली, पंचवटी व आडगाव पोलिस ठाण्यांमध्ये नोंदवले आहेत. यापैकी एका प्रकरणात, त्याने पावभाजी खाणाऱ्या व्यक्तीवर लाकडी दांडक्याने हल्ला केला होता. त्याच्याविरुद्ध खुनाचा प्रयत्न केल्याचा गुन्हा दाखल आहे.

या घटनांमुळे नाशिक पोलिसांची कार्यक्षमता पुन्हा एकदा अधोरेखित झाली असून, गुन्हेगारीला आळा घालण्यासाठी पोलीस यंत्रणा अधिक प्रभावी झाली आहे.