Pune News: चारित्र्याच्या संशयातून पत्नीचा निर्घृण खून; इंदापूरमधील आरोपी पती जेजुरीतून अटकेत
Pune News: चारित्र्याच्या संशयातून पत्नीचा निर्घृण खून; इंदापूरमधील आरोपी पती जेजुरीतून अटकेत
Indapur Pune Crime: पत्नी आंघोळीला जात असताना पतीने लाकडी दांडक्याने डोक्यात वार करून खून केला. वालचंदनगर पोलिसांनी आरोपीला जेजुरीतून अटक केली.
पुणे २५ डिसेंबर २०२५ : पुणे जिल्ह्यातील इंदापूर तालुक्यातून एक धक्कादायक आणि मन सुन्न करणारी घटना समोर आली आहे. चारित्र्याच्या संशयातून पत्नीचा निर्घृण खून केल्याप्रकरणी वालचंदनगर पोलिसांनी आरोपी पतीला अवघ्या काही तासांत जेजुरी येथून अटक केली आहे. या घटनेमुळे संपूर्ण परिसरात खळबळ उडाली असून कौटुंबिक वादातून टोकाचे पाऊल उचलल्याची ही आणखी एक दुर्दैवी घटना असल्याचे दिसून येत आहे.
मनीषा मल्हारी खोमणे असे 35 वर्षीय मृत महिलेचे नाव असून तिचा पती मल्हारी रोहिदास खोमणे याने चारित्र्याच्या संशयातून तिचा खून केल्याचे पोलिस तपासात निष्पन्न झाले आहे. ही घटना 23 डिसेंबर रोजी पहाटे साडे पाचच्या सुमारास इंदापूर तालुक्यातील शेळगाव येथे घडली. मनीषा खोमणे या आंघोळीसाठी घराबाहेर जात असताना पती मल्हारी खोमणे याने पाठीमागून लाकडी दांडक्याने त्यांच्या डोक्यावर जोरदार वार केला. या हल्ल्यात मनीषा यांचा जागीच मृत्यू झाला.
घटनेनंतर आरोपी मल्हारी खोमणे याने आपला मोबाईल घरातच ठेवून घटनास्थळावरून पलायन केले. आरोपीने मोबाईल मुद्दाम घरात ठेवल्याने पोलिसांचा माग काढणे कठीण होईल, असा त्याचा अंदाज होता. मात्र वालचंदनगर पोलिसांनी तात्काळ हालचाली करत आरोपीचा शोध सुरू केला. माळेगाव, नातेपुते, जेजुरी तसेच आसपासच्या परिसरात पोलिसांची पथके रवाना करण्यात आली.
वालचंदनगर पोलीस ठाण्याचे प्रभारी सहाय्यक पोलीस निरीक्षक राजकुमार डुणगे यांनी दिलेल्या माहितीनुसार, काही तासांतच आरोपी जेजुरी परिसरात असल्याची माहिती पोलिसांना मिळाली. त्यानंतर तातडीने कारवाई करत पोलिसांनी आरोपी मल्हारी खोमणे याला जेजुरी येथून ताब्यात घेतले. आरोपीला अटक केल्यानंतर त्याच्याविरोधात खुनाचा गुन्हा दाखल करण्यात आला असून इंदापूर न्यायालयाने त्याला पाच दिवसांची पोलीस कोठडी सुनावली आहे.
या प्रकरणात पुणे ग्रामीण पोलीस दलाने अतिशय जलद आणि प्रभावी कामगिरी केल्याचे पाहायला मिळाले. पुणे ग्रामीण पोलीस अधीक्षक संदीपसिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी डॉ. सुदर्शन राठोड तसेच स्थानिक गुन्हे शाखेचे पोलीस निरीक्षक अविनाश शिळीमकर यांच्या मार्गदर्शनाखाली ही कारवाई पार पडली. वालचंदनगर पोलीस स्टेशनच्या तपास पथकात सहाय्यक पोलीस निरीक्षक राजकुमार डुणगे, पोलीस उपनिरीक्षक विजय टेळकीकर, मिलिंद मिठापल्ली, रतिलाल चौधर यांच्यासह अनेक अधिकारी व कर्मचाऱ्यांचा समावेश होता.
चारित्र्याच्या संशयातून होणाऱ्या गुन्ह्यांचे प्रमाण दिवसेंदिवस वाढत चालले असून ही घटना समाजाला अंतर्मुख करणारी आहे. संशय, गैरसमज आणि रागाच्या भरात घेतलेले निर्णय किती भयानक परिणाम घडवू शकतात, याचे हे जिवंत उदाहरण आहे. एका क्षणाच्या संशयामुळे एका महिलेचा जीव गेला आणि संपूर्ण कुटुंब उद्ध्वस्त झाले.
सध्या आरोपीकडून पुढील चौकशी सुरू असून खुनामागील नेमकी मानसिकता, कौटुंबिक वादाची पार्श्वभूमी आणि इतर बाबींचा तपास पोलिसांकडून केला जात आहे. या घटनेमुळे इंदापूर तालुक्यात हळहळ व्यक्त केली जात असून आरोपीला कठोर शिक्षा व्हावी, अशी मागणी नागरिकांकडून केली जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
