उत्पादन घटले तरी मागणी वाढली चाकण बाजारात हापूस आंब्यांचे दर ८००–१२०० रुपयांवर

चाकण कृषी उत्पन्न बाजार समितीत रत्नागिरी-देवगड हापूस आंब्यांची मोठी आवक. उत्पादन घटल्यानेही मागणी वाढली; दर ८०० ते १२०० रुपये प्रति डझन कायम.

पुणे १८ एप्रिल २०२६ : चाकण कृषी उत्पन्न बाजार समिती येथे सध्या रत्नागिरी आणि देवगड भागातील प्रसिद्ध हापूस आंब्यांची मोठ्या प्रमाणावर आवक सुरू असून, उत्पादनात लक्षणीय घट होऊनही बाजारभाव तेजीत कायम असल्याचे चित्र दिसत आहे. यंदा हापूस आंब्यांचे दर ८०० ते १२०० रुपये प्रति डझन दरम्यान स्थिरावले असून, ग्राहकांकडून उत्स्फूर्त प्रतिसाद मिळत आहे. अक्षय तृतीयेच्या मुहूर्तामुळे खरेदीला विशेष महत्त्व प्राप्त झाले असून, गेल्या काही दिवसांत बाजारपेठेत ग्राहकांची मोठी गर्दी दिसून येत आहे.

हापूससोबतच लालबाग, केशर, बदाम, दशेरी अशा विविध जातींचे आंबेही बाजारात दाखल झाले आहेत. फळबाजार गजबजलेला असून, विक्रेते आणि ग्राहक यांच्यातील खरेदी-विक्रीची लगबग वाढली आहे. हवामानातील अनिश्चिततेचा यंदाच्या हंगामावर मोठा परिणाम झाला आहे. फुलोऱ्याच्या काळात झालेला अवकाळी पाऊस, त्यानंतर वाढलेले तापमान आणि आर्द्रतेतील चढ-उतार यामुळे अनेक ठिकाणी फळधारणा कमी झाली, तर काही भागांत फळगळ मोठ्या प्रमाणावर झाली. परिणामी, दरवर्षीच्या तुलनेत यंदा उत्पादन लक्षणीयरीत्या घटल्याचे शेतकरी सांगत आहेत.

पूर्वी मोठ्या प्रमाणावर परदेशात निर्यात होणारा हापूस यंदा विविध कारणांमुळे देशांतर्गत बाजारात अधिक प्रमाणात उपलब्ध झाला आहे. काही देशांनी घातलेल्या निर्बंधांमुळे निर्यात घटली, त्यामुळे स्थानिक बाजारपेठांमध्ये स्पर्धा वाढली. मात्र, उत्पादन घटल्याने दरांवर अपेक्षित दबाव आलेला नाही. उलट, गुणवत्तापूर्ण आंब्यासाठी ग्राहक अधिक दर मोजण्यास तयार असल्याचे दिसत आहे. आकर्षक रंग, दरवळणारा सुगंध आणि खास गोडी यामुळे देवगड व रत्नागिरी हापूसला विशेष पसंती मिळत आहे.

व्यापाऱ्यांच्या मते, गुणवत्तेनुसार दरात मोठा फरक पडतो आहे. चकचकीत सालीचा, योग्य आकाराचा आणि गोडी टिकवून ठेवणारा हापूस जास्त दरात विकला जात आहे, तर मध्यम दर्जाच्या फळांना तुलनेने कमी दर मिळत आहेत. आंबा व्यापारी शहजाद बागवान यांनी सांगितले की, “उत्पादन कमी असल्यामुळे दर टिकून आहेत. ग्राहकांकडून उत्तम प्रतिसाद मिळतो आहे. गुणवत्तेनुसार विक्री होत असल्याने चांगल्या मालाला मागणी जास्त आहे.”

ग्राहकांच्या खरेदीतही बदल दिसून येतो आहे. अनेक कुटुंबे सणासुदीच्या निमित्ताने आंबा खरेदीला प्राधान्य देत आहेत. अक्षय तृतीयेच्या पार्श्वभूमीवर गोड फळ घरी आणण्याची परंपरा असल्याने विक्रीला वेग आला आहे. किरकोळ विक्रेत्यांसोबतच घाऊक खरेदीदारही बाजारात सक्रिय असल्याचे चित्र आहे.

आगामी काही आठवड्यांत आंब्यांची आवक वाढण्याची शक्यता व्यापाऱ्यांकडून व्यक्त केली जात आहे. मात्र, एकूण उत्पादनस्थिती, हवामानातील बदल आणि निर्यातीतील धोरणे यावरच बाजारभावाचा पुढील कल अवलंबून राहणार आहे. सध्या तरी चाकण बाजार समितीत आंब्यांच्या गोड सुगंधाने आणि ग्राहकांच्या गर्दीने बाजारपेठ बहरलेली दिसत आहे. उत्पादन घटले असले तरी वाढती मागणी आणि गुणवत्तेचा ठसा यामुळे हापूस आंब्यांचे दर तेजीत कायम राहिले आहेत.