मराठा आरक्षणासाठी मनोज जरांगे पाटील यांचे उपोषण सुरू जालन्यात समृद्धी महामार्गावर मराठा आंदोलकांचा रास्ता रोको
मराठा आरक्षणासाठी मनोज जरांगे पाटील यांचे उपोषण सुरू; जालन्यात समृद्धी महामार्गावर मराठा आंदोलकांचा रास्ता रोको
मराठा आरक्षणाच्या मागण्यांसाठी मनोज जरांगे पाटील यांनी अंतरवाली सराटी येथे उपोषण सुरू केले असून जालन्यात मराठा आंदोलकांनी समृद्धी महामार्ग रोखला. कुणबी प्रमाणपत्र, व्हॅलिडिटी आणि गुन्हे मागे घेण्याच्या प्रमुख मागण्या पुन्हा अधोरेखित करण्यात आल्या.
पुणे ३० मे २०२६ : मराठा आरक्षणाच्या मागणीसाठी मनोज जरांगे पाटील यांनी जालना जिल्ह्यातील अंतरवाली सराटी येथे पुन्हा एकदा आंदोलनाची भूमिका घेत उपोषण सुरू केले आहे. यावेळी आंदोलनाचे स्वरूप वेगळे असून जरांगे पाटील हे स्वतःच्या शेतात रखरखत्या उन्हात उपोषणाला बसले आहेत. सरकारने मराठा समाजाच्या मागण्यांबाबत ठोस निर्णय घ्यावा, अन्यथा आंदोलन अधिक तीव्र करण्यात येईल, असा इशारा त्यांनी दिला आहे.
उपोषणादरम्यान मनोज जरांगे पाटील यांनी मराठा समाजासाठी 58 लाख नोंदींच्या आधारे कुणबी प्रमाणपत्रांचे वितरण तातडीने सुरू करण्याची मागणी केली. तसेच संबंधित लाभार्थ्यांना जात वैधता प्रमाणपत्रे देण्यासाठी शासनाने स्पष्ट आदेश काढावेत, असेही त्यांनी म्हटले. प्रमाणपत्रे आणि वैधता देण्यास टाळाटाळ करणाऱ्या अधिकाऱ्यांवर कारवाई करून त्यांना निलंबित करण्यात यावे, अशी मागणीही त्यांनी केली. जोपर्यंत या मागण्या पूर्ण होत नाहीत, तोपर्यंत उपोषण मागे घेणार नसल्याचे त्यांनी स्पष्ट केले.
जरांगे पाटील यांनी हैदराबाद गॅझेटच्या आधारे पात्र मराठा बांधवांना कुणबी प्रमाणपत्र देण्याचे आदेश काढण्याची मागणी केली. सातारा संस्थानाशी संबंधित शासन निर्णयही तातडीने जारी करावा, असे ते म्हणाले. शासनाने निर्णय घेतल्यास त्याला न्यायालयीन आव्हाने दिली जातील, या भीतीपोटी मागे हटू नये, असेही त्यांनी सरकारला सुनावले. मराठा समाजाच्या प्रश्नांवर ठोस भूमिका घेऊन तातडीने निर्णय घेण्याची वेळ आता आली असल्याचे त्यांनी सांगितले.
याशिवाय आंदोलनादरम्यान दाखल करण्यात आलेले गुन्हे मागे घेण्याची मागणीही त्यांनी केली. आंदोलनात सहभागी झालेल्या मराठा कार्यकर्त्यांवरील गुन्हे रद्द करण्याचे अधिकार गृह मंत्रालयाकडे असून शासनाने त्याबाबत सकारात्मक निर्णय घ्यावा, असे ते म्हणाले. मराठा-कुणबी समाजासाठी स्वतंत्र मंत्रालय स्थापन करण्याची मागणीही त्यांनी यावेळी पुन्हा केली. सरकारने केवळ आश्वासने न देता अंतिम मसुदा घेऊन चर्चेसाठी यावे, अशी अपेक्षाही त्यांनी व्यक्त केली.
दरम्यान, मनोज जरांगे पाटील यांच्या उपोषणाला पाठिंबा दर्शवण्यासाठी मराठा समाज आक्रमक झाल्याचे चित्र जालन्यात पाहायला मिळाले. जालन्यातील नाव्हा परिसरात मराठा आंदोलकांनी समृद्धी महामार्गावर रास्ता रोको आंदोलन केले. काही काळ महामार्गावरील वाहतूक पूर्णपणे ठप्प झाली होती. त्यामुळे वाहनांच्या लांबच लांब रांगा लागल्या आणि प्रवाशांना मोठ्या गैरसोयीला सामोरे जावे लागले.
घटनास्थळी पोलिसांनी धाव घेत आंदोलकांशी चर्चा केली आणि महामार्ग मोकळा करण्याचे आवाहन केले. काही आंदोलकांना पोलिसांनी ताब्यात घेतल्याची माहितीही समोर आली आहे. परिस्थिती नियंत्रणात आणण्यासाठी प्रशासनाकडून विशेष प्रयत्न करण्यात आले.
मनोज जरांगे पाटील यांची समजूत काढण्यासाठी राज्याचे मंत्री राधाकृष्ण विखे पाटील यांनी अंतरवाली सराटी येथे भेट दिली. त्यांनी जरांगे पाटील यांच्याशी चर्चा करून त्यांच्या मागण्या जाणून घेतल्या. मराठा समाजाला जात प्रमाणपत्रांचे वितरण, आंदोलनातील गुन्हे मागे घेणे आणि हैदराबाद गॅझेटनुसार पात्रांना प्रमाणपत्रे देण्यासाठी अधिकाऱ्यांवर जबाबदारी निश्चित करणे या प्रमुख मागण्या यावेळी मांडण्यात आल्या. मराठा आरक्षणाचा प्रश्न पुन्हा एकदा राज्याच्या राजकीय आणि सामाजिक चर्चेच्या केंद्रस्थानी आला असून सरकार पुढे काय भूमिका घेते याकडे सर्वांचे लक्ष लागले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
