Shirdi Sai Baba Parking Facility: मोफत वाहनतळामुळे भाविकांना दिलासा
Shirdi Sai Baba Parking Facility: मोफत वाहनतळामुळे भाविकांना दिलासा
शिर्डी साईबाबा संस्थानने भाविकांसाठी मोफत पार्किंगची सोय केली आहे. 450 वाहनांच्या क्षमतेचे सुसज्ज वाहनतळ सुरू करण्यात आले असून, मंदिरापर्यंत मोफत बस सुविधा उपलब्ध करून दिली जाणार आहे.
सायली मेमाणे
पुणे २९ ऑगस्ट २०२५ : शिर्डी : महाराष्ट्रातील शिर्डी हे साईबाबांच्या मंदिरामुळे देशभरातील भाविकांचे प्रमुख श्रद्धास्थान मानले जाते. दरवर्षी लाखो भाविक येथे दर्शनासाठी येतात. विशेषतः शनिवार-रविवार, सण-उत्सव तसेच गुरुपौर्णिमेला येथे प्रचंड गर्दी होत असते. अशा वेळी वाहतूक कोंडी आणि पार्किंगची समस्या भाविकांसमोर उभी राहत होती. अनेकदा भाविकांना आपल्या वाहनांसाठी जागा मिळत नव्हती. रस्त्यावर वाहने उभी राहिल्याने शिर्डीतील वाहतूक कोंडी तीव्र होत होती. मात्र, आता हा प्रश्न मिटवण्यासाठी साईबाबा संस्थानने एक मोठा निर्णय घेतला आहे.
साई संस्थानने साडेचार एकर जागेवर सुसज्ज वाहनतळाची निर्मिती केली आहे. या ठिकाणी एकावेळी सुमारे 450 वाहने पार्क करता येणार आहेत. ही सुविधा पूर्णपणे मोफत असून, वाहनधारकांना यामुळे मोठा दिलासा मिळणार आहे. या वाहनतळाचा औपचारिक शुभारंभ पालकमंत्री राधाकृष्ण विखे पाटील यांच्या हस्ते करण्यात आला.
यासोबतच भाविकांच्या सोयीसाठी आणखी काही सुविधा उपलब्ध करून देण्यात आल्या आहेत. वाहनतळापासून थेट मंदिरापर्यंत जाण्यासाठी साई संस्थानतर्फे बससेवा सुरू करण्यात येणार आहे. त्यामुळे वाहन पार्क केल्यानंतर भाविकांना मंदिरापर्यंत पोहोचण्यासाठी अडचण येणार नाही. याशिवाय, या वाहनतळ परिसरात स्वच्छतागृह, हायमॅक्स लाइट्स तसेच भाविकांना थांबण्यासाठी तात्पुरत्या सुविधा उभारण्यात येणार असल्याची माहिती मिळाली आहे.
पालकमंत्री राधाकृष्ण विखे पाटील यांनी शुभारंभावेळी साई संस्थानच्या अधिकाऱ्यांना काही महत्त्वाच्या सूचना दिल्या. त्यामध्ये भाविकांना उत्तम सुविधा मिळाव्यात, स्वच्छतेकडे विशेष लक्ष दिले जावे, तसेच सुरक्षेची काटेकोर व्यवस्था केली जावी, असे त्यांनी नमूद केले.
शिर्डीतील ही नवी पार्किंग सुविधा सुरु झाल्यामुळे भाविकांना मोठा दिलासा मिळाला आहे. यामुळे वाहतूक कोंडीवरही काही प्रमाणात नियंत्रण मिळेल. विशेष म्हणजे ही सोय पूर्णपणे मोफत उपलब्ध करून देण्यात आल्याने शिर्डीला भेट देणाऱ्या भाविकांच्या प्रवासाचा ताण कमी होणार आहे. मंदिर समितीकडून करण्यात आलेला हा निर्णय भाविकांसाठी खऱ्या अर्थाने दिलासादायक ठरणार आहे.
देशभरातून लाखो भाविक शिर्डीत साईबाबांचे दर्शन घेण्यासाठी येतात. गर्दीच्या वेळी पार्किंगचा प्रश्न गंभीर बनतो आणि भाविकांना त्रास सहन करावा लागतो. परंतु आता सुसज्ज आणि सुरक्षित वाहनतळामुळे हा प्रश्न सोडवला जाणार आहे. तसेच मंदिरापर्यंत पोहोचण्यासाठी उपलब्ध होणाऱ्या बससेवेने भाविकांना अतिरिक्त सोय होणार आहे.
शिर्डीला भेट देणाऱ्या प्रत्येक भाविकासाठी ही सुविधा नक्कीच फायदेशीर ठरणार आहे. यामुळे शिर्डीच्या पर्यटन व्यवस्थेलाही चालना मिळेल. एकीकडे भाविकांना दिलासा तर दुसरीकडे शिर्डीतील वाहतुकीवर नियंत्रण मिळाल्याने शिर्डीची व्यवस्था अधिक सुकर होईल, अशी अपेक्षा व्यक्त केली जात आहे.
