गणेशोत्सवात रिक्षा चोरी करणारा आरोपी विश्रामबाग पोलिसांच्या जाळ्यात
गणेशोत्सवात रिक्षा चोरी करणारा आरोपी विश्रामबाग पोलिसांच्या जाळ्यात
पुण्यात गणपती उत्सवाच्या गर्दीचा फायदा घेत रिक्षा चोरी करणारा आरोपी पोलिसांनी जेरबंद केला. आरोपीकडून ७५,००० रुपयांची रिक्षा जप्त; विश्रामबाग पोलिसांची कारवाई.
सायली मेमाणे
पुणे १८ सप्टेंबर २०२५ : पुणे शहरात सुरू असलेल्या गणेशोत्सवाच्या गर्दीचा फायदा घेत चोरट्यांनी वेगवेगळ्या भागात सक्रियता वाढवली आहे. अशाच एका घटनेत शनिवार वाडा परिसरातून एक रिक्षा चोरीस गेल्याची नोंद झाली होती. मात्र विश्रामबाग पोलिसांच्या दक्ष तपासामुळे आरोपीला अखेर जेरबंद करण्यात आले असून त्याच्याकडून तब्बल ७५,००० रुपयांची काळ्या-पिवळ्या रंगाची ऑटो रिक्षा जप्त करण्यात आली आहे.
घटना ३१ ऑगस्ट २०२५ रोजी रात्री १० वाजता ते १ सप्टेंबरच्या पहाटे १ वाजेदरम्यान घडली. फिर्यादी यांनी शनिवार वाडा आऊट गेट शेजारील फुटपाथलगत त्यांची ऑटो रिक्षा लॉक करून पार्क केली होती. गणेशोत्सवाच्या गडबडीत गर्दी आणि गोंधळाचा फायदा घेत एका अज्ञात चोरट्याने रिक्षा चोरून नेली. फिर्यादीने तात्काळ पोलिसांकडे तक्रार दिली आणि गुन्हा विश्रामबाग पोलीस ठाण्यात नोंदविण्यात आला. गुन्हा दाखल झाल्यानंतर वरिष्ठ पोलीस निरीक्षक विजयमाला पवार यांनी सहायक पोलीस निरीक्षक राजेश उसगावकर आणि त्यांच्या पथकाला तपासाचे आदेश दिले.
तपास पथकाने सीसीटीव्ही फुटेज, तांत्रिक विश्लेषण आणि गुप्त माहितीच्या आधारे आरोपीचा माग काढण्याचे काम सुरू केले. अथक तपासानंतर पोलिसांना हा गुन्हा सिद्धाराम तुकाराम शिंदे (वय ३०, रा. गंधर्व बिल्डिंगसमोर, ससाणेनगर हडपसर, मूळ पत्ता विजापुर वेस, दक्षिण सोलापूर) याने केल्याचे स्पष्ट झाले. पोलिसांनी अचूक माहितीच्या आधारे आरोपीला बाजीराव रोड परिसरातून ताब्यात घेतले. त्याच्याकडून चोरीस गेलेली एमएच-१४ एचएम-०२७१ क्रमांकाची बजाज कंपनीची काळ्या-पिवळ्या रंगाची ऑटो रिक्षा जप्त करण्यात आली.
ही यशस्वी कारवाई अप्पर पोलीस आयुक्त (पश्चिम प्रादेशिक विभाग) राजेश बनसोडे, उप-आयुक्त (परिमंडळ-०१) कृषीकेश रावले आणि सहाय्यक पोलीस आयुक्त साईनाथ ठोंबरे यांच्या मार्गदर्शनाखाली पार पडली. वरिष्ठ पोलीस निरीक्षक विजयमाला पवार, पोलीस निरीक्षक (गुन्हे) अरुण घोडके, सहायक पोलीस निरीक्षक राजेश उसगावकर यांच्या नेतृत्वाखाली तपास पथकाने हा गुन्हा उघडकीस आणला. पोलिस अंमलदार गणेश काठे, अमोल भोसले, राहुल मोरे, आशिष खरात, अनिष शेख, अर्जुन थोरात, नितीन बाबर, सागर मोरे आणि शिवा गायकवाड यांनी कारवाईत मोलाची भूमिका बजावली.
गणेशोत्सवाच्या दिवसांत पुण्यात प्रचंड गर्दी असल्यामुळे वाहन चोरी, पाकीटमारी आणि चेन स्नॅचिंगसारख्या गुन्ह्यांची शक्यता वाढते. पोलिसांनी नागरिकांना सावधगिरी बाळगण्याचे आवाहन केले आहे. वाहन पार्क करताना सुरक्षित ठिकाणाची निवड करणे, लॉकिंग सिस्टीम व्यवस्थित वापरणे आणि संशयास्पद हालचाली दिसल्यास तात्काळ पोलिसांना माहिती देणे गरजेचे असल्याचेही त्यांनी सांगितले आहे.
या संपूर्ण प्रकरणामुळे पोलिसांच्या वेगवान कारवाईमुळे गणेशोत्सवाच्या काळात नागरिकांच्या सुरक्षेबाबत दिलासा निर्माण झाला असून चोरट्यांना धडा शिकवला गेला आहे. अशा प्रकारे पोलिसांनी दाखवलेली तत्परता आणि तांत्रिक तपासामुळे गुन्हेगारीवर नियंत्रण ठेवण्यास निश्चितच मदत होत असल्याचे स्पष्ट झाले आहे.
