Gig Workers Strike: स्विगी, झोमॅटो, ओला-उबेर, झेप्टो सेवा बंद; गिग वर्कर्सचा देशव्यापी संप, कारण काय?

इंधन दरवाढीच्या निषेधार्थ १६ मे रोजी गिग वर्कर्सचा देशव्यापी संप. स्विगी, झोमॅटो, झेप्टो, ओला, उबर, रॅपिडो आणि अ‍ॅमेझॉन डिलिव्हरी सेवा दुपारी १२ ते सायंकाळी ५ बंद राहणार. गिग वर्कर्सच्या मागण्या जाणून घ्या.

पुणे १६ मे २०२६ : देशात वाढत्या महागाईमुळे सर्वसामान्यांसोबतच ॲप-आधारित सेवांमध्ये काम करणाऱ्या गिग वर्कर्सवरही मोठा आर्थिक ताण निर्माण झाला आहे. एलपीजी, सीएनजी, दूध आणि पेट्रोल-डिझेलच्या किमतीत झालेल्या वाढीच्या पार्श्वभूमीवर गिग वर्कर्सनी देशव्यापी संपाची घोषणा केली आहे. १६ मे रोजी दुपारी १२ ते सायंकाळी ५ या वेळेत अनेक लोकप्रिय ॲप-आधारित सेवा तात्पुरत्या बंद ठेवण्यात येणार असल्याची माहिती गिग-प्लॅटफॉर्म सर्व्हिस वर्कर्स युनियन (GIPSWU) ने दिली आहे.

या संपात Swiggy, Zomato, Blinkit, Zepto, Ola, Uber, Rapido तसेच Amazon डिलिव्हरी सेवांमध्ये कार्यरत असलेले कोटी गिग वर्कर्स सहभागी होणार आहेत. यामुळे या वेळेत ग्राहकांना अन्न डिलिव्हरी, किराणा डिलिव्हरी, कॅब सेवा आणि बाईक टॅक्सी सेवा उपलब्ध होणार नाहीत.

युनियनच्या म्हणण्यानुसार, अलीकडे पेट्रोल-डिझेलच्या किमतीत तीन रुपयांची वाढ झाली असून, याचा थेट परिणाम गिग वर्कर्सच्या रोजच्या कमाईवर होत आहे. बहुतेक गिग वर्कर्स हे स्वतःच्या दुचाकीवर अवलंबून असतात. दिवसाला अनेक किलोमीटर प्रवास करून ऑर्डर्स पूर्ण कराव्या लागतात. मात्र इंधनदर वाढल्याने त्यांच्या खर्चात वाढ होत असून, त्यांना मिळणाऱ्या प्रति किलोमीटर दरात कोणतीही वाढ झालेली नाही. त्यामुळे त्यांच्या हातात उरणारी रक्कम लक्षणीयरीत्या कमी होत आहे.

GIPSWU ने स्पष्ट केले आहे की, हा संप कोणत्याही कंपनीविरोधात नसून वाढत्या महागाईविरोधात आणि योग्य मोबदल्याच्या मागणीसाठी आहे. गिग वर्कर्सनी प्रति किलोमीटर किमान २० रुपये सर्व्हिस रेट निश्चित करण्याची मागणी केली आहे. इंधनाच्या किमती वाढल्यास त्या प्रमाणात दर वाढवण्यासाठी सरकारने मार्गदर्शक तत्त्वे जारी करावीत, अशीही मागणी करण्यात आली आहे.

गेल्या काही वर्षांत गिग इकॉनॉमी वेगाने वाढली आहे. हजारो तरुणांनी फूड डिलिव्हरी, कॅब सेवा, क्विक कॉमर्स डिलिव्हरी यांसारख्या क्षेत्रात रोजगार मिळवला. मात्र या क्षेत्रात काम करणाऱ्यांना निश्चित पगार, विमा किंवा इंधन भत्ता नसल्याने ते पूर्णपणे ऑर्डरवर अवलंबून असतात. त्यामुळे इंधनदर वाढ ही त्यांच्यासाठी थेट आर्थिक संकट ठरते.

या संपामुळे नागरिकांना काही तास गैरसोयीचा सामना करावा लागू शकतो. दुपारच्या वेळेत फूड डिलिव्हरी आणि कॅब सेवा उपलब्ध नसल्याने अनेकांना पर्यायी व्यवस्था करावी लागेल. मात्र गिग वर्कर्सचा प्रश्न आणि त्यामागील आर्थिक वास्तव समजून घेत अनेक नागरिकांनी सोशल मीडियावर या संपाला पाठिंबा दर्शवला आहे.

गिग वर्कर्सनी सरकारकडे आणि संबंधित कंपन्यांकडे त्यांच्या मागण्यांवर सकारात्मक विचार करण्याचे आवाहन केले आहे. वाढत्या महागाईच्या काळात गिग वर्कर्सचे उत्पन्न टिकवून ठेवण्यासाठी धोरणात्मक निर्णय घेणे गरजेचे असल्याचे युनियनचे मत आहे. या संपानंतर चर्चेच्या माध्यमातून तोडगा निघेल, अशी अपेक्षा व्यक्त केली जात आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts