Kalyan News: दुर्गाडी किल्ला परिसरात नमाजावरून वाद; मंदिर प्रवेशबंदीवर हिंदू संघटनांचा आक्रमक इशारा

कल्याणच्या दुर्गाडी किल्ला परिसरात बकरी ईदच्या दिवशी होणाऱ्या नमाज पठण आणि मंदिर प्रवेशबंदीवरून भाजप व हिंदुत्ववादी संघटना आक्रमक झाल्या आहेत. आंदोलनाचा इशारा देत पोलिस प्रशासनाकडे निवेदन सादर.

पुणे २१ मे २०२६ : कल्याणमधील दुर्गाडी किल्ला परिसर पुन्हा एकदा धार्मिक आणि सामाजिक चर्चेच्या केंद्रस्थानी आला आहे. बकरी ईदच्या दिवशी ईदगाह परिसरात होणाऱ्या नमाज पठणाच्या पार्श्वभूमीवर भाजप आणि हिंदुत्ववादी संघटनांनी आक्रमक भूमिका घेत पोलिस प्रशासनाकडे महत्त्वाच्या मागण्या मांडल्या आहेत. सार्वजनिक रस्त्यांवर नमाज पठणास परवानगी देऊ नये आणि त्याचवेळी दुर्गाडी मंदिरात हिंदू भाविकांना प्रवेश द्यावा, अशी मागणी करण्यात आली आहे. अन्यथा हनुमान चालीसा आणि दुर्गा स्तोत्र पठण आंदोलन करण्यात येईल, असा इशाराही देण्यात आला आहे.

या संदर्भात भाजप नगरसेवक महेश पाटील आणि हिंदुत्ववादी संघटनांच्या प्रतिनिधींनी कल्याणचे पोलीस उपायुक्त अतुल झेंडे यांची भेट घेत निवेदन सादर केले. या निवेदनात दुर्गाडी किल्ला परिसरातील ईदगाहवर बकरी ईदच्या दिवशी मोठ्या प्रमाणावर नमाज पठण होत असताना आसपासच्या रस्त्यांवर वाहतूक आणि हालचालींवर निर्बंध येतात, असा मुद्दा उपस्थित करण्यात आला आहे.

याशिवाय नमाज पठण सुरू असताना दुर्गाडी मंदिरात हिंदू भाविकांना प्रवेश दिला जात नसल्याची तक्रारही करण्यात आली आहे. दोन समाजांमध्ये कोणताही तणाव निर्माण होऊ नये आणि कायदा-सुव्यवस्था अबाधित राहावी यासाठी पोलीस प्रशासन अशा प्रकारचे निर्बंध घालत असल्याचे सांगितले जाते. मात्र, सर्व धर्मीयांना समान वागणूक मिळायला हवी, अशी भूमिका हिंदुत्ववादी संघटनांनी घेतली आहे.

मागील अनेक वर्षांपासून बकरी ईदच्या दिवशी या मुद्द्यावरून दुर्गाडी परिसरात वातावरण तापत असल्याचे पाहायला मिळते. हिंदुत्ववादी संघटना आणि शिवसेनेच्या कार्यकर्त्यांकडून घंटानाद आंदोलन किंवा धार्मिक पठणाचे कार्यक्रम घेतले जातात. “मंदिरात हिंदूंनाच प्रवेशबंदी का?” असा सवाल उपस्थित करत या संघटना पोलिस प्रशासनाच्या निर्णयावर नाराजी व्यक्त करत आहेत.

यंदाही याच पार्श्वभूमीवर आंदोलनाचा इशारा देण्यात आला आहे. हिंदुत्ववादी संघटनांच्या कार्यकर्त्यांनी पोलिसांकडे सार्वजनिक रस्त्यांवर नमाज होऊ नये यासाठी योग्य नियोजन करण्याची मागणी केली आहे. तसेच दुर्गाडी मंदिर परिसरात हिंदू भाविकांना निर्बंधांशिवाय प्रवेश देण्यात यावा, असेही त्यांनी स्पष्ट केले आहे.

“जर आमच्या मागण्यांकडे दुर्लक्ष झाले, तर बकरी ईदच्या दिवशी दुर्गाडी परिसरात हनुमान चालीसा आणि दुर्गा स्तोत्र पठण करून आंदोलन करण्यात येईल,” असा इशारा भाजप नगरसेवक महेश पाटील यांनी दिला आहे. त्यामुळे आगामी काळात या मुद्द्यावरून वातावरण आणखी तापण्याची शक्यता व्यक्त केली जात आहे.

दरम्यान, या संपूर्ण प्रकरणावर प्रशासनाने अद्याप अधिकृत भूमिका स्पष्ट केलेली नाही. मात्र, सणांच्या काळात कायदा आणि सुव्यवस्था राखण्यासाठी पोलीस प्रशासन परिस्थितीवर बारकाईने लक्ष ठेवून असल्याची माहिती सूत्रांकडून मिळत आहे. संवेदनशील परिसर असल्यामुळे मोठा पोलीस बंदोबस्त तैनात केला जाण्याची शक्यता आहे.

दुर्गाडी किल्ला आणि मंदिर परिसर हा कल्याणमधील ऐतिहासिक आणि धार्मिकदृष्ट्या महत्त्वाचा भाग मानला जातो. त्यामुळे येथे उद्भवणाऱ्या कोणत्याही वादाकडे स्थानिकांसह राजकीय आणि सामाजिक संघटनांचे विशेष लक्ष असते. आता प्रशासन कोणता निर्णय घेते आणि दोन्ही बाजूंच्या मागण्यांमध्ये समतोल कसा साधते, याकडे सर्वांचे लक्ष लागले आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts