Navi Mumbai Crime | वाशीतील 71 वर्षीय ज्येष्ठाची दीड कोटींची सायबर फसवणूक; ‘WhatsApp विद्यापीठा’वर विश्वास ठेवल्याची मोठी किंमत
वाशीतील 71 वर्षीय ज्येष्ठाची दीड कोटींची सायबर फसवणूक; ‘WhatsApp विद्यापीठा’वर विश्वास ठेवल्याची मोठी किंमत
नवी मुंबईत वाशीतील 71 वर्षीय ज्येष्ठाची WhatsApp गुंतवणूक ग्रुपच्या आमिषाला बळी जाऊन 1.60 कोटींची फसवणूक. बनावट अॅप, फेक डॅशबोर्ड आणि ऑनलाइन लिंकद्वारे गुन्हा; सायबर पोलिस तपास सुरू.
पुणे ४ डिसेंबर २०२५ : नवी मुंबई : ‘व्हॉट्सअॅप विद्यापीठा’वर आंधळा विश्वास ठेवण्याची किंमत एका ज्येष्ठ नागरिकाला तब्बल दीड कोटी रुपयांनी चुकवावी लागली आहे. सोशल मीडियावर शेअर मार्केट, ऑनलाइन गुंतवणूक, झटपट नफा अशा आकर्षक ऑफर्सचा वर्षाव केला जातो आणि त्यातील माहिती खरी आहे की नाही, याची अनेकदा शहानिशा केली जात नाही. वाशी येथील ७१ वर्षीय विपिन रमणीकलाल गांधी यांच्यासोबतही अशीच धक्कादायक घटना घडली असून हा प्रकार नवी मुंबई सायबर पोलीस ठाण्यात नोंदवण्यात आला आहे. शेअर मार्केट आणि IPO मधून प्रचंड नफा मिळवून देण्याचे स्वप्न दाखवत सायबर गुन्हेगारांनी त्यांच्याकडून तब्बल 1,60,50,000 रुपये उकळल्याचे तपासात समोर आले आहे.
पीडित व्यक्ती विपिन गांधी हे ट्रान्सपोर्ट व्यवसायात असून त्यांना गुंतवणुकीबाबत आकर्षक ऑफर देत एका WhatsApp ग्रुपमध्ये जोडण्यात आले. “NB-Deposit Services WB1120” असे नाव असलेल्या या ग्रुपमध्ये विविध प्रकारच्या गुंतवणुकीची माहिती देण्यात येत होती. विश्वास संपादन करण्यासाठी या ग्रुपमध्ये शेअर मार्केटमधील तज्ज्ञ असल्याचे भासवणारे मेसेजेस, गुंतवणुकीचे स्क्रीनशॉट, आणि झटपट नफा दाखवणारे पोस्ट्स पाठवले जात होते. याच माध्यमातून गुंतवणूक केली तर अल्पावधीत मोठा फायदा मिळेल, असे सांगत पीडितांची दिशाभूल करण्यात आली.
सायबर गुन्हेगारांनी यासाठी अत्यंत नियोजनपूर्वक पद्धत अवलंबली होती. त्यांनी “NB TRUSTED PARTNER” नावाचे एक बनावट अॅप तयार केले आणि m.nbinvests.com या लिंकद्वारे गुंतवणुकीचे खोटे डॅशबोर्ड दाखवले. या डॅशबोर्डवर नफा वाढत असल्याचे, गुंतवणुकीचा परतावा मिळत असल्याचे, आणि प्रत्येक व्यवहार अधिकृत असल्याचे भासवण्यात आले. 6 नोव्हेंबर ते 27 नोव्हेंबर 2025 या कालावधीत पीडितांना वेगवेगळ्या बँक खात्यांमध्ये रक्कम ट्रान्सफर करण्याचे निर्देश देण्यात आले. ‘अधिक गुंतवणूक करा, तोटा होणार नाही’ असे खोटे आश्वासन देत गुन्हेगारांनी एकूण दीड कोटी रुपयांची फसवणूक केली. तपासानंतर हे सर्व डॅशबोर्ड, व्यवहार, नफा आणि रिपोर्ट हे बनावट असल्याचे निश्चित झाले.
या प्रकरणातील आरोपींमध्ये WhatsApp ग्रुपचे अॅडमिन, फसवणूक करणाऱ्या मोबाइल क्रमांकांचे वापरकर्ते, बनावट अॅप आणि वेबसाईटचे निर्माते तसेच विविध बँक खात्यांचे धारक यांचा समावेश आहे. सर्व आरोपी सध्या फरार असून नवी मुंबई सायबर पोलीस त्यांचा शोध घेत आहेत. पोलीस आयुक्त मिलिंद भारंबे यांच्या मार्गदर्शनाखाली सायबर गुन्ह्यांविषयी जनजागृती मोहीम राबवली जात असली तरी लालसा आणि भीती दाखवून होणाऱ्या ऑनलाइन फसवणुकीचे प्रमाण दिवसेंदिवस वाढत आहे.
सायबर फसवणूक प्रामुख्याने दोन प्रकारे केली जाते — भीती दाखवून आणि लालसा दाखवून. भीती दाखवून बँक तपशील किंवा ओटीपी विचारले जातात, तर लालसा दाखवून शेअर मार्केट, क्रिप्टो किंवा IPO मध्ये मोठा नफा मिळेल असे सांगितले जाते. नागरिकांनी कोणत्याही अज्ञात लिंकवर क्लिक न करणे, प्रमाणित नसलेल्या अॅप्स डाउनलोड न करणे, अनोळखी खात्यांमध्ये पैसे ट्रान्सफर न करणे हे नियम कटाक्षाने पाळणे आवश्यक आहे.
फसवणूक झाल्यास तात्काळ 1930 या सायबर हेल्पलाइनवर संपर्क साधावा किंवा जवळच्या सायबर पोलीस ठाण्यात तक्रार नोंदवावी. नवी मुंबई पोलिसांकडून शाळा, महाविद्यालये आणि सोसायट्यांमध्ये सतत सायबर जागरूकता कार्यक्रम घेण्यात येत असले तरी नागरिकांनी सजग राहणे अत्यावश्यक आहे, अन्यथा ‘WhatsApp विद्यापीठा’वरील चुकीच्या माहितीकडून होणारे नुकसान भविष्यात आणखी वाढू शकते.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
