पुणे विभागातील RPF–GRP संयुक्त कारवाई; सांसी गँगचे ५ सदस्य अटक, प्रवाशांच्या सोन्याच्या चोरीचा उलगडा
पुणे विभागातील RPF–GRP संयुक्त कारवाई; संस्की गँगचे ५ सदस्य अटक, प्रवाशांच्या सोन्याच्या चोरीचा उलगडा
पुणे RPF–GRP संयुक्त टीमने मोठी कारवाई करत २६ नोव्हेंबरला एक्सप्रेस ट्रेनमध्ये झालेल्या ८.१४ लाखांच्या सोन्या चोरीचा छडा लावला. संस्की गँगचे ५ आरोपी दिल्लीमध्ये पकडले; तपास सुरु.
पुणे, ३ डिसेंबर २०२५: पुणे मंडळातील रेल्वे सुरक्षा यंत्रणेने मोठे यश मिळवत उच्च-मूल्य सोन्याच्या चोरीचा गुन्हा अवघ्या काही दिवसांत उघडकीस आणला असून कुख्यात सांसी गँगच्या पाच आरोपींना अटक करण्यात आली आहे. रेल्वे संरक्षण दल (RPF) पुणे विभाग, क्राईम इंटेलिजन्स ब्रांच (CIB/PA), तेजस्विनी CPDS टीम, स्थानिक गुन्हे शाखा (LCB) पुणे आणि जीआरपी मिरज यांच्या संयुक्त कारवाईतून हा गुन्हा उकलण्यात आला. २६ नोव्हेंबर २०२५ रोजी गांधीनगर–बेंगळुरू एक्सप्रेस (गाडी क्रमांक १६५०५) मध्ये प्रवास करणाऱ्या एका महिला प्रवाशाचे २३३ ग्रॅम (२३.८ तोळे) सोन्याचे दागिने चोरीस गेले होते. या सोन्याची अंदाजे किंमत ८,१४,५०० रुपये इतकी होती. हा गुन्हा सांगली ते मिरज या दरम्यान घडला होता.
तक्रार दाखल झाल्यानंतर जीआरपी मिरजकडून गुन्हा क्रमांक ११७/२०२५ अंतर्गत कलम ३०३ आणि ३०५(C) नुसार गुन्हा नोंदविण्यात आला. प्रकरणाची गंभीरता लक्षात घेऊन पुणे विभागाने तात्काळ तेजस्विनी CPDS टीम सक्रिय करून बहुआयामी तपासाला सुरूवात केली. मिरज यार्डमधील CCTV फुटेजमधून पहिल्या संशयिताची ओळख पटली. तांत्रिक तपास, डम्प डेटा विश्लेषण, टॉवर लोकेशन ट्रेसिंग यांसारख्या डिजिटल तपासणी पद्धतींच्या आधारे तपास पथक सांगली बसस्थानक परिसरात पोहोचले, जिथे आठ संशयितांची हालचाल आढळली.
गुप्त माहितीच्या आधारे पाच मुख्य आरोपींचा मागोवा घेताना तपास पथक त्यांना कोल्हापूरमार्गे गोवा एअरपोर्टवर पोहोचल्याचे निष्पन्न झाले. त्यानंतर सातत्याने केलेल्या ट्रॅकिंगनुसार हे आरोपी ३० नोव्हेंबर रोजी गोवा–दिल्ली 6E 542 या उड्डाणाने दिल्लीला रवाना झाल्याची खात्री झाली. पुणे RPF, GRP आणि दिल्ली क्राईम ब्रँच यांच्यात तातडीने समन्वय साधत सर्व पाच आरोपींना नवी दिल्ली रेल्वे स्थानकावर पकडण्यात आले. पुण्याहून गेलेल्या संयुक्त पथकाने ३० नोव्हेंबर रोजी आरोपींची ताब्यात घेऊन त्यांना आज पुण्यात आणण्यात आले.
अटक केलेल्या आरोपींची नावे पुढीलप्रमाणे आहेत: कुलदीप (३४, जिंद – हरियाणा), अमित कुमार (३५, भिवानी – हरियाणा), मोनू (३२, भिवानी – हरियाणा), अजय (३६, जिंद – हरियाणा) आणि हवा सिंह (६५, जिंद – हरियाणा). चौकशीत आरोपींनी २६ नोव्हेंबर रोजी गाडी क्रमांक १६५०५ मध्ये चोरी केल्याची कबुली दिली आहे. चोरी गेलेल्या सोन्याची पूर्ण वसुली करण्याचे काम सुरू असून पुढील तपास जीआरपी मिरज यांच्या मार्फत केला जात आहे.
या संपूर्ण प्रकरणातून एकदा पुन्हा सिद्ध झाले की RPF–GRP पुणे विभागातील पथके सतर्क, कुशल आणि प्रभावी समन्वय राखत प्रवासी सुरक्षेसाठी उच्च पातळीवर कार्यरत आहेत. प्रवाशांच्या सुरक्षेला प्राधान्य देत संघटित गुन्हेगारीविरुद्ध कठोर कारवाई करण्याचे धोरण या यशस्वी ऑपरेशनमुळे स्पष्ट झाले आहे. रेल्वेमध्ये प्रवासी सुरक्षा वाढवण्यासाठी तांत्रिक तपास, डिजिटल विश्लेषण आणि राज्यांतर समन्वयाचा प्रभावी वापर करणारे हे ऑपरेशन आदर्श उदाहरण ठरले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
