Navi Mumbai News: नवी मुंबईच्या उत्तम डे यांची हिमालयात उत्तुंग भरारी 5,289 मीटर उंच ‘फ्रेंडशिप पीक’वर फडकवला तिरंगा

नवी मुंबईचे गिर्यारोहक उत्तम डे यांनी हिमाचल प्रदेशातील 5,289 मीटर उंचीचे फ्रेंडशिप पीक यशस्वीरीत्या सर करत भारतीय तिरंगा फडकावला.

पुणे २३ जून २०२६ : नवी मुंबईतील गिर्यारोहक आणि साहसी क्रीडाप्रेमी उत्तम डे यांनी हिमाचल प्रदेशातील हिमालय पर्वतरांगांमध्ये वसलेल्या 5,289 मीटर (17,353 फूट) उंचीच्या ‘फ्रेंडशिप पीक’वर यशस्वी चढाई करत भारतीय तिरंगा अभिमानाने फडकावला आहे. त्यांच्या या यशामुळे नवी मुंबईसह संपूर्ण महाराष्ट्राच्या शिरपेचात मानाचा तुरा खोवला गेला असून, गिर्यारोहण क्षेत्रात त्यांनी प्रेरणादायी कामगिरीची नोंद केली आहे.

हिमाचल प्रदेशातील पिर पंजाल पर्वतरांगेत असलेले ‘फ्रेंडशिप पीक’ हे भारतातील उच्च-उंचीच्या गिर्यारोहणासाठी अत्यंत आव्हानात्मक आणि लोकप्रिय शिखर मानले जाते. उत्तम डे यांची मोहीम मनाली येथून सुरू झाली. सोलंग व्हॅली, अल्पाइन कुरणे, मोरेन प्रदेश आणि हिमनद्यांनी वेढलेल्या कठीण भूभागातून प्रवास करत त्यांनी लोहाली, लेडी लेग आणि समिट कॅम्प अशा टप्प्यांमध्ये मुक्काम केला. प्रत्येक टप्प्यावर हवामानातील बदल, उणे तापमान आणि विरळ हवा यांसारख्या आव्हानांचा सामना करत त्यांनी आपला प्रवास सुरू ठेवला.

अंतिम चढाईसाठी 9 जूनच्या रात्री 11 वाजता त्यांनी समिट कॅम्पमधून प्रस्थान केले. हिमभेगा आणि हिमस्खलनाचा धोका लक्षात घेऊन ही रात्रभराची चढाई करण्यात आली. पहाटेच्या अनुकूल वातावरणाचा फायदा घेत त्यांनी 10 जून 2026 रोजी सकाळी 6.05 वाजता यशस्वीरीत्या शिखर गाठले. शिखरावर पोहोचताच भारतीय तिरंगा फडकावत त्यांनी देशाचा अभिमान उंचावला. त्या क्षणी त्यांच्या डोळ्यांत आनंदाश्रू दाटून आले आणि अनेक वर्षांच्या मेहनतीचे चीज झाल्याची भावना त्यांनी व्यक्त केली.

उत्तम डे यांनी आपल्या यशाचे श्रेय आई-वडिलांचे आशीर्वाद, ईश्वराची कृपा, अनुकूल हवामान आणि पर्वतांविषयी असलेल्या आदरभावाला दिले. त्यांच्या मते, पर्वत माणसाला केवळ शारीरिकच नव्हे तर मानसिकदृष्ट्याही मजबूत बनवतात. प्रत्येक आव्हान स्वीकारत पुढे जाण्याची प्रेरणा पर्वत देतात, असे त्यांनी सांगितले.

आपल्या प्रेरणादायी प्रवासाविषयी बोलताना उत्तम डे म्हणाले की, त्यांची उंची अवघी पाच फूट असल्यामुळे अनेकदा त्यांना कमी लेखले गेले. मात्र, पर्वतांनी त्यांना स्वतःवर विश्वास ठेवण्याची शिकवण दिली. “उंची नव्हे, तर मोठी स्वप्ने पाहण्याची हिंमत आणि ती पूर्ण करण्यासाठीची जिद्द महत्त्वाची असते,” असा संदेश त्यांनी तरुणांना दिला. कठीण परिस्थितीतही हार न मानता सातत्याने प्रयत्न करत राहिल्यास कोणतेही ध्येय अशक्य नसते, असेही त्यांनी सांगितले.

उत्तम डे यांच्या या ऐतिहासिक कामगिरीचे विविध स्तरांतून कौतुक होत असून, साहसी क्रीडा आणि गिर्यारोहण क्षेत्रात करिअर करू इच्छिणाऱ्या तरुणांसाठी त्यांचा प्रवास प्रेरणादायी ठरत आहे. नवी मुंबईच्या या यशस्वी गिर्यारोहकाने पुन्हा एकदा सिद्ध केले आहे की, आत्मविश्वास, चिकाटी आणि जिद्दीच्या बळावर कोणतेही शिखर सर करता येते.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts