पुनीत बालन यांची अखिल भारतीय हौशी कबड्डी महासंघाच्या अध्यक्षपदी बिनविरोध निवड 2026-30 कार्यकारिणी जाहीर

उद्योजक आणि क्रीडा प्रशासक पुनीत बालन यांची अखिल भारतीय हौशी कबड्डी महासंघाच्या (AKFI) अध्यक्षपदी बिनविरोध निवड झाली. रांची येथे झालेल्या निवडणुकीत 2026-30 कार्यकारिणीचीही घोषणा करण्यात आली.

पुणे २२ जून २०२६ : भारतीय कबड्डीसाठी महत्त्वाची घडामोड घडली असून, उद्योजक आणि क्रीडा प्रशासक पुनीत बालन यांची अखिल भारतीय हौशी कबड्डी महासंघाच्या (Amateur Kabaddi Federation of India – AKFI) अध्यक्षपदी बिनविरोध निवड झाली आहे. झारखंडमधील रांची येथे पार पडलेल्या महासंघाच्या निवडणुकीत देशभरातील 22 राज्य संघटनांच्या प्रतिनिधींच्या उपस्थितीत ही निवड प्रक्रिया पार पडली. यावेळी 2026 ते 2030 या कालावधीसाठी नव्या कार्यकारिणीचीही घोषणा करण्यात आली.

महाराष्ट्रातील उद्योगपती आणि क्रीडा क्षेत्रातील सक्रिय योगदानासाठी ओळख असलेल्या पुनीत बालन यांची सर्वानुमते अध्यक्षपदी निवड करण्यात आली. भारतीय कबड्डीला नवी दिशा देण्यासाठी आणि संघटनात्मक स्तरावर अधिक बळकट करण्यासाठी त्यांच्या नेतृत्वाकडून मोठ्या अपेक्षा व्यक्त केल्या जात आहेत.

नवीन कार्यकारिणीत विदर्भाचे माजी खासदार रामदास तडस यांची अध्यक्ष एमेरिटस (President Emeritus) म्हणून नियुक्ती करण्यात आली आहे. बिहारचे राजकुमार सिंह यांची मुख्य संरक्षक (Chief Patron) म्हणून निवड करण्यात आली, तर तेलंगणाच्या उषी रेड्डी यांची महासचिव (General Secretary) म्हणून बिनविरोध निवड झाली. याशिवाय विविध राज्यांतील प्रतिनिधींना कार्यकारिणीतील महत्त्वाच्या पदांवर संधी देण्यात आली असून, एकूण 22 पदाधिकाऱ्यांचा समावेश असलेली कार्यकारिणी जाहीर करण्यात आली.

ही निवडणूक प्रक्रिया माजी उच्च न्यायालयाचे न्यायमूर्ती रत्नाकर भेंगरा यांच्या देखरेखीखाली पार पडली. त्यांनी निवडणूक अधिकारी म्हणून जबाबदारी पार पाडली, तर निवृत्त जिल्हा न्यायाधीश पंकज श्रीवास्तव यांनी सहाय्यक निवडणूक अधिकारी म्हणून काम पाहिले. निवडणूक प्रक्रियेदरम्यान अरुण सिंह, डॉ. राजेश गुप्ता, विवेक रेड्डी, राहुल सिंह, चेतन गोविंद झा, राजेश सिंह, मनोज शर्मा, कुणाल एम. त्रिपाठी, सॅमी सिंह, सुजल केसरी आणि प्रदीप तिर्की यांच्यासह महासंघाचे अनेक पदाधिकारी उपस्थित होते.

अध्यक्षपदी निवड झाल्यानंतर पुनीत बालन यांनी सर्व राज्य संघटना आणि पदाधिकाऱ्यांचे आभार मानले. त्यांनी भारतीय कबड्डीला जागतिक स्तरावर अधिक सक्षम बनवण्याचा निर्धार व्यक्त केला. कबड्डी हा भारताचा पारंपरिक खेळ असून तो देशाच्या ग्रामीण संस्कृतीशी जोडलेला आहे. त्यामुळे ग्रामीण भागातील गुणवंत खेळाडूंना अधिक संधी उपलब्ध करून देणे, आधुनिक प्रशिक्षण सुविधा विकसित करणे, महिला आणि युवा कबड्डीपटूंना प्रोत्साहन देणे तसेच भारतीय कबड्डीला आंतरराष्ट्रीय स्तरावर अधिक यश मिळवून देण्यासाठी सर्व राज्य संघटनांच्या सहकार्याने काम केले जाईल, असे त्यांनी स्पष्ट केले.

पुनीत बालन हे गेल्या अनेक वर्षांपासून विविध क्रीडा स्पर्धा, युवा खेळाडू आणि क्रीडा विकास उपक्रमांना सातत्याने पाठबळ देत आहेत. त्यामुळे त्यांच्या नेतृत्वाखाली भारतीय कबड्डीला संघटनात्मक बळ, आधुनिक दृष्टीकोन आणि जागतिक स्तरावर नवी ओळख मिळेल, अशी अपेक्षा क्रीडा क्षेत्रातून व्यक्त केली जात आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts