Rain Update: जुलैच्या 9 दिवसांत पावसाचा जोर महाराष्ट्रातील जूनची तूट भरून निघाली, पुण्यात तब्बल 98% अधिक पाऊस

महाराष्ट्रात जुलैच्या पहिल्या 9 दिवसांत झालेल्या मुसळधार पावसामुळे जूनमधील पावसाची तूट भरून निघाली आहे. राज्यात सरासरीपेक्षा 5% अधिक पाऊस, तर पुण्यात तब्बल 98% अधिक पर्जन्यमानाची नोंद.

पुणे ११ जुलै २०२६ : महाराष्ट्रात जुलै महिन्याच्या सुरुवातीपासून सुरू झालेल्या मुसळधार पावसाने अवघ्या नऊ दिवसांत संपूर्ण चित्र पालटले आहे. जून महिन्याच्या अखेरीस अनेक भागांमध्ये पावसाची मोठी तूट जाणवत असताना, जुलैच्या पहिल्याच आठवड्यात झालेल्या जोरदार पावसामुळे ही तूट मोठ्या प्रमाणात भरून निघाली आहे. भारतीय हवामान विभागाच्या (IMD) १ जून ते ९ जुलै या कालावधीतील अहवालानुसार, राज्यात आतापर्यंत सरासरीपेक्षा ५ टक्के अधिक पावसाची नोंद झाली आहे.

अहवालानुसार, महाराष्ट्रात या कालावधीत ३००.४ मिमी इतक्या सरासरी पावसाची अपेक्षा होती. मात्र, प्रत्यक्षात ३१५.४ मिमी पावसाची नोंद झाली आहे. त्यामुळे राज्यात सरासरीपेक्षा अधिक पाऊस झाल्याचे स्पष्ट झाले आहे. जुलैच्या पहिल्या आठवड्यात कोकण, पश्चिम घाट आणि मध्य महाराष्ट्रातील अनेक भागांमध्ये मुसळधार ते अतिमुसळधार पावसाने हजेरी लावली. याच पावसामुळे राज्याच्या एकूण पर्जन्यमानात लक्षणीय वाढ झाली.

सर्वाधिक बदल मध्य महाराष्ट्रात दिसून आला आहे. जून महिन्याच्या अखेरीस या विभागात तब्बल ५७ टक्के पावसाची तूट होती. मात्र, जुलैच्या सुरुवातीच्या मुसळधार पावसानंतर परिस्थितीत मोठी सुधारणा झाली. २२१.९ मिमीच्या सरासरीच्या तुलनेत आतापर्यंत २६५.३ मिमी पावसाची नोंद झाली असून, विभाग आता सरासरीपेक्षा सुमारे २० टक्के अधिक पावसाच्या स्थितीत पोहोचला आहे.

कोकण-गोवा विभागातही पावसाने जोरदार हजेरी लावली आहे. या भागात १०१२ मिमी सरासरी पावसाच्या तुलनेत आतापर्यंत १२३०.८ मिमी पर्जन्यमान नोंदवले गेले आहे. म्हणजेच या विभागात २२ टक्के अधिक पाऊस झाला आहे. या सततच्या पावसामुळे अनेक नद्या आणि धरणांतील पाणीसाठ्यातही लक्षणीय वाढ झाली आहे.

दुसरीकडे, मराठवाडा आणि विदर्भात अजूनही अपेक्षेइतका पाऊस झालेला नाही. मराठवाड्यात १८१.६ मिमी सरासरीच्या तुलनेत केवळ १२९.४ मिमी पावसाची नोंद झाली असून, येथे २९ टक्के तूट कायम आहे. विदर्भातही २५७.४ मिमी सरासरीच्या तुलनेत २१६.६ मिमी पाऊस झाला असून, १६ टक्के पावसाची कमतरता नोंदवली गेली आहे.

यंदाच्या पावसाचा सर्वाधिक फायदा पुणे जिल्ह्याला झाला आहे. जिल्ह्यात आतापर्यंत २७५.१ मिमी सरासरीच्या तुलनेत तब्बल ५४४.८ मिमी पावसाची नोंद झाली आहे. म्हणजेच पुण्यात जवळपास ९८ टक्के अधिक पाऊस झाला आहे. या मुसळधार पावसामुळे अनेक ठिकाणी पूरस्थिती, दरडी कोसळणे आणि वाहतूक विस्कळीत होण्याच्या घटनाही घडल्या आहेत.

दरम्यान, सातारा जिल्ह्यातील जावळी तालुक्यातील सायघर गावात संततधार पावसामुळे एका घरावर दरड कोसळल्याची घटना घडली. संभाव्य धोका लक्षात घेऊन प्रशासनाने संबंधित कुटुंबाचे तातडीने सुरक्षितस्थळी स्थलांतर केले. स्थानिक प्रशासन परिस्थितीवर लक्ष ठेवून असून, नागरिकांनी हवामान विभागाच्या सूचनांचे पालन करण्याचे आवाहन करण्यात आले आहे.

Also Read: Pune’s Latest Information
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts