Sanjay Raut Health Update: संजय राऊत दोन महिने सार्वजनिक आयुष्यापासून दूर; प्रकृतीत गंभीर बिघाड
संजय राऊत दोन महिने सार्वजनिक आयुष्यापासून दूर; प्रकृतीत गंभीर बिघाड
शिवसेना (ठाकरे गट) नेते आणि राज्यसभेचे खासदार संजय राऊत यांच्या प्रकृतीत गंभीर बिघाड झाला असून, वैद्यकीय सल्ल्यानुसार ते दोन महिने सार्वजनिक आयुष्यापासून दूर राहणार आहेत. कार्यकर्त्यांना भावनिक पत्रातून त्यांनी ही माहिती दिली.
सायली मेमाणे
पुणे ३१ ऑक्टोबर २०२५ : मुंबई : शिवसेना (ठाकरे गट) चे नेते आणि राज्यसभेचे खासदार संजय राऊत यांच्या प्रकृतीबाबत मोठी बातमी समोर आली आहे. त्यांच्या प्रकृतीत गंभीर बिघाड झाल्याने ते तब्बल दोन महिने सार्वजनिक आयुष्यापासून दूर राहणार असल्याचे त्यांनी स्वतः कार्यकर्त्यांना लिहिलेल्या भावनिक पत्रातून जाहीर केले आहे. या पत्रामुळे संपूर्ण शिवसेना वर्तुळात आणि त्यांच्या समर्थकांमध्ये चिंतेचे वातावरण निर्माण झाले आहे.
संजय राऊत यांनी आपल्या पत्रात म्हटले आहे, “सर्व मित्र परिवार आणि कार्यकर्त्यांना नम्र विनंती, जय महाराष्ट्र! आपण सगळ्यांनी माझ्यावर कायम विश्वास ठेवला आणि प्रेम केले. पण सध्या अचानक माझ्या प्रकृतीत काही गंभीर स्वरूपाचे बिघाड झाल्याचे समोर आले आहे. माझ्यावर उपचार सुरू आहेत आणि मी यातून लवकरच बाहेर पडेन. वैद्यकीय सल्ल्यानुसार मला बाहेर जाणे आणि गर्दीत मिसळणे यावर निर्बंध घालण्यात आले आहेत. त्यास नाईलाज आहे. मला खात्री आहे की मी ठणठणीत बरा होऊन नवीन वर्षात पुन्हा आपल्या भेटीस येईन. आपले प्रेम आणि आशीर्वाद असेच राहू द्या.”
या पत्रातून त्यांनी आपल्या प्रकृतीची स्थिती स्पष्ट करत कार्यकर्त्यांना आश्वस्त केले आहे की, ते लवकरच बरे होऊन पुन्हा सक्रिय होतील. काही दिवसांपूर्वीच राऊत यांना अचानक तब्येतीचा त्रास झाल्याने मुंलुंड येथील फोर्टिस रुग्णालयात दाखल करण्यात आले होते. त्यांना घशाचा त्रास होत असल्याचे सांगण्यात आले होते. त्या वेळीही त्यांना काही दिवस विश्रांती घ्यावी लागली होती.
आता पुन्हा एकदा त्यांच्या प्रकृतीत बिघाड झाल्याने त्यांनी दोन महिन्यांसाठी सार्वजनिक कार्यक्रमांपासून आणि राजकीय कार्यातून विश्रांती घेण्याचा निर्णय घेतला आहे. त्यांच्या या निर्णयाला कार्यकर्त्यांनी समजून घेत त्यांना लवकर बरे होण्यासाठी शुभेच्छा दिल्या आहेत.
संजय राऊत हे बाळासाहेब ठाकरे यांचे अत्यंत विश्वासू आणि ठाकरे कुटुंबाचे निष्ठावंत शिवसैनिक म्हणून ओळखले जातात. ते ‘सामना’ या शिवसेनेच्या मुखपत्राचे संपादक आहेत. त्यांनी आपल्या लेख आणि भाषणांमधून शिवसेनेच्या भूमिकेचे ठामपणे समर्थन केले आहे. शिवसेनेच्या फुटीनंतर त्यांनी उद्धव ठाकरे यांच्या बाजूने उभे राहत शिंदे गटावर नेहमीच टीका केली आहे.
राज्य आणि देशातील राजकीय घडामोडींवर नेहमीच परखडपणे मत व्यक्त करणारे संजय राऊत हे ठाकरे गटातील आक्रमक नेते म्हणून प्रसिद्ध आहेत. त्यांनी अनेक वेळा भाजप व महायुतीवर थेट आरोप करत त्यांना कठोर शब्दांत प्रत्युत्तर दिले आहे. त्यामुळे त्यांच्या अनुपस्थितीने ठाकरे गटाच्या राजकीय रणनीतीवर काही काळ परिणाम होण्याची शक्यता वर्तवली जात आहे.
तथापि, त्यांच्या या निर्णयानंतर ठाकरे गटातील वरिष्ठ नेते आणि कार्यकर्त्यांनी त्यांना “आराम घ्या, लवकर बरे व्हा” अशा शुभेच्छा संदेशांचा वर्षाव केला आहे. महाराष्ट्रातील जनतेने आणि समर्थकांनीही सोशल मीडियावरून त्यांच्या लवकर बरे होण्यासाठी प्रार्थना व्यक्त केली आहे.
