डी. वाय. पाटील बी-स्कूलच्या माजी संचालकावर 4.98 कोटींच्या आर्थिक गैरव्यवहाराचा गुन्हा नेमकं प्रकरण काय?
डी. वाय. पाटील बी-स्कूलच्या माजी संचालकावर 4.98 कोटींच्या आर्थिक गैरव्यवहाराचा गुन्हा नेमकं प्रकरण काय?
पिंपरीतील डी. वाय. पाटील बी-स्कूलच्या माजी संचालकावर सुमारे 4.98 कोटी रुपयांच्या आर्थिक गैरव्यवहाराचा गुन्हा दाखल. प्रवेश प्रक्रिया, वेतन, शैक्षणिक सहली आणि डिजिटल पुरावे नष्ट केल्याचा आरोप.
पुणे ६ जुलै २०२६ : पिंपरी-चिंचवडमधील डी. वाय. पाटील बी-स्कूलमध्ये जवळपास 4 कोटी 98 लाख 66 हजार रुपयांच्या कथित आर्थिक गैरव्यवहाराचे प्रकरण उघडकीस आल्यानंतर संस्थेचे माजी संचालक अमोल आनंदराव गावंडे यांच्याविरोधात वाकड पोलिस ठाण्यात गुन्हा दाखल करण्यात आला आहे. प्रवेश प्रक्रिया, शिक्षकांचे वेतन, शैक्षणिक सहलींचा खर्च तसेच विविध आर्थिक व्यवहारांमध्ये अनियमितता केल्याचा आरोप त्यांच्यावर करण्यात आला असून या प्रकरणाचा तपास आर्थिक गुन्हे शाखेकडून सुरू आहे.
पोलिसांनी दिलेल्या माहितीनुसार, अमोल गावंडे हे संस्थेचे संचालक तसेच विद्यापीठाचे प्र-कुलगुरू म्हणून कार्यरत होते. संस्थेच्या दैनंदिन प्रशासनासह आर्थिक व्यवहार, प्रवेश प्रक्रिया, कर्मचाऱ्यांचे वेतन, प्रवेश सल्लागारांची बिले आणि विविध खर्चांना मंजुरी देण्याचे अधिकार त्यांच्या अखत्यारीत होते. ऑगस्ट 2025 मध्ये आर्थिक व्यवहारांमध्ये संशयास्पद बाबी समोर आल्यानंतर संस्थेने फॉरेन्सिक ऑडिट करण्याचा निर्णय घेतला. या ऑडिटचा अहवाल 12 जून 2026 रोजी प्राप्त झाला असून त्यामध्ये सुमारे पाच कोटी रुपयांच्या कथित गैरव्यवहाराचा उल्लेख करण्यात आला आहे.
तपासादरम्यान अनेक धक्कादायक बाबी समोर आल्या आहेत. प्रवेश रद्द झालेल्या विद्यार्थ्यांवरही प्रवेश सल्लागारांना कमिशन अदा करण्यात आल्याचा आरोप आहे. तसेच एका विद्यार्थ्याचे एकापेक्षा अधिक प्रवेश सल्लागारांशी मॅपिंग करून दुहेरी बिले तयार करण्यात आली. या प्रक्रियेद्वारे तब्बल 1 कोटी 8 लाख 50 हजार रुपयांचे अतिरिक्त कमिशन वितरित करण्यात आल्याचे फॉरेन्सिक अहवालात नमूद करण्यात आले आहे.
याशिवाय, बायोमेट्रिक उपस्थिती नसतानाही कर्मचारी आणि प्राध्यापकांच्या नावाने वेतनपत्रके तयार करून त्यांना पूर्ण वेतन मंजूर करण्यात आल्याचा आरोप आहे. या प्रकारातून संस्थेच्या निधीतून 3 कोटी 27 लाख 84 हजार रुपयांचे कथित अनियमित वितरण झाल्याचे समोर आले आहे. शैक्षणिक सहलींसाठी नियुक्त ट्रॅव्हल एजन्सीमार्फत प्रत्यक्ष खर्चापेक्षा अधिक रकमेची बिले सादर करून आर्थिक नुकसान केल्याचाही आरोप करण्यात आला आहे.
तपासात आणखी एक गंभीर बाब समोर आली असून संबंधितांच्या वैयक्तिक आयसीआयसीआय बँक खात्यात 42 लाख 35 हजार रुपये जमा झाल्याचे निष्पन्न झाले आहे. तसेच व्हिजिटिंग फॅकल्टीला अतिरिक्त 11 लाख 69 हजार रुपयांचे मानधन मंजूर करण्यात आले. गोवा फ्रेशर्स टूरमध्ये विद्यार्थ्यांची संख्या अधिक दाखवून 31 लाख 58 हजार रुपयांचे आर्थिक नुकसान झाल्याचाही दावा तक्रारीत करण्यात आला आहे.
संस्थेतील अंतर्गत चौकशी सुरू झाल्यानंतर अधिकृत लॅपटॉप फॉरमॅट करून त्यातील गोपनीय माहिती स्वतंत्र हार्डडिस्कमध्ये कॉपी केल्याचा आरोपही करण्यात आला आहे. याशिवाय अधिकृत ई-मेलवरील संवेदनशील माहिती वैयक्तिक ई-मेलवर पाठवून डिजिटल पुरावे नष्ट करण्याचा प्रयत्न झाल्याचेही फिर्यादीत नमूद करण्यात आले आहे. या पार्श्वभूमीवर भारतीय न्याय संहिता, 2023 तसेच माहिती तंत्रज्ञान कायद्यान्वये संबंधितांविरोधात गुन्हा दाखल करण्यात आला आहे.
सध्या या संपूर्ण प्रकरणाचा तपास आर्थिक गुन्हे शाखेकडून सुरू असून फॉरेन्सिक ऑडिटमधील निष्कर्ष, आर्थिक व्यवहारांची कागदपत्रे आणि डिजिटल पुरावे यांची सखोल छाननी केली जात आहे. तपास पूर्ण झाल्यानंतर या प्रकरणात आणखी काही महत्त्वाचे खुलासे होण्याची शक्यता व्यक्त केली जात आहे.
Also Read: Pune’s Latest Information
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
