“कदाचित हा माझा शेवटचा व्हिडिओ असेल…” प्रसाद वेदपाठकची भावनिक हाक जीवाला धोका असल्याचा गंभीर आरोप
"कदाचित हा माझा शेवटचा व्हिडिओ असेल..." प्रसाद वेदपाठकची भावनिक हाक जीवाला धोका असल्याचा गंभीर आरोप
घाटकोपरमधील पांढऱ्या पट्टीच्या वादानंतर सोशल मीडिया इन्फ्लुएन्सर प्रसाद वेदपाठकने भावनिक व्हिडिओ शेअर करत जीवाला धोका असल्याचा आरोप केला. खोटे गुन्हे दाखल करण्याचा प्रयत्न होत असल्याचाही दावा.
पुणे १८ जून २०२६ : मुंबईतील घाटकोपर परिसरातील एका गृहनिर्माण सोसायटीमध्ये जैन साधू-साध्वींच्या स्वागतासाठी मारण्यात आलेल्या पांढऱ्या पट्टीवरून सुरू झालेला वाद आता गंभीर वळणावर पोहोचला आहे. या प्रकरणात सोशल मीडिया इन्फ्लुएन्सर आणि युट्युबर प्रसाद वेदपाठक यांनी एक भावनिक व्हिडिओ शेअर करत स्वतःच्या आणि कुटुंबाच्या सुरक्षेबाबत गंभीर चिंता व्यक्त केली आहे. “कदाचित हा माझा शेवटचा व्हिडिओ असेल,” असे म्हणत त्यांनी मदतीचे आवाहन केले असून, आपल्यावर खोटे गुन्हे दाखल करण्याचा प्रयत्न सुरू असल्याचा आरोप केला आहे.
प्रसाद वेदपाठक यांनी शेअर केलेल्या व्हिडिओमध्ये 4 जूनपासून घडलेल्या घटनांचा तपशील दिला आहे. त्यांच्या म्हणण्यानुसार, संबंधित सोसायटीमध्ये आवश्यक परवानगी न घेता पांढरी पट्टी मारण्यात आल्याने वादाची सुरुवात झाली. त्यानंतर 8 आणि 9 जून रोजी त्यांनी आणि त्यांच्या कुटुंबीयांनी संबंधित व्यक्तींशी चर्चा केली. या चर्चेनंतर पट्टी मारणाऱ्यांनी ती स्वतःहून काढून घेतल्याचा दावा त्यांनी केला आहे.
प्रसाद यांच्या मते, 11 जूनपर्यंत हा वाद संपल्याचे वाटत असतानाच या प्रकरणाला वेगळे वळण मिळाले. त्यांनी आरोप केला की, स्थानिक लोकप्रतिनिधींनी पोलिसांकडे पत्र देऊन त्यांच्याविरोधात गुन्हा दाखल करण्याची मागणी केली. त्यानंतर या वादाला राजकीय आणि धार्मिक रंग देण्याचा प्रयत्न सुरू झाल्याचेही त्यांनी व्हिडिओमध्ये म्हटले आहे.
व्हिडिओमध्ये प्रसाद वेदपाठक अत्यंत भावनिक अवस्थेत दिसत असून, काही लोक आपला आणि कुटुंबीयांचा पाठलाग करत असल्याचा आरोप त्यांनी केला आहे. घरात माणसे पाठवून धमकावले जात असल्याचाही दावा त्यांनी केला. “मी घरातील कर्ता पुरुष आहे. माझ्या कुटुंबाच्या सुरक्षेची मला सर्वाधिक चिंता आहे. मी जे बोललोच नाही, त्या मुद्द्यांवरून माझ्याविरोधात कारवाई करण्याचा प्रयत्न होत आहे,” असे ते म्हणाले.
प्रसाद यांनी मुख्यमंत्री आणि न्यायव्यवस्थेकडेही मदतीचे आवाहन केले आहे. आपल्या जीवाचे काही बरे-वाईट झाल्यास या संपूर्ण प्रकरणाची सखोल चौकशी व्हावी, अशी विनंती त्यांनी केली. त्यांनी व्हिडिओमध्ये केलेले आरोप हे त्यांचे वैयक्तिक दावे असून, संबंधित यंत्रणांकडून त्याबाबत अधिकृत भूमिका अद्याप समोर आलेली नाही.
या संपूर्ण प्रकरणात महाराष्ट्र नवनिर्माण सेनेने आपल्याला पाठिंबा दिल्याचेही प्रसाद यांनी नमूद केले. त्यांनी मनसे नेते अविनाश जाधव आणि संदीप देशपांडे यांची भेट घेतल्याचे सांगितले असून, या प्रकरणाची वस्तुस्थिती त्यांना माहिती असल्याचा दावा केला आहे.
व्हिडिओच्या शेवटी प्रसाद वेदपाठक यांनी जैन समाजालाही भावनिक आवाहन केले. हा वाद कोणत्याही धर्माविरोधात नसून केवळ स्थानिक नियम आणि प्रक्रियेशी संबंधित असल्याचे त्यांनी स्पष्ट केले. सध्या आपल्याला केवळ न्याय आणि सुरक्षिततेची गरज असल्याचे सांगत त्यांनी समाजातील सर्व घटकांनी वस्तुस्थिती समजून घ्यावी, असे आवाहन केले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
