पुण्यात PNG गॅस जाळ्याचा मोठा विस्तार ३० जून अंतिम मुदत, ग्रामीण व औद्योगिक भागांना दिलासा

गॅस टंचाईच्या पार्श्वभूमीवर पुणे जिल्ह्यात PNG गॅस जाळ्याचा वेगवान विस्तार. ग्रामीण आणि औद्योगिक भागात पाइपलाइन कामांना गती; ३० जूनपर्यंत घरगुती लाईन्स पूर्ण करण्याचे आदेश.

पुणे १५ एप्रिल २०२६ : आखाती परिस्थितीमुळे निर्माण झालेल्या गॅस टंचाईच्या पार्श्वभूमीवर राज्य सरकारने पाइप्ड नॅचरल गॅस (PNG) संदर्भात महत्त्वाचे धोरणात्मक निर्णय घेतले असून, पुणे जिल्ह्यात ग्रामीण भाग आणि औद्योगिक वसाहतींमध्ये PNG जाळ्याचा मोठ्या प्रमाणावर विस्तार सुरू झाला आहे. घरगुती तसेच औद्योगिक वापरासाठी स्वस्त, सुरक्षित आणि सातत्यपूर्ण गॅसपुरवठा उपलब्ध करून देणे हा या उपक्रमामागील प्रमुख उद्देश आहे. शासनाने घरगुती वापरासाठी आवश्यक PNG लाईन्स ३० जूनपर्यंत पूर्ण करण्याचे स्पष्ट निर्देश दिल्याने प्रकल्पांना गती मिळाली आहे.

Maharashtra Natural Gas Limited कडून पुणे शहर आणि पिंपरी-चिंचवड परिसरात सेवा दिली जात असताना, ग्रामीण भागातील विस्तारीकरणाची जबाबदारी Torrent Gas या कंपनीकडे सोपविण्यात आली आहे. ग्रामीण औद्योगिक पट्ट्यात स्टील पाइपलाइन टाकण्याची कामे वेगाने सुरू असून, अनेक महत्त्वाच्या मार्गांवर प्रत्यक्ष काम प्रगतीपथावर आहे.

खेडगाव ते शेवाळवाडी दरम्यान २५ किमी लांबीची औद्योगिक लाईन प्रस्तावित असून त्यापैकी ४ किमीचे काम पूर्ण झाले आहे. राजगुरुनगर ते मंचर दरम्यान २० किमीची लाईन लवकरच सुरू होणार आहे. सारोळा ते खेड शिवापूर (२० किमी), रांजणगाव MIDC (४५ किमी), बारामती MIDC (४० किमी), तळेगाव MIDC (१५ किमी) आणि सणसवाडी MIDC (१० किमी) या औद्योगिक पट्ट्यांमध्ये पाइपलाइन टाकण्यात आल्या आहेत. या कामांमुळे उद्योगांना एलपीजी किंवा डिझेलवरील अवलंबित्व कमी करून स्वस्त PNG पर्याय उपलब्ध होणार आहे.

घरगुती वापरासाठीही विविध भागांत जाळे वाढविण्याची कामे सुरू आहेत. वाघोली येथे १५ किमीचे काम सुरू आहे. बारामतीमध्ये आधीच्या १५ किमी व्यतिरिक्त आणखी ३० किमी लाईन टाकली जाणार आहे. फुरसुंगी येथे ५ किमी, शिरूर येथे विद्यमान ५ किमीवरून १० किमीपर्यंत वाढ, राजगुरुनगर येथे ४ किमीवरून १० किमीपर्यंत विस्तार, बावधन येथे २ किमीवरून ७ किमीपर्यंत वाढ, तर सासवडमध्ये ३० किमीवरून आणखी १० किमी वाढविण्याचे काम सुरू आहे. केडगाव ते जेजुरी दरम्यान ३७ किमीची पाइपलाइन टाकण्याचे काम हाती घेण्यात आले असून ते पुढील एका वर्षात पूर्ण होण्याची अपेक्षा आहे.

पाइपलाइन टाकताना रस्त्यालगत होणाऱ्या कामांमुळे स्थानिकांकडून अडथळे निर्माण होत असल्याचे पूर्वी दिसून येत होते. मात्र, केंद्र सरकारच्या परिपत्रकानंतर आणि राज्य शासनाच्या सक्रिय समन्वयानंतर या कामांना मिळणारा विरोध लक्षणीयरीत्या कमी झाला आहे. स्थानिक प्रशासन, ग्रामपंचायती आणि संबंधित यंत्रणांच्या सहकार्यामुळे प्रकल्पांना गती मिळत आहे.

PNG जाळ्याच्या या व्यापक विस्तारामुळे ग्रामीण घरगुती ग्राहकांना सिलिंडरवरील अवलंबित्वातून मुक्तता मिळणार आहे. सुरक्षित, गळतीरोधक आणि सतत उपलब्ध असलेला गॅसपुरवठा मिळाल्याने दैनंदिन जीवन अधिक सोयीचे होईल. औद्योगिक क्षेत्रालाही उत्पादन खर्च कमी करण्यास मदत होऊन स्पर्धात्मकता वाढण्याची अपेक्षा आहे. एकूणच, ३० जूनची अंतिम मुदत लक्षात घेऊन सुरू असलेली ही मोहीम पुणे जिल्ह्यातील ऊर्जा पायाभूत सुविधांमध्ये महत्त्वाचा टप्पा ठरणार आहे.