फरार गॅंगस्टर निलेश घायवळचा ठावठिकाणा लागला! लंडनमध्ये असल्याची हाय कमिशनकडून पुणे पोलिसांना पुष्टी
फरार गॅंगस्टर निलेश घायवळचा ठावठिकाणा लागला! लंडनमध्ये असल्याची हाय कमिशनकडून पुणे पोलिसांना पुष्टी
पुण्यातील कुख्यात गॅंगस्टर निलेश घायवळच्या शोधाला अखेर यश मिळाले आहे. युके हाय कमिशनने पुणे पोलिसांना निलेश घायवळ सध्या लंडनमध्ये असल्याची अधिकृत माहिती दिली आहे. कोथरूड गोळीबारानंतर फरार झालेल्या घायवळविरुद्ध ब्लू कॉर्नर नोटीस जारी करण्यात आली होती.
सायली मेमाणे
पुणे ३० ऑक्टोबर २०२५ : पुण्यातील गुन्हेगारी विश्वात चर्चेत असलेला गॅंगस्टर निलेश घायवळ अखेर लंडनमध्ये असल्याचं स्पष्ट झालं आहे. पुणे पोलिसांना युके हाय कमिशनकडून मिळालेल्या अधिकृत माहितीनुसार निलेश घायवळ सध्या ब्रिटनमध्ये असल्याची पुष्टी करण्यात आली आहे. कोथरूडमध्ये झालेल्या गोळीबारानंतर घायवळ फरार झाला होता, त्यानंतर त्याचा ठावठिकाणा लागणे कठीण झालं होतं. अखेर दीर्घ काळाच्या शोधानंतर पोलिसांना या फरार गुंडाविषयी महत्त्वाची माहिती मिळाल्याने तपासाला मोठं वळण मिळालं आहे.
कोथरूड परिसरात काही महिन्यांपूर्वी झालेल्या गोळीबाराच्या घटनेनंतर निलेश घायवळ गँगच्या सदस्यांविरुद्ध गुन्हा दाखल झाला होता. या प्रकरणानंतर घायवळने परदेशात पलायन केलं होतं. पोलिसांनी त्याचा पासपोर्ट रद्द केला, तसेच आंतरराष्ट्रीय स्तरावर ब्लू कॉर्नर नोटीस जारी करून इंटरपोलमार्फत त्याचा शोध सुरू केला. तरीही त्याच्या ठिकाणाबाबत कोणतीही ठोस माहिती मिळत नव्हती.
दरम्यान, घायवळचा मुलगा लंडनमध्ये शिक्षण घेत असल्याची माहिती पोलिसांना मिळाली. त्यानंतर पुणे पोलिसांनी युके हाय कमिशनला अधिकृत पत्र लिहून निलेश घायवळच्या हालचालीबाबत चौकशीची मागणी केली होती. या पत्रावर कारवाई करत हाय कमिशनने आज पहाटे पोलिसांना उत्तर पाठवलं. त्यात निलेश घायवळ सध्या लंडनमध्ये असल्याची पुष्टी करण्यात आली. या माहितीनंतर पुणे पोलिसांनी संबंधित युके अधिकाऱ्यांशी संपर्क साधण्याची प्रक्रिया सुरू केली आहे.
घायवळवर यापूर्वी खंडणी, मारहाण, आणि शस्त्रास्त्रांच्या गैरवापरासह अनेक गुन्हे दाखल आहेत. त्याची गँग पुण्यातील बांधकाम व्यावसायिक, व्यापारी आणि इतरांकडून खंडणी उकळण्यात सक्रिय असल्याचं पोलिसांच्या तपासात समोर आलं होतं. कोथरूड गोळीबारानंतर शहरात मोठी खळबळ उडाली होती. या प्रकरणात काही साथीदारांना अटक झाली असली तरी निलेश घायवळ मात्र फरार राहिला होता.
आता हाय कमिशनकडून मिळालेल्या पुष्टीमुळे पोलिसांचे प्रयत्न यशस्वी ठरले असून, पुढील पायरी म्हणून घायवळच्या प्रत्यार्पणाची (extradition) प्रक्रिया सुरू होण्याची शक्यता व्यक्त केली जात आहे. पोलिस सूत्रांच्या माहितीनुसार, घायवळला भारतात आणण्यासाठी केंद्र सरकारमार्फत आवश्यक कागदपत्रांची देवाणघेवाण केली जाईल.
या घडामोडींमुळे पुणे पोलिसांनी शहरातील गँगवॉर आणि संघटित गुन्हेगारीविरोधात अधिक कडक भूमिका घेतली आहे. घायवळसारख्या फरार आरोपींना लवकरच न्यायाच्या कटघऱ्यात आणण्यासाठी आंतरराष्ट्रीय सहकार्याचा वापर वाढवला जाणार आहे.
