MSCB Scam: रोहित पवारांविरुद्ध ED कडून पुरवणी आरोपपत्र दाखल
रोहित पवारांविरुद्ध ED कडून पुरवणी आरोपपत्र दाखल
महाराष्ट्र सहकारी बँक घोटाळा प्रकरणात आमदार रोहित पवार व इतरांविरोधात ED ने पीएमएलए अंतर्गत पुरवणी आरोपपत्र दाखल केले.
सायली मेमाणे
मुंबई १२ july २०२५ : मुंबई – महाराष्ट्र राज्य सहकारी बँक (MSCB) घोटाळ्याशी संबंधित प्रकरणात अंमलबजावणी संचालनालयाने (ED) राष्ट्रवादी काँग्रेस (शरद पवार गट) पक्षाचे आमदार रोहित पवार आणि अन्य काही व्यक्तींविरुद्ध मनी लाँडरिंग प्रतिबंधक कायदा (PMLA), 2002 अंतर्गत पुरवणी आरोपपत्र दाखल केले आहे. हे आरोपपत्र मुंबईतील पीएमएलए विशेष न्यायालयात सादर करण्यात आले आहे.
मिळालेल्या माहितीनुसार, न्यायालयाने या आरोपपत्राची अद्याप औपचारिक दखल घेतलेली नाही. या पुरवणी आरोपपत्रामुळे या राजकीय प्रकरणात नवा टप्पा उलगडण्याची शक्यता निर्माण झाली आहे. या प्रकरणात यापूर्वीही अनेक मोठ्या नावांचा समावेश झाला होता, आणि ED ची तपास यंत्रणा गेल्या काही वर्षांपासून MSCB घोटाळ्याच्या आर्थिक व्यवहारांचा सखोल तपास करत आहे.
ED कडून दाखल करण्यात आलेल्या या आरोपपत्रात पवारांवर नेमकी कोणती कृत्ये केल्याचा ठपका आहे याची अधिकृत माहिती अद्याप समोर आलेली नाही. मात्र, या आरोपपत्रामुळे राजकीय वर्तुळात खळबळ उडाली असून, आगामी काळात कोर्टाच्या कार्यवाहीकडे सर्वांचे लक्ष लागले आहे.
या संदर्भात रोहित पवार किंवा राष्ट्रवादी काँग्रेस शरद पवार गटाकडून कोणतीही अधिकृत प्रतिक्रिया मिळालेली नाही. पण याआधी रोहित पवार यांनी या प्रकरणावर बोलताना “मी काहीही चुकलेलो नाही. कायद्याचा सन्मान करतो आणि सहकार्य करणार,” अशी भूमिका घेतली होती.
सहकारी बँक घोटाळ्याचा तपास ED, CBI आणि आर्थिक गुन्हे शाखा (EOW) अशा विविध एजन्सीद्वारे वेगवेगळ्या पद्धतीने सुरु आहे. या घोटाळ्यात कोट्यवधी रुपयांचा गैरव्यवहार झाल्याचा ठपका आहे, आणि शेतकरी सहकारी साखर कारखान्यांशी संबंधित व्यवहार केंद्रस्थानी आहेत.
या पुरवणी आरोपपत्रामुळे आता पुढील सुनावणी आणि न्यायालयीन प्रक्रियेचे वेळापत्रक काय असेल, याकडे लक्ष लागले आहे. राजकीयदृष्ट्या संवेदनशील ठरू शकणाऱ्या या प्रकरणाचा प्रभाव आगामी निवडणुकांवरही होऊ शकतो, असा तर्क विश्लेषक लावत आहेत.
Do-follow Links:
Instagram
YouTube
Facebook
Twitter
About The Author
