Tukaram Mundhe यांच्या विभागाची धडक कारवाई 12,278 लिटर दूध नष्ट, लाखोंचा मुद्देमाल जप्त, अन्न परवाने निलंबित
Tukaram Mundhe यांच्या विभागाची धडक कारवाई 12,278 लिटर दूध नष्ट, लाखोंचा मुद्देमाल जप्त, अन्न परवाने निलंबित
Tukaram Mundhe यांच्या नेतृत्वाखाली अन्न व औषध प्रशासनाची पुणे विभागात मोठी कारवाई. 12,278 लिटर दूध नष्ट, 13.71 लाखांचा मुद्देमाल जप्त, अनेक अन्न परवाने निलंबित.
पुणे ०१ जुलै २०२६ : ‘सेफ फूड, सेफ ड्रग, सेफ महाराष्ट्र’ मोहिमेअंतर्गत अन्न व औषध प्रशासनाने (FDA) पुणे विभागात अन्न सुरक्षा नियमांचे उल्लंघन करणाऱ्या आस्थापनांविरोधात मोठी कारवाई केली आहे. २५ ते २७ जूनदरम्यान पुणे आणि सोलापूर जिल्ह्यांत राबविण्यात आलेल्या विशेष तपासणी मोहिमेत सुमारे १३.७१ लाख रुपयांचा मुद्देमाल जप्त करून नष्ट करण्यात आला. याशिवाय अनेक दूध प्रक्रिया उद्योग, दुग्धजन्य पदार्थ उत्पादक आणि हॉटेल आस्थापनांचे अन्न परवाने तात्काळ निलंबित करण्यात आले आहेत.
या मोहिमेदरम्यान पुणे जिल्ह्यातील शिरूर तालुक्यातील गगनगिरी मिल्क अँड मिल्क प्रॉडक्ट्स येथे भेसळीचा संशय आल्याने तब्बल १२ हजार २७८ लिटर दूध नष्ट करण्यात आले. संबंधित आस्थापनाचा अन्न परवानाही निलंबित करण्यात आला. अन्न सुरक्षेच्या दृष्टीने ही कारवाई अत्यंत महत्त्वाची मानली जात असून निकृष्ट आणि संशयास्पद अन्नपदार्थांवर कठोर कारवाईचा इशारा प्रशासनाने दिला आहे.
आंबेगाव तालुक्यातील उमिया मिल्क प्रॉडक्ट्स येथेही तपासणीदरम्यान अस्वच्छ वातावरणात उत्पादन सुरू असल्याचे निदर्शनास आले. याठिकाणी १ हजार १५५ किलो एडिबल केसिनेट आणि कोयागुलम जप्त करण्यात आले. अन्न सुरक्षा नियमांचे गंभीर उल्लंघन झाल्याने या आस्थापनाचाही अन्न परवाना निलंबित करण्यात आला.
सोलापूर जिल्ह्यातील रामदेव डेरीमध्ये विनापरवाना आणि अस्वच्छ परिसरात मिठाईचे उत्पादन सुरू असल्याचे आढळून आले. प्रशासनाने १ हजार ८०७ किलो मिठाईचा साठा जप्त करून नष्ट केला. तसेच माळशिरस तालुक्यातील शेतकरी राजा दूध संकलन केंद्र येथे निकृष्ट दर्जाचे ८० लिटर दूध आढळल्याने तेही नष्ट करण्यात आले आणि संबंधित परवान्यावर कारवाई करण्यात आली.
पुण्यातील ताथवडे परिसरातील गुड फूड रोल हाऊस तंदुरी हाऊस या आस्थापनातही अन्न सुरक्षा नियमांचे गंभीर उल्लंघन झाल्याचे आढळले. तपासणीनंतर या आस्थापनाचा अन्न परवाना तात्काळ निलंबित करण्यात आला. ग्राहकांच्या आरोग्याशी तडजोड करणाऱ्या कोणत्याही प्रकाराला माफी दिली जाणार नसल्याचा स्पष्ट संदेश या कारवाईतून देण्यात आला आहे.
दरम्यान, मुंबईतील अंधेरी परिसरात अन्न व औषध प्रशासनाने केलेल्या आणखी एका धाडीत धक्कादायक प्रकार उघडकीस आला. चहा अधिक आकर्षक दिसावा यासाठी त्यामध्ये कृत्रिम रंग मिसळून विक्रीसाठी तयार केला जात असल्याचे तपासात समोर आले. या कारवाईत ९०० किलो चहा पावडर, १७ किलो संशयित रंग आणि सुमारे २.१८ लाख रुपयांचा साठा जप्त करण्यात आला आहे.
अन्न व औषध प्रशासनाने अन्न व्यवसायिकांना अन्न सुरक्षा आणि स्वच्छतेच्या नियमांचे काटेकोर पालन करण्याचे आवाहन केले आहे. तसेच ग्राहकांनी दूध, दुग्धजन्य पदार्थ किंवा इतर खाद्यपदार्थ खरेदी करताना उत्पादनावरील लेबल, उत्पादनाची तारीख, वापरण्याची अंतिम मुदत आणि FSSAI परवाना क्रमांक तपासूनच खरेदी करावी, असेही प्रशासनाने स्पष्ट केले आहे. राज्यभर अन्न सुरक्षा नियमांची कठोर अंमलबजावणी सुरू राहणार असल्याचे संकेत या कारवाईतून मिळत आहेत.
Follow us on our social media handles:
Also Read: Pune’s Latest Information
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
