पुण्यातील चैन स्नॅचिंग प्रकरणात रेकॉर्डवरील आरोपी जेरबंद; आंबेगाव पोलिसांची धडक कारवाई, ५ गुन्हे उघडकीस
पुण्यातील चैन स्नॅचिंग प्रकरणात रेकॉर्डवरील आरोपी जेरबंद; आंबेगाव पोलिसांची धडक कारवाई, ५ गुन्हे उघडकीस
आंबेगाव पोलिसांनी सापळा लावून रेकॉर्डवरील चैन स्नॅचरला अटक. विविध पोलीस ठाण्यांतील ५ गुन्हे उघड—सोनं, मोबाईल आणि मोपेडसह ३.९२ लाखांचा मुद्देमाल जप्त.
2 डिसेंबर २०२५ : पुणे शहरातील चैन स्नॅचिंगच्या वाढत्या घटनांवर आंबेगाव पोलीस स्टेशनने मोठी कारवाई करत रेकॉर्डवरील एका आरोपीला जेरबंद केले आहे. या आरोपीकडून पुणे शहरातील विविध पोलीस ठाण्यांतील पाच गुन्हे उघडकीस आले असून तब्बल ३.९२ लाखांचा मुद्देमाल पोलिसांनी जप्त केला आहे. या कारवाईमुळे आंबेगाव, सिंहगड रोड, बावधन, खडक या ठिकाणी झालेल्या जबरी चोरीच्या प्रकरणांना उलगडा मिळाला आहे.
२ मे २०२५ रोजी फिर्यादी जुना सातारा–पुणे रोडवरील गुजरपाडी परिसरात मोपेड रस्त्याच्या कडेला पार्क करून झोपले असताना त्यांच्या खिशातील मोबाईल आणि मोपेड चोरून नेण्यात आली होती. या प्रकरणी आंबेगाव पोलीस ठाण्यात गुन्हा रजिस्टर क्र. ९१/२०२५, भारतीय न्यायसंहिता २०२३ चे कलम ३०३(२) नुसार गुन्हा दाखल करण्यात आला. घटनानंतर पोलीस अंमलदार हनुमंत मासाळ आणि चेतन गोरे यांनी तांत्रिक तपास, सीसीटीव्ही फुटेज आणि गुप्त बातमीदारांच्या मदतीने संशयिताचा कसून शोध सुरू केला.
त्याचदरम्यान मिळालेल्या पक्क्या माहितीच्या आधारे रेकॉर्डवरील आरोपी अफाक नरहरी शिंदे (रा. जाधव नगर, भवानीनगर, पुणे) हा दरी पुलाजवळ येणार असल्याचे समजताच परिश्रमी पथकाने पोलीस निरीक्षक शरद झिणे आणि पोलीस उपनिरीक्षक मोहन कळमकर यांच्या मार्गदर्शनाखाली सापळा लावून आरोपीला अटक केली.
अटकेनंतर चौकशीत आरोपीने आंबेगाव, सिंहगड रोड, खडक पोलीस स्टेशन आणि बावधन पोलीस स्टेशन (पिंपरी चिंचवड आयुक्तालय) हददीतील अनेक चैन स्नॅचिंग (जबरी चोरी) प्रकरणात सहभाग असल्याचे कबूल केले. तसेच खडक पोलिसांना आवश्यक असलेल्या एका गुन्ह्यात तो पाहिजे आरोपी असल्याचेही निष्पन्न झाले. आरोपीकडून पुढीलप्रमाणे पाच गुन्हे उघडकीस आले आहेत —
- आंबेगाव पो. स्टे. – गु.र.क्र. ९१/२०२५, भा.नि.सं. कलम ३०३(२)
- म्हैसगाव पो. स्टे. – गु.र.क्र. १९३/२०२५, कलम ३०९(४), ३(५)
- सिंहगड रोड पो. स्टे. – गु.र.क्र. ३७७/२०२५, कलम ३०९(४), ३(५)
- बावधन पो. स्टे. – गु.र.क्र. २१७/२०२५, कलम ३१८(२), ३(५)
- खडक पो. स्टे. – गु.र.क्र. ९६/२०२४, भा.द.वि. कलम ३१२, ३४१, ३२३, ५०४, ३४ (पाहिजे आरोपी)
या गुन्ह्यांमध्ये वापरलेली मोपेड, सोन्याचे दागिने व मोबाईल असा एकूण ३,९२,००० रुपयांचा मुद्देमाल पोलिसांनी जप्त केला आहे.
ही संपूर्ण कारवाई पोलीस आयुक्त अमितेश कुमार, सह पोलीस आयुक्त रंजनकुमार शर्मा, अपर पोलीस आयुक्त राजेश बनसोडे, परिमंडळ अधिकारी मिलींद गोहिते आणि स्वारगेट विभागाच्या सहा पोलीस आयुक्त गजेंद्र आचारे यांच्या मार्गदर्शनाखाली करण्यात आली. वरिष्ठ पोलीस निरीक्षक शरद झिणे, पोलीस निरीक्षक (गुन्हे) गजानन चोरगले, पोउनि मोहन कळमकर तसेच पोलीस अंमलदार शैलेंद्र साठे, चेतन गोरे, हनुमंत मासाळ, निलेश जमदाडे, हरिष गायकवाड, सुभाष मोरे आणि इतर कर्मचाऱ्यांनी या कारवाईत महत्त्वाची भूमिका बजावली.
पोलिसांनी सांगितले की, आरोपीची गुन्हेगारी प्रवृत्ती गंभीर असून शहरातील अनेक भागांत तो सक्रिय होता. त्याचा पुढील गुन्हेगारी नेटवर्क शोधण्यासाठी तपास सुरू आहे. या यशस्वी कारवाईमुळे पुणे शहरातील चैन स्नॅचिंग प्रकरणांमध्ये मोठा दिलासा मिळाला असल्याची प्रतिक्रिया नागरिकांनी व्यक्त केली आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
