ससून रुग्णालय परिचारिका संप | ५०० शस्त्रक्रिया रखडल्या | पुणे आरोग्य सेवा कोलमडली
ससून रुग्णालयात परिचारिका संपामुळे आरोग्य सेवा कोलमडली; ५०० शस्त्रक्रिया स्थगित,
पुण्यातील ससून रुग्णालयात परिचारिका संपामुळे आरोग्य व्यवस्था धोक्यात; ५०० शस्त्रक्रिया रखडल्या, १३०० रुग्णांना नोंदणी नाकारली. सरकारने अजून निर्णय घेतलेला नाही.
सायली मेमाणे
पुणे २४ जुलै २०२५ : महाराष्ट्रातील शासकीय रुग्णालयांमध्ये गेल्या सहा दिवसांपासून सुरु असलेल्या परिचारिकांच्या संपामुळे पुण्यातील सासून जनरल रुग्णालयात आरोग्य सेवा कोलमडली आहे. या संपाचा थेट परिणाम म्हणजे सुमारे ५०० मोठ्या-छोट्या शस्त्रक्रिया रखडल्या असून, १३०० हून अधिक नव्या रुग्णांना रुग्णालयात नोंदणीस नकार देण्यात आला आहे.
या संपामागील मुख्य कारण म्हणजे, कंत्राटी पद्धतीने भरती होणाऱ्या परिचारिकांना कायम नियुक्ती आणि चांगल्या कामकाजाच्या अटी देण्याची मागणी. सध्या सासूनमध्ये सुमारे ४०० परिचारिका संपात सहभागी आहेत. त्याऐवजी १०० खासगी नर्सिंग कॉलेजमधील तात्पुरत्या परिचारिकांकडून सेवा सुरू ठेवण्याचा प्रयत्न सुरु आहे, पण तो पुरेसा ठरत नाहीये.
परिचारिका म्हणजे रुग्णालयाच्या व्यवस्थेची आधारशिला. रुग्णांची नोंद, औषध वाटप, वार्ड स्वच्छता, आहार व्यवस्थापन अशा अनेक जबाबदाऱ्या त्या पार पाडतात. त्यांच्या अनुपस्थितीमुळे इमर्जन्सी आणि ओपीडी सेवा कुशलतेने चालवणे अशक्य झाले आहे. अनेक रुग्ण गंभीर अवस्थेत असूनही वेळेवर उपचार मिळत नाहीत.
या संपात सहभागी संघटनांनी शासनाशी अनेक वेळा चर्चा केली असली, तरी ठोस निर्णय झालेला नाही. आता मुख्यमंत्र्यांच्या पातळीवर उच्चस्तरीय बैठक घेण्याची घोषणा केली आहे, पण तोपर्यंत रुग्णांचे हाल सुरूच राहणार आहेत.
सासून रुग्णालय हे लाखो गरीब, मध्यमवर्गीय रुग्णांसाठी जीवनदायी सेवा आहे. या ठिकाणी स्वस्त व दर्जेदार उपचार मिळतात. पण आता परिस्थिती अशी आहे की, अनेकांनी खासगी रुग्णालयांचा मार्ग पत्करावा लागतोय, जे त्यांच्या आर्थिक आवाक्याबाहेर आहे.
खासगी संस्थांमधून काही परिचारिका आणून सेवा चालवण्याचा प्रयत्न केला जात आहे, पण हे फक्त अस्थायी उपाय आहेत. सरकारने तत्काळ परिचारिकांच्या मागण्यांकडे गांभीर्याने पाहून कायमस्वरूपी तोडगा काढणे आवश्यक आहे.
