मुंबई मंत्रालयातील 7व्या मजल्यावर मुख्यमंत्री वैद्यकीय सहाय्यता कक्षाबाहेर गंजलेले सिलिंग कोसळले. सुदैवाने कोणतीही जीवितहानी झाली नाही.
सायली मेमाणे
मुंबई २५ जुलै २०२५ : मंत्रालयात दुर्घटना; मुख्यमंत्री सहाय्यता कक्षाबाहेर सिलिंग कोसळलं
मुंबई | मंत्रालयात शुक्रवारी सकाळी एक चिंताजनक घटना घडली. मंत्रालयाच्या सातव्या मजल्यावर असणाऱ्या मुख्यमंत्री वैद्यकीय सहाय्यता कक्षाच्या बाहेरचं सिलिंग अचानक कोसळलं. सुदैवाने, यामध्ये कोणतीही जीवितहानी झाली नाही. मात्र या प्रकारामुळे मंत्रालयाच्या देखभाल-दुरुस्ती व्यवस्थेवर मोठं प्रश्नचिन्ह निर्माण झालं आहे.
मुख्यमंत्री वैद्यकीय सहाय्यता कक्ष हे एक अत्यंत महत्त्वाचं कार्यालय आहे जिथे अनेक गरजू रुग्णांचे नातेवाईक दररोज आर्थिक मदतीसाठी अर्ज करतात. त्यामुळे या भागात नेहमीच गर्दी असते. याच ठिकाणी सकाळच्या सुमारास सिलिंगचा एक गंजलेला लोखंडी भाग कोसळला. सिलिंगचा कोसळलेला भाग मुख्यमंत्री सहाय्यता कक्षाच्या डेस्कच्या बाहेरील भागात पडला.
सुदैवाने, घटनेच्या वेळी त्या भागात कोणीही नव्हतं, त्यामुळे कुणालाही दुखापत झाली नाही. मात्र जर काही मिनिटांनी ही घटना घडली असती, तर मोठी दुर्घटना घडली असती. हे लक्षात घेता मंत्रालयातील देखभाल व्यवस्था आणि यंत्रणेतील निष्काळजीपणा पुन्हा एकदा समोर आला आहे.
घटनेनंतर संबंधित भाग तातडीने बंद करण्यात आला असून, सफाई कर्मचाऱ्यांनी गंजलेला लोखंडी ढिगारा हटवला. सुरक्षेच्या दृष्टीने संबंधित अधिकाऱ्यांना सूचना देण्यात आल्या आहेत. मंत्रालयात दररोज हजारो लोक भेट देतात, त्यामुळे अशा घटना नागरिकांच्या सुरक्षेच्या दृष्टीने अत्यंत गंभीर मानल्या जातात.
या दुर्घटनेनंतर प्रशासनाने तातडीने संबंधित बांधकाम विभागाकडून अहवाल मागवला आहे. प्रथमतः समोर आलेली माहिती अशी की, संबंधित भागात गंज लागलेला होता आणि दीर्घकाळ देखभाल न केल्यामुळे ही स्थिती निर्माण झाली. मंत्रालयात अनेक भाग गंजलेल्या लोखंडाच्या संरचनेतून बनलेले आहेत आणि अशा घटकांवर वेळोवेळी देखरेख होणं आवश्यक आहे.
याआधी देखील मंत्रालयात अग्निशमन सुरक्षा, वीज सुरक्षेचा अभाव आणि इमारतीतील जुनाट वायरिंग यावर प्रश्न उपस्थित झाले होते. मात्र तरीही सखोल उपाययोजना होताना दिसत नाहीत.
या घटनेनंतर नागरिकांमध्ये नाराजीचे सूर उमटू लागले आहेत. मुख्यमंत्री सहाय्यता कक्षात येणारे बहुतेक नागरिक हे गरजू आणि रुग्णांच्या नातेवाईक असतात, जे आधीच तणावात असतात. अशा ठिकाणी सुरक्षिततेचा अभाव असल्यास, हे शासन व्यवस्थेच्या उदासीनतेचं उदाहरण ठरतं.
मंत्रालय हे राज्य शासनाचं मुख्य कार्यालय असून, येथे घडणाऱ्या अशा घटना प्रशासनाच्या कार्यक्षमतेवर प्रश्न उपस्थित करतात. संबंधित विभागाने तातडीने संपूर्ण इमारतीची पाहणी करून इतर धोकादायक भाग दुरुस्त करावेत, अशी मागणी आता जोर धरू लागली आहे.
Do-follow Links:
Instagram
YouTube
Facebook
Twitter