मुंबईत रेल्वे पुष्पक एक्स्प्रेसमधून प्रवासी खाली कसे पडले? दिवा-मुंब्रा स्थानकादरम्यान घडलेली घटना कशी घडली, हे जाणून घ्या.
सायली मेमाणे
पुणे : 9 जून २०२५ : मुंबईच्या मध्य रेल्वेमार्गावर सोमवार ९ जून रोजी सकाळच्या वेळेत एक दुर्दैवी रेल्वे अपघात घडला. पुष्पक एक्स्प्रेसमधून सहा प्रवासी चालत्या ट्रेनमधून खाली पडल्याची गंभीर घटना दिवा आणि कोपर स्थानकांदरम्यान घडली. यामध्ये पाच प्रवाशांचा जागीच मृत्यू झाल्याची प्राथमिक माहिती समोर आली आहे. ही घटना घडली त्यावेळी ट्रेनमध्ये प्रचंड गर्दी होती, आणि अनेक प्रवासी दरवाज्यांवर लटकून प्रवास करत होते.
प्रत्यक्षदर्शींनी दिलेल्या माहितीनुसार, अपघात घडल्यानंतर काही वेळातच रुग्णवाहिका घटनास्थळी पोहोचली. जखमींना तातडीने जवळच्या कळवा येथील रुग्णालयात हलवण्यात आले. या अपघाताची माहिती सर्वप्रथम संबंधित ट्रेनच्या गार्डने रेल्वे प्रशासनाला दिली होती. प्रशासनाने तत्काळ दिवा आणि मुंब्रा स्थानकांवरून वैद्यकीय मदतीसाठी गाड्या पाठवल्या.
रेल्वेच्या जनसंपर्क विभागाचे अधिकारी स्वप्नील निला यांनी यासंदर्भात सांगितले की, प्राथमिक माहितीनुसार अपघात सकाळी साडेनऊच्या सुमारास झाला. प्रवासी कोणत्या परिस्थितीत खाली पडले, याचा तपास सुरू आहे. अपघाताचे व्हिडीओ आणि काही फोटो समाजमाध्यमांवर झपाट्याने व्हायरल झाले असून, त्यामध्ये अपघातग्रस्त प्रवासी रेल्वे ट्रॅकवर पडलेले दिसत आहेत.
व्हिडीओत जखमींची अवस्था अत्यंत गंभीर दिसत होती. काहींचे कपडे फाटलेले होते आणि काही प्रवाशांच्या हालचाली थांबल्या होत्या. घटनास्थळी जमा झालेल्या स्थानिकांनी तातडीने मदतकार्य सुरू केले आणि जखमींना प्लॅटफॉर्मवर हलवले. या भीषण घटनेने परिसरात हळहळ व्यक्त करण्यात येत आहे.
प्रशासनाकडून मिळालेल्या माहितीनुसार, प्रवाशांच्या मृत्यूचं नेमकं कारण अद्याप स्पष्ट झालं नाही. गर्दी, ट्रेनची गती, आणि डब्यांची अपुरी उपलब्धता या सर्व घटकांवर तपास सुरू आहे. पुष्पक एक्स्प्रेस ही उत्तर भारतातून येणारी लांब पल्ल्याची ट्रेन असून, मुंबईत ती स्थानिक प्रवासासाठीही मोठ्या प्रमाणात वापरली जाते.
या दुर्घटनेनंतर प्रवाशांच्या सुरक्षेबाबत पुन्हा एकदा प्रश्न निर्माण झाले आहेत. रेल्वेच्या दरवाजांमध्ये लटकून प्रवास करणे, अपुऱ्या गाड्या आणि वेळापत्रकात सातत्याने होणारे बदल हे मुद्दे याआधी अनेकदा चर्चेत आले आहेत. अपघात टाळण्यासाठी रेल्वे प्रशासनाने प्रवासी सुरक्षेला अधिक प्राधान्य देणं अत्यावश्यक ठरतं आहे.
या घटनेनंतर मृत प्रवाशांच्या कुटुंबीयांवर दु:खाचा डोंगर कोसळला आहे. त्यांच्या मदतीसाठी शासनाकडून तत्काळ मदतीची अपेक्षा व्यक्त होत आहे. अपघात टाळण्यासाठी यंत्रणेमध्ये सुधारणा करणे, गर्दी नियंत्रित करणे आणि जनजागृती करणे ही गरज अधिक तीव्र झाली आहे.
मुंबईसारख्या घनदाट लोकसंख्या असलेल्या शहरामध्ये अशा घटनांवर वेळीच नियंत्रण न घेतल्यास भविष्यात आणखी गंभीर परिणाम होऊ शकतात. या घटनेच्या सखोल चौकशीसाठी रेल्वे प्रशासनाने पावले उचलली असून, अंतिम अहवाल प्राप्त होण्याची प्रतीक्षा आहे.