पुण्यात टँकरद्वारे पाणीपुरवठा करताना जादा पैसे घेतल्यास महापालिकेची कडक कारवाई; नागरिकांनी जलदाय विभागात तक्रार करावी, अशी सूचना PMC आयुक्तांची.
सायली मेमाणे
पुणे ; १६ मे,२०२५:
पुणे महापालिकेचा टँकर मालकांना इशारा: अतिरिक्त शुल्क घेतल्यास थेट कारवाई
पुणे महानगरपालिका क्षेत्रातील नागरिकांकडून टँकरद्वारे पाणीपुरवठा करताना अतिरिक्त शुल्क आकारल्यास कारवाई होईल, असा स्पष्ट इशारा महापालिका आयुक्त डॉ. राजेंद्र भोसले यांनी दिला आहे. पाणीटंचाईच्या पार्श्वभूमीवर अनेक भागांमध्ये नागरिकांना टँकरवर अवलंबून राहावे लागत असून, काही ठिकाणी मनमानी दर आकारल्याच्या तक्रारी महापालिकेकडे पोहोचल्या आहेत.
पुणे महापालिकेच्या ३२ गावांमध्ये नियमित पाणीपुरवठा करणे सध्या आव्हानात्मक बनले आहे. याचमुळे नागरिक टँकरच्या माध्यमातून पाण्यासाठी खर्च करत आहेत. मात्र, अंमलबजावणीत विसंगती दिसून आली आहे. आंबेगाव बुद्रुक, खराडी, नहें यांसारख्या भागांमधून अनावश्यक शुल्क आकारल्याच्या तक्रारी नोंदवण्यात आल्या आहेत. या पार्श्वभूमीवर टँकर चालक-मालक संघटनांसोबत बैठक घेऊन, दर एकसमान ठेवण्याचा आणि कोणत्याही स्थितीत अतिरिक्त रक्कम आकारू नये, असा आदेश दिला गेला आहे.
महापालिकेच्या माध्यमातून मोफत पाणी देण्यात येणाऱ्या भागांमध्ये देखील काही टँकर चालक नागरिकांकडून पैसे घेत असल्याचे समोर आले आहे. अशा घटनांवर कठोर कारवाई केली जाईल, असा स्पष्ट संदेश आयुक्तांनी दिला आहे. नागरिकांनी अशा प्रकारची तक्रार थेट महापालिकेच्या जलदाय विभागाकडे करावी, असेही आवाहन करण्यात आले आहे.
टँकरचे दर हे टँकर भरण्याचे ठिकाण आणि पाणी पोहोचविण्याच्या अंतरावर आधारित निश्चित केले जातात. त्यामुळे कोणत्याही चालकाने नियमबाह्य शुल्क मागितल्यास, ते तत्काळ प्रशासनाच्या निदर्शनास आणून द्यावे. याशिवाय, नागरिकांना सुरक्षित पाणी मिळावे यासाठी टँकरमधील पाणी शुद्ध व क्लोरीनयुक्त असणे आवश्यक आहे, असेही आदेश देण्यात आले आहेत.
ही संपूर्ण कार्यवाही पुणे महापालिकेच्या वतीने टँकर माफियांवर नियंत्रण ठेवण्यासाठी आणि नागरिकांना योग्य दरात, सुरक्षित पाणी मिळावे यासाठी केली जात आहे.