पुणे तिहेरी हत्याकांडात खंडाळे घाटात एका महिलेच्या हातावर ‘जय भीम’ गोंदवलेले असून तिच्यासह दोन मुलांचे अर्धवट जळालेल्या अवस्थेतील मृतदेह आढळले. तपास पोलिसांसाठी मोठं आव्हान ठरत आहे.
सायली मेमाणे,
पुणे २५ मे २०२५. : पुणे जिल्ह्यातील शिरूर तालुक्यातील खंडाळे घाट परिसरात एका महिलेच्या हातावर ‘जय भीम’ गोंदवलेले असून तिच्यासह दोन लहान मुलांचे अर्धवट जळालेल्या अवस्थेतील मृतदेह आढळले आहेत. या घटनेमुळे संपूर्ण परिसरात खळबळ उडाली असून, पोलिसांसमोर हे पुणे तिहेरी हत्याकांड एक मोठं तपासाचं आव्हान ठरत आहे. मृत महिलेचे वय अंदाजे २५ ते ३० दरम्यान असावे, तर दोन्ही मुले सुमारे दीड ते पाच वर्षे वयोगटातील आहेत. या तिघांचाही अत्यंत क्रूर पद्धतीने खून करण्यात आला असून, गुन्हेगारांनी मृतदेह पेट्रोल टाकून जाळण्याचा प्रयत्न केला आहे.
ही घटना रांजणगाव गणपती परिसरातील एका बंद पडलेल्या कंपनीच्या मागील बाजूस आढळली. सकाळी साडेअकराच्या सुमारास एका पादचाऱ्याने परिसरात प्रचंड दुर्गंधी जाणवल्याने पोलिस पाटील सीमा खेडकर यांना माहिती दिली. त्यांनी ग्रामस्थांसह घटनास्थळी जाऊन पाहणी केल्यानंतर तीनही मृतदेह अर्धवट जळालेल्या अवस्थेत आढळून आले. यानंतर पोलिसांना पाचारण करण्यात आले. पोलिस निरीक्षक महादेव वाघमोडे यांच्या नेतृत्वाखाली पोलिसांनी घटनास्थळी धाव घेतली.
पावसामुळे मृतदेह पूर्णतः जळू शकले नसल्याने, काही पुरावे पोलिसांच्या हाती लागले आहेत. त्यात सर्वात महत्त्वाचा पुरावा म्हणजे मृत महिलेच्या हातावर गोंदवलेले ‘जय भीम’ हे टॅटू. हा एकमेव स्पष्ट पुरावा असून, मृत महिलेची ओळख पटवण्यासाठी त्याचाच आधार घेतला जात आहे. पोलिसांनी रांजणगाव एमआयडीसी परिसरात या महिलेसंबंधी माहिती गोळा करण्यासाठी शोध मोहीम सुरू केली आहे. ती या परिसरात कामगार म्हणून राहत होती का याचा तपास सुरु आहे.
श्वान पथकाला पाचारण करून हल्लेखोरांचा माग काढण्याचा प्रयत्न केला जात आहे. मात्र, सतत चालू असलेल्या पावसामुळे शोध कार्यात अडथळे येत आहेत. फॉरेन्सिक पथकाने मृतदेह, परिसरातील वस्तू, पेट्रोलचा वास व इतर खाणाखुणा तपासून नमुने गोळा केले आहेत. यामुळे तपासाला तांत्रिक आधार मिळू शकतो.
या घटनेची माहिती मिळताच जिल्हा पोलिस अधीक्षक संदीपसिंह गिल, शिरूरचे उपविभागीय पोलिस अधिकारी प्रशांत ढोले यांच्यासह वरिष्ठ अधिकारी घटनास्थळी दाखल झाले. त्यांनी पाहणी करून तपास पथकाला सूचना दिल्या आहेत. पोलिसांनी पंचनामा करून घटनास्थळ सील केले आहे.
मृत महिला आणि तीला बिलगलेली दोन छोटी बालके पाहून घटनास्थळी उपस्थित नागरिक भावनाविवश झाले. ही महिला आपल्या मुलांसह राहत होती की अन्य कुणाचा हेतुपूर्वक खून केला गेला आहे, याबाबत तपास सुरू आहे. दरम्यान, मृतदेहांच्या डीएनए चाचण्या आणि ओळख पटवण्यासाठी विविध जिल्ह्यांतून बेपत्ता व्यक्तींची माहिती गोळा केली जात आहे.
या घटनेनंतर परिसरात भीतीचे वातावरण निर्माण झाले आहे. स्थानिकांनी महिलांच्या सुरक्षेबाबत चिंता व्यक्त केली आहे. पोलिसांनी नागरिकांना सहकार्य करण्याचे आवाहन केले असून, कोणतीही शंका अथवा माहिती असल्यास त्वरित पोलिसांशी संपर्क साधण्याचे आवाहन करण्यात आले आहे.
हा खून आर्थिक, कौटुंबिक अथवा इतर कोणत्या वैयक्तिक कारणामुळे झाला का याचा तपास करण्यात येत आहे. यासाठी स्थानिक गुन्हे शाखा देखील सक्रिय झाली आहे. रांजणगाव एमआयडीसी पोलिस स्थानिकांशी संवाद साधून मृत महिलेची ओळख पटवण्याचा प्रयत्न करत आहेत.
सध्या एकमेव धागा म्हणजे ‘जय भीम’ हा गोंद. त्याद्वारे मृत महिलेचा सामाजिक किंवा सांस्कृतिक संदर्भ काढून, ओळखीचा तपास अधिक सखोल केला जात आहे. घटनास्थळी सापडलेली इतर खाणाखुणा, जळालेले कपडे, वस्तू यावरून आरोपी पर्यंत पोहोचण्याचा पोलिसांचा प्रयत्न सुरू आहे.
हे प्रकरण केवळ गुन्हेगारी नाही, तर समाजातील दुर्लक्षित महिला आणि लहान बालकांच्या सुरक्षेचा गंभीर प्रश्न उपस्थित करत आहे. पोलिस यंत्रणांपुढे हे पुणे तिहेरी हत्याकांड एक मोठे आव्हान आहे.