दुर्गम भागातील ओंकार बिटले मर्चंट नेव्हीमध्ये अधिकारी; आई-वडिलांच्या कष्टाची यशोगाथा
दुर्गम गावातून मर्चंट नेव्हीमध्ये थर्ड ऑफिसर
सातारा जिल्ह्यातील खटाव तालुक्यातील दुर्गम भागातील ओंकार बिटले याची मर्चंट नेव्हीमध्ये थर्ड ऑफिसर पदी निवड झाली आहे. वडिलांच्या शौर्यकथा आणि आईच्या कष्टातून घडलेले हे यश अनेकांसाठी प्रेरणादायी आहे.
सायली मेमाणे,
पुणे : २७ मे २०२४ : सातारा जिल्ह्यातील खटाव तालुक्यातील बिटलेवाडी सारख्या दूरस्थ गावातून आलेल्या ओंकार बिटले याने मर्चंट नेव्हीमध्ये थर्ड ऑफिसर म्हणून यश संपादन केले आहे. त्याच्या या यशामागे आहेत कष्टकरी आई-वडिलांची दूरदृष्टी, त्याग आणि मुलाच्या स्वप्नांवर ठेवलेला विश्वास.
ओंकारचे वडील शंकर बिटले हे भारतीय लष्करातून सेवानिवृत्त झालेले असून त्यांनी आपल्या कर्तव्यकाळात अनेक ठिकाणी देशसेवा केली. सैनिकी पार्श्वभूमीमुळे घरात लहानपणापासूनच शिस्त आणि शौर्याच्या गोष्टींना महत्त्व होते. त्याच वातावरणात वाढलेल्या ओंकारला सुरुवातीपासूनच नेव्ही आणि साहसाचं आकर्षण होतं. दुर्गम गावातील शिक्षण मर्यादित असल्याने शंकर बिटले यांनी कुटुंबासह साताऱ्यात स्थलांतर केलं आणि ओंकारला छत्रपती शाहू अकॅडमीत दाखल केलं.
शालेय जीवनात ओंकारने सातत्याने उजवे निकाल मिळवले. दहावीमध्ये ८७ टक्के तर बारावीमध्ये ७७ टक्के गुण मिळवत त्याने पुढील वाटचालीचा पाया घातला. आपल्या मुलाच्या स्वप्नांना आकार देताना त्याच्या आई वैशाली यांनीही कष्टांची पराकाष्ठा केली. ओंकार स्वतः म्हणतो, “माझ्या आई-वडिलांनी मला जे काही दिलं, त्याची परतफेड मी कधीच करू शकत नाही. हे यश त्यांच्या मेहनतीमुळे शक्य झालं.”
आज ओंकार बिटले मर्चंट नेव्हीमध्ये थर्ड ऑफिसर पदावर निवडला गेलेला असला, तरी त्याची कहाणी केवळ वैयक्तिक यशाची नाही, तर ग्रामीण महाराष्ट्रातील अनेक तरुणांसाठी प्रेरणादायी आहे. दुर्गम भागातही संधी आहेत, हे या यशाने पुन्हा सिद्ध केलं आहे.
About The Author
