पुण्यात एव्हिएशन गॅलरी लवकरच उभारण्यात येणार असून ती देशातील सर्वात मोठी एव्हिएशन माहिती केंद्र असेल. स्वतंत्र हेलिपोर्टसाठी जागेचा शोध सुरू.
सायली मेमाणे,
पुणे : २८ मे २०२५ : पुणे शहर हवाई वाहतुकीच्या क्षेत्रात आता आणखी एक ऐतिहासिक पाऊल टाकण्याच्या तयारीत आहे. लवकरच येथे पुण्यात एव्हिएशन गॅलरी उभारण्यात येणार असून, ही गॅलरी देशातील सर्वात मोठी एव्हिएशन माहिती केंद्र ठरणार आहे. केंद्र सरकारच्या नागरी विमान वाहतूक मंत्रालयाने यास मान्यता दिली असून, यामुळे महाराष्ट्रातील हवाई क्षेत्राच्या विकासाला नवे परिमाण मिळणार आहे.
पुण्यात सध्या देशातील सर्वाधिक हेलिकॉप्टरचे व्यवहार होतात. त्यात व्यावसायिक, वैद्यकीय, आणि पर्यटन क्षेत्राशी संबंधित उड्डाणांचा समावेश आहे. त्यामुळे स्वतंत्र हेलिपोर्ट उभारण्याच्या दृष्टीने जागेचा शोध सुरू करण्यात आला आहे. यामुळे पुण्यातील हवाई वाहतुकीला एक सुसंगत दिशा मिळेल.
ही एव्हिएशन गॅलरी म्हणजे केवळ प्रदर्शन स्थळ न राहता, एव्हिएशन क्षेत्रातील इतिहास, तंत्रज्ञान, संशोधन आणि भविष्यातील वाटचाल यांचं ज्ञान देणारे केंद्र असेल. येथे भारतातील विमान प्रवासाच्या सुरुवातीपासूनचे मॉडेल्स, माहिती फलक, सिम्युलेटर, आणि प्रशिक्षण वर्गांचे आयोजन केले जाणार आहे.
शालेय आणि अभियांत्रिकी विद्यार्थ्यांसाठी ही गॅलरी उपयुक्त ठरेल. हवाई तंत्रज्ञानातील करिअरची दिशा शोधणाऱ्या युवकांसाठी ती प्रेरणास्थान बनेल. विशेष म्हणजे, ही गॅलरी केवळ पर्यटनासाठी नसून शैक्षणिक उद्दिष्टांसाठी सुद्धा उपयोगी ठरेल.
या प्रकल्पाचे नियोजन करणाऱ्या अधिकार्‍यांनी सांगितले की, गॅलरीसाठी जागेची निवड अंतिम टप्प्यात आहे. यासाठी केंद्र व राज्य सरकार एकत्रितपणे कार्य करत असून, निधीची तरतूद सुद्धा अंतिम करण्यात येत आहे.
पुणे विमानतळावरील धावपट्टी विस्तार प्रकल्पासाठी देखील भूसंपादन प्रक्रियेला वेग देण्यात येत आहे. यामुळे नवीन आंतरराष्ट्रीय विमानसेवा सुरू होण्याचा मार्ग मोकळा होणार आहे. तसेच, “उडान योजना” अंतर्गत शिर्डी, सोलापूर व अकोला यांसारख्या छोट्या शहरांमध्ये देखील विमानसेवा वाढवण्याचा सरकारचा मानस आहे.
हे सर्व प्रकल्प पूर्ण झाल्यानंतर, पुणे हे फक्त एक औद्योगिक आणि शैक्षणिक केंद्र न राहता, हवाई वाहतूक क्षेत्रातील महत्त्वपूर्ण केंद्र म्हणून उदयास येईल. पुण्यात एव्हिएशन गॅलरीसारखा प्रकल्प केवळ विकासाचे प्रतीक नाही, तर हवाई शिक्षण आणि संशोधनासाठी एक नवे पर्व ठरेल.